কেন্দ্ৰীয় বিত্ত মন্ত্ৰী নিৰ্মলা সীতাৰমণে আজি লোকসভাত একবিংশ শতিকাৰ তৃতীয় দশকৰ প্ৰথমখন বিত্তীয় বাজেট দাখিল কৰে।
২০২০-২১ বিত্তীয় বৰ্ষৰ বাবে দাখিল কৰা বিত্তীয় বাজেটত কৃষিখণ্ডক বিশেষ অগ্ৰাধিকাৰ দিয়া হয়।
বাজেটত নিৰ্মলা সীতাৰমণে দেশৰ কৃষকসকলৰ বাবে ভালেমান সুখবৰ লৈ আহিছে।
২০২০-২১ বিত্তীয় বাজেটত খেতিয়কসকলৰ আয় দুগুণ কৰাৰ বাবে ১৬ টা ‘একশ্যন প্লেন’ নিৰ্ধাৰণ কৰা হৈছে।
কেন্দ্ৰীয় বাজেটত কৃষি খণ্ডৰ বাবে মুঠ ২.৮৩ লাখ কৌটি টকাৰ বাজেট নিৰ্ধাৰণ কৰা হৈছে।
এই বাজেটেৰে কৃষি খণ্ডত কৃষক সকলৰ বাবে সৌৰ শক্তি চালিত পাম্প যোগান ধৰাৰ লগতে মস্য পালন, পশু পালন, দুগ্ধ উৎপাদনৰ ক্ষেত্ৰতো বিশেষ পৰিকল্পনা গ্ৰহণ কৰা হৈছে।
চৰকাৰে ২০২০-২৩ চনৰ ভিতৰত দেশত দুগ্ধ উৎপাদন দুগুণ কৰাৰ বাবে লক্ষ্য নিৰ্ধাৰণ কৰিছে।
আনহাতে, ২০২০-২৩ চনৰ ভিতৰত দেশত ২০০ লাখ টন মাছ উৎপাদন কৰাৰ বাবেও চৰকাৰে লক্ষ্য স্থিৰ কৰিছে যাৰ বাবে বাজেটত মস্য পালক সকলৰ বাবে আঁচনি গ্ৰহণ কৰিছে।
আনহাতে, পশু পালনৰ ক্ষেত্ৰত পোহনীয়া জীৱ-জন্তুৰ হ’ব পৰা তিনিবিধ মূল ৰোগৰ নিৰাময়ৰ বাবে বাজেট ধাৰ্য্য কৰা হৈছে।
তদুপৰি, কৃষি ক্ষেত্ৰত জৈৱিক সাৰ প্ৰয়োগৰ লগতে সন্তুলিত মাত্ৰাত ৰাসায়নিক সাৰ প্ৰয়োগৰ বাবেও বাজেট ধাৰ্য্য কৰা হৈছে।
তদুপৰি, খেতিয়কসকলৰ বাবে নাবাৰ্ডৰ পুনৰ ঋণ প্ৰদান আঁচনি সক্ৰিয় কৰাৰ লগতে বিশেষ ৰে’ল সেৱা আৰম্ভ কৰিব।
