মহাৰাষ্ট্ৰত পাকিস্তানী আৰু বাংলাদেশী অনুপ্ৰৱেশকাৰীৰ বিৰুদ্ধে মহাৰাষ্ট্ৰ নৱনিৰ্মাণ সেনা (এম এন এছ)ই অভিযান অব্যাহত ৰাখিছে।
ঔৰংগাবাদত এমএনএছৰ ফালৰ পৰা এখন পোষ্টাৰ লগোৱা হৈছে য’ত লিখা আছে যে অনুপ্ৰৱেশকাৰীৰ খৱৰ দিয়াজনক ৫০০০ টকা পুৰষ্কাৰ দিয়া হ’ব।
ইয়াৰ পূৰ্বে এম এন এছৰ অধ্যক্ষ ৰাজ থাকৰে এটা সমদল উলিয়াই অনুপ্ৱেশকাৰীক বহিস্কাৰ কৰাৰ দাবী তুলিছিল।
ৰাজ থাকৰে কয় যে অবৈধভাৱে পাকিস্তান, বাংলাদেশ আৰু আফগানিস্তানৰ পৰা আহি ভাৰতত বসবাস কৰা লোকসকলক তুলি বাহিৰলৈ খেদি পঠোৱা উচিত। কিয়নো ই দেশত অপ্ৰয়োজনীয় এক বোজা।
তেওঁ কয় যে এই বিদেশীসকল আহে আৰু দেশজুৰি বিয়পি পৰে। ৰাজ্যসমূহক ইয়াৰ বোজা বহন কৰিবলগীয়া হয়। তেওঁলোকে স্থানীয় যুৱকৰ চাকৰি কাঢ়ি লয়।
শৰণাৰ্থী সন্দৰ্ভত মোদী চৰকাৰক আক্ৰমণৰ লক্ষ্য কৰি ৰাজ থাকৰে কয় যে এই খেল খেলাৰ বাবে মই গৃহ মন্ত্ৰী অমিত শ্বাহক ধন্যবাদ দিছো। এটা মাত্ৰ পদক্ষপতে (কা-এন আৰ চি) দেশত উদ্ভৱ হোৱা আৰ্থিক সংকটৰ পৰা লোকৰ দৃষ্টি আঁতৰি গ’ল।
থাকেৰই প্ৰশ্ন কৰে যে ১৩৫ কোটি জনসংখ্যাৰ দেশখনলৈ বাহিৰৰ পৰা লোক অনাৰ কি প্ৰয়োজন আছিল? নে ভাৰত শৰণাৰ্থীৰ বাবে এক ধৰ্মশালা হৈ পৰিছে।
ৰাজ থাকৰে লগতে কয় যে চৰকাৰে প্ৰথমতে এইটো নিৰ্ণয় কৰিব লাগে যে বহু যুগ ধৰি দেশখনত বাস কৰা ভাৰতীয় মুছলমান কোন আৰু পাকিস্তান, বাংলাদেশ আৰু আফগানিস্তানৰ পৰা অহা বিদেশী কোন।
তেওঁ কয় যে এইটো নিৰ্ণয় হোৱাৰ পাছত তেওঁলোকক দেশৰ পৰা বাহিৰ কৰি দিয়া উচিত।
‘’মই বুজি পোৱা নাই য’ত আমাৰ সমস্যাসমূহ সমাধান হোৱা নাই,তেনেক্ষেত্ৰত আমি কিয় শৰণাৰ্থীসকলক লৈ তেওঁলোকক নাগৰিকত্ব দিবলৈ গৈছো? নে শৰণাৰ্থীসকলক আশ্ৰয় দিয়াৰ বাবে কেবল আমিয়েই আছো? চৰকাৰে প্ৰথমতে নিজৰ লোকৰ কথা চিন্তা কৰক,’’-থাকৰে কয়।
