শনিবাৰে দ্বিতীয়বাৰৰ বাবে সংসদত নিৰ্মলা সীতাৰমণে বাজেট দাখিল কৰি প্ৰথমগৰাকী মহিলা বিত্ত মন্ত্ৰী হিচাপে পৰিচিত হৈছে।
বিত্ত মন্ত্ৰী য’ত বিজেপিৰ সৈতে জড়িত, তেওঁৰ শাহু আৰু শহুৰ পূৰ্বে কংগ্ৰেছত আছিল।
সীতাৰমণৰ শাহুৱেক অন্ধ্ৰ প্ৰদেশৰ কংগ্ৰেছ বিধায়িকা আৰু শহুৰেক মন্ত্ৰী আছিল।
১৯৫৯ চনৰ ১৮ আগষ্টত মাদুৰাইত এটি ব্ৰাহ্মণ পৰিয়ালত জন্মগ্ৰহণ কৰিছিল নিৰ্মলা সীতাৰমণে।
তেওঁৰ পিতৃ নাৰায়ন সীতাৰমণ ৰেইলৱেত চাকৰি কৰিছিল আৰু মাতৃ সাবিত্ৰী এগৰাকী গৃহিনী আছিল।
সীতাৰমণে তিৰুচিৰাপল্লীৰ সীতালক্ষ্মী ৰামাস্বামী কলেজত অৰ্থনীতি বিষয় লৈ অধ্যয়ন কৰিছিল। ইয়াৰ পাছত তেওঁ দিল্লীৰ জে এন য়ুৰ পৰা স্নাতকোত্তৰ ডিগ্ৰী আৰু এম ফিল কৰে।
জে এন য়ুত পঢ়ি থকাৰ সময়তে পৰকালা প্ৰভাকৰৰ সৈতে চিনাকি হৈছিল। ইয়াৰ পাছত দুয়োৱে প্ৰেমত পৰে আৰু ১৯৮৬ চনত বিবাহপাশত আৱদ্ধ হয়।
নিৰ্মলা আৰু প্ৰভাকৰৰ কন্যা সন্তান পৰাকলা বাংময়ী ।
বিয়াৰ পাছত নিৰ্মলাই স্বামী প্ৰভাকৰৰ সৈতে লণ্ডনত থাকিবলৈ লয়। লণ্ডনৰ ৰিজেন্ট ষ্ট্ৰীটত এখন হোম ডেকৰ ষ্ট’ৰত ছেলছ পাৰ্ছনৰ কামো কৰে সীতাৰমণে।
ইয়াৰ পাছত তেওঁ কিছুদিনৰ বাবে বিবিচি ৱৰ্ল্ড চাৰ্ভিছৰ সৈতেও কাম কৰে। অডিট ফাৰ্ম প্ৰাইচবাটৰহাওসকুপাৰ্ছত গৱেষণা প্ৰৱন্ধক হিচাপেও কাম কৰিছিল।
১৯৯০’ৰ দশকৰ আৰম্ভণিতে নিৰ্মলা সীতাৰমণ লণ্ডনৰ পৰা উভতি আহে। ইয়াৰ পাছত তেওঁ ২০০৮চনত বিজেপিৰ সৈতে জড়িত হৈ ৰাজনীতিত প্ৰৱেশ কৰে।
দুবছৰৰ ভিতৰতে সুষমা স্বৰাজৰ পাছত দলৰ দ্বিতীয়গৰাকী মহিলা মুখপত্ৰ হিচাপে নিযুক্ত হয়। তদুপৰি টেলিভিশ্বনৰ টক শ্ব’ত বিজেপিৰ পৰিচিত মুখ হৈ পৰিছিল সীতাৰমণ।
২০১৪চনত মোদী চৰকাৰৰ বিত্ত ৰাজ্য মন্ত্ৰী নিযুক্ত হয়। ২০১৭ত দেশৰ প্ৰথমগৰাকী মহিলা প্ৰতিৰক্ষা মন্ত্ৰী নিৰ্বাচিত হয়। ২০১৯ত কেন্দ্ৰীয় বিত্ত মন্ত্ৰী হিচাপে কাৰ্যভাৰ গ্ৰহণ কৰে।
সীতাৰমণ ৰাজনীতিত অহাৰ পূৰ্বে হায়দৰাবাদত চেন্টাৰ ফৰ পাব্লিক পলিচি ষ্টাডিজৰ উপ সঞ্চালক হিচাপে কাম কৰাৰ লগতে চহৰখনত এখন বিদ্যালয়ো স্থাপন কৰিছিল।
২০০৩ৰ পৰা ২০০৫লৈকে নিৰ্মলা সীতাৰমণ ৰাষ্ট্ৰীয় মহিলা আয়োগৰো সদস্য আছিল।
