১৮ বছৰৰ বিপৰীতে দেশত এতিয়াৰে পৰা ধূমপান সেৱনৰ বৈধ বয়স ২১ বছৰলৈ বৃদ্ধি কৰা হৈছে। ২৩ ফেব্ৰুৱাৰি অৰ্থাৎ দেওবাৰে কেন্দ্ৰীয় স্বাস্থ্য মন্ত্ৰীয়ে এই কথা ঘোষণা কৰে।
যিসকলৰ বয়স ২১ বছৰ তেওঁলোকেহে বৈধভাৱে ধূমপান সেৱন কৰিব পাৰিব বুলি মন্ত্ৰ্যালয়ে প্ৰস্তাৱ গ্ৰহণ কৰে বুলি এটা সূত্ৰৰ পৰা জানিব পৰা গৈছে।
বৰ্তমান, ভাৰতত ১৮ বছৰৰ ওপৰৰ লোকেহে বৈধভাৱে ধূমপান সেৱন কৰিব পাৰে।
চিগাৰেট আৰু অন্যান্য ধঁপাতজাতীয় সামগ্ৰী আইন (COTPA)ৰ অধীনতে সমগ্ৰ দেশত প্ৰযোজ্য হোৱাকৈ এই সিদ্ধান্ত গ্ৰহণ কৰা হয়।
জানিব পৰা মতে এই সিদ্ধান্তটো লোৱাৰ ক্ষেত্ৰত স্বাস্থ্য মন্ত্ৰ্যালয়ে শীৰ্ষ বিষয়াসকলৰ সৈতে কেইবাবাৰো বৈঠকত মিলিত হ’বলগীয়া হৈছে।
‘ধঁপাতজাতীয় সামগ্ৰীৰ নিয়ন্ত্ৰণত সংশোধন ঘটাবলৈ এখন আইনী উপদল গঠন কৰা হৈছিল। মন্ত্ৰ্যালয়ক আমি আমাৰ পৰামৰ্শ প্ৰদান কৰিছো’। স্বাস্থ্য মন্ত্ৰ্যালয়ৰ এগৰাকী বিষয়াই এই কথা জানিবলৈ দিয়ে।
তেওঁ লগতে কয়, ’২১ বছৰ কৰাৰ উপৰি এই নিয়ম ভংগ কৰা লোকৰ জৰিমনাৰ হাৰ বৃদ্ধি কৰিবলৈও আমি পৰামৰ্শ আগবঢ়াইছো’।
‘২১ বছৰলৈ বৃদ্ধি কৰাৰ সিদ্ধান্তই যুৱ প্ৰজন্মৰ মাজত ধূমপান সেৱনত কিছু পৰিমানে হ’লেও বাধা জন্মাব বুলি ধাৰণা কৰা হৈছে’, এইদৰে কয় বিষয়াগৰাকীয়ে।
উল্লেখ্য যে ৰাজহুৱা স্থানত ধূমপান কৰিলে নিয়ম অনুসাৰে ২০০ টকা জৰিমনা যদিও স্বাস্থ্য মন্ত্ৰ্যালয়ে এই জৰিমনাৰ হাৰ বৃদ্ধি কৰাৰ ক্ষেত্ৰতো চিন্তা-চৰ্চা চলাই থকা বুলি জানিব পৰা গৈছে।
