অসম প্ৰদেশ যুৱ কংগ্ৰেছে আজি গুৱাহাটীত জেইল ভৰো আন্দোলন কৰাৰ সময়ত যুৱ কংগ্ৰেছৰ দুই শতাধিক নেতা-কৰ্মীক আৰক্ষীয়ে আটক কৰে।
নাগৰিকত্ব সংশোধনী আইন বাতিল আৰু বিনাচৰ্তে যুৱ কংগ্ৰেছৰ সভাপতি কামৰুল ইছলাম, জুৱেৰ আনমকে ধৰি যুৱ কংগ্ৰেছৰ অন্যান্য সদস্যসকলক মুক্তি দিয়াৰ দাবীৰে সংগঠনটোৱে জেল ভৰো আন্দোলনৰ কাৰ্য্যসূচী লৈছিল।
আন্দোলনকাৰীসকলে মানবেন্দ্ৰ শৰ্মা কম্প্লেক্সৰ পৰা প্ৰতিবাদী সমদল বাহিৰ কৰিবলৈ লওঁতেই আৰক্ষীয়ে বাধা দিয়ে।
অলপ পিছতে প্ৰতিবাদকাৰী আৰু আৰক্ষীৰ মাজত হতাহতিৰ সৃষ্টি হয় আৰু তাৰ পিছতে দিচপুৰ আৰক্ষীয়ে প্ৰতিবাদকাৰী যুৱ কংগ্ৰেছৰ নেতা-কৰ্মীসকলক টানি-আঁজুৰি চোঁচৰাই লৈ যায়।
আটক কৰাসকলৰ ভিতৰত আছে ভাৰতীয় জাতীয় যুৱ কংগ্ৰেছৰ সভাপতি শ্ৰী নিবাস, প্ৰদেশ যুৱ কংগ্ৰেছৰ উপ-সভাপতি, সাধাৰণ সম্পাদককে ধৰি দুই শতাধিক নেতা-কৰ্মী।
ভাৰতীয় জাতীয় যুৱ কংগ্ৰেছৰ সভাপতি শ্ৰী নিবাসে কয়, “এইখন চৰকাৰ স্বেচ্ছাচাৰী চৰকাৰ। যিয়েই এই চৰকাৰৰ বিৰুদ্ধে সবলভাৱে মাত মাতিছে তেওঁকে এই গ্ৰেপ্তাৰ কৰি জেইলত ভৰায়। “কা”-ৰ বিৰুদ্ধে সক্ৰিয়ভাৱে আন্দোলন কৰা যুৱকসকলকো গ্ৰেপ্তাৰ কৰিছে।”
