ভাৰত-আমেৰিকাৰ সামৰিক চুক্তি অনুসৰি ভাৰতে শেহতীয়াকৈ আমেৰিকাৰ পৰা ৭২,৪০০ টা SIGSauer এছল্ট ৰাইফল ক্ৰয় কৰিবলৈ লোৱা সিদ্ধান্তই ৰাছিয়াক অসন্তুষ্ট কৰিছে।
ভাৰত আৰু ৰাছিয়াৰ মাজত ৬.৫ লাখ একে-২০৩ এছল্ট ৰাইফলৰ ঠাইত INSAS ৰাইফলৰ ক্ৰয় কৰাৰ কথা-বাৰ্তা চলি থকাৰ সময়তে ভাৰত-আমেৰিকাৰ মাজত এই চুক্তি সম্পন্ন হয়।
‘‘চিগ চ’ৱেৰ ৰাইফলৰ উদ্দেশ্য কি আমি নাজানো কাৰণ সাধাৰণতে ইয়াক ছেমি অট’মেটিক ৰাইফল হিচাপেহে ব্যৱহাৰ কৰা হয় পৰম্পৰাগত সেনাই ইয়াক ব্যৱহাৰ কমকৈ কৰে। ভাৰতে কেনেদৰে ব্যৱহাৰ কৰিব, কোন সৈন্য বাহিনীক দিব অথবা পৰিকল্পনা কি আমি নাজানো,’’ কালাচনিকোভ গ্ৰুপৰ প্ৰতিনিধি এগৰাকীয়ে কয়।
একে-২০৩ সন্দৰ্ভত মত ব্যক্ত কৰি প্ৰতিনিধি গৰাকীয়ে কয় যে, এতিয়াও যুদ্ধ ক্ষেত্ৰত এই ৰাইফল অতি সঠিক আৰু তীক্ষ্ণ।
‘‘এতিয়া এই সিদ্ধান্ত ভাৰতীয়া সেনা বাহিনীৰ হাতত তেওঁলোকে কি ৰাইফল ব্যৱহাৰ কৰিব বিচাৰে কিন্তু মই ভাৱো একে-২০৩ আটাইতকৈ সঠিক ৰাইফল,’’ তেওঁ লগতে কয়।
একে-২০৩ ক একে-৪৭ ৰ নতুন আৰু সংবৰ্ধিত সংস্কৰণ বুলি উল্লেখ কৰি ৰাছিয়াৰ প্ৰতিনিধি গৰাকীয়ে কয় যে ভাৰতীয় সেনাবাহিনী এই শ্ৰেণীৰ ৰাইফলৰ লগত চিনাকী আৰু অতি পাৰদৰ্শিতাৰে ইয়াক চলাব জানে।
উল্লেখযোগ্য যে, ভাৰত-ৰাছিয়াৰ যুটীয়া সামৰিক চুক্তি অনুসৰি উত্তৰ প্ৰদেশৰ আমেথিত একে-২০৩ ৰাইফল থলুৱাভাৱে উৎপাদন কৰাৰ বুজাপৰা হৈছিল।
ভাৰতীয় সেনাবাহিনীয়ে ২০১৯ চনত প্ৰথম বাৰৰ বাব আমেৰিকান SIGSauer ৰাইফল ব্যৱহাৰ কৰিছিল। ইতিমধ্যে সেনাবাহিনীয়ে ইয়াৰ বাবে গুলী ক্ৰয় কৰাও আৰম্ভ কৰিছে।
প্ৰায় ২১ লাখ ৰাউণ্ড SIGSauer ৰাইফলৰ গুলী ভাৰতে ক্ৰয় কৰাৰ বাবে অৰ্ডাৰ কৰিছে।
ভাৰতীয় সেনা বাহিনীৰ নৰ্থাৰ্ণ কামাণ্ডে প্ৰায় ১০,০০০ ত কৈ অধিক SIGSauer-৭১৬ ৰাইফল ব্যৱহাৰ কৰি আছে।
