যোৰহাট জিলাৰ টীয়কত আজি আছুকৰ্মী আৰু অগপকৰ্মীৰ মাজত এখন খণ্ডযুদ্ধ লাগে।
বিয়লি অনুষ্ঠিত অগপৰ এখন কৰ্মীসভালৈ অহা অগপৰ সভাপতি তথা কৃষি মন্ত্ৰী অতুল বৰাক আছুৱে ক’লা পতাকা দেখুৱাবলৈ যাওঁতেই দুয়োপক্ষৰ এইদৰে হতাহতি লাগে।
দুয়োপক্ষৰ খণ্ডযুদ্ধৰ ফলত মাজতে আবদ্ধ হৈ পৰে সভাপতি অতুল বৰা।
আছুকৰ্মীসকলে ক’লা পতাকা দেখুওৱাৰ লগতে অতুল বৰা গ’ বেক ধ্বনি দি পৰিৱেশটো উত্তাল কৰি তোলে।
কেৱল অতুল বৰাকে ক’লা পতাকা দেখুওৱা নহয়, অগপৰ কৰ্মী আৰু সমৰ্থকসকলো আছুকৰ্মীৰ তীব্ৰ প্ৰতিবাদৰ সন্মুখীন হয়।
আনহাতে এই খণ্ডযুদ্ধৰ সময়ত অগপৰ কৰ্মীসকলে ইটা দলিওৱাৰ অভিযোগ তুলিছে আছু কৰ্মীসকলে।
অৱশেষত আৰক্ষীৰ হস্তক্ষেপত অতুল বৰাসহ অগপৰ নেতা-কৰ্মীসকল কৰ্মীসভাত প্ৰৱেশ কৰিবলৈ সক্ষম হয়।
আজিৰ ঘটনাটোৱে টীয়কত এক প্ৰকাৰৰ উত্তেজনাৰ পৰিৱেশ সৃষ্টি কৰে।
