কেৰালাত নতুন চৰকাৰ গঠন হোৱাৰ পিছতেই মহিলা আৰু শিশুসকলৰ কল্যাণৰ বাবে কেইবাটাও ডাঙৰ পদক্ষেপ গ্ৰহণ কৰা হৈছে। ইউডিএফ চৰকাৰে এতিয়া স্কুলীয়া ছাত্ৰীসকলৰ বাবে এক ব্যতিক্ৰমি উদ্যোগ হাতত লৈছে। ছাত্ৰীসকলৰ স্বাস্থ্য আৰু সুবিধাৰ প্ৰতি লক্ষ্য ৰাখি চৰকাৰে প্ৰতি মাহে তিনি দিন পৰ্যন্ত ঋতুস্ৰাৱৰ ছুটি দিয়াৰ পৰিকল্পনা কৰিছে। ৰাজ্যৰ বিধানসভাত এই গুৰুত্বপূৰ্ণ প্ৰস্তাৱটো ডাঙি ধৰিছে ৰাজ্যপাল ৰাজেন্দ্ৰ বিশ্বনাথ আৰলেকাৰে। তেওঁ কয় যে এই নতুন নিয়মে শিক্ষা প্ৰতিষ্ঠান আৰু সাৰ্বজনীন স্থানসমূহ ছোৱালী আৰু মহিলাসকলৰ বাবে অধিক সহজ তথা অনুকূল কৰি তুলিব।
অৱশ্যে স্কুল বন্ধ থাকিলে ছাত্ৰীসকলৰ পঢ়া-শুনাত ব্যাঘাত জন্মিব পাৰে বুলি একাংশই চিন্তা প্ৰকাশ কৰিছে। কিন্তু এই সমস্যাৰো এক সুন্দৰ সমাধান উলিয়াইছে নতুন চৰকাৰে। ছুটি লোৱাৰ বাবে ছাত্ৰীসকল যাতে পঢ়া-শুনাত পিছপৰি নাযায়, তাৰ বাবে সাপ্তাহিক বন্ধৰ দিনবোৰত অতিৰিক্ত ক্লাছৰ ব্যৱস্থা কৰা হ’ব। ইয়াৰ উপৰি চৰকাৰে শিশুৰ যতন লোৱাৰ ওপৰতো বিশেষ গুৰুত্ব আৰোপ কৰিছে। ১৯৬১ চনৰ মাতৃত্বকালীন সুবিধা আইনৰ অধীনত কৰা নতুন পৰিকল্পনা অনুসৰি, যিবোৰ চৰকাৰী কাৰ্যালয়, উদ্যোগ, আইটি পাৰ্ক বা কৰ্মক্ষেত্ৰত ৫০ জনতকৈ অধিক কৰ্মচাৰী আছে, সেই সকলোবোৰ ঠাইতে সুৰক্ষিত আৰু উন্নত মানদণ্ডৰ চাইল্ড কেয়াৰ চেন্টাৰ বা শিশু যতন কেন্দ্ৰ গঢ়ি তোলা হ’ব।
মহিলাসকলৰ বাবে ৰাজ্যপালগৰাকীয়ে আন কেইবাটাও গুৰুত্বপূৰ্ণ আঁচনিৰ কথা ঘোষণা কৰিছে। তেওঁ জনায় যে কৰ্মক্ষেত্ৰত এতিয়াৰে পৰা মহিলাসকলক পুৰুষৰ সমান হাৰত দৰমহা দিয়াৰ ব্যৱস্থা কৰা হ’ব। লগতে কৰ্মৰত মহিলাসকলৰ বাবে ছয় মাহৰ মাতৃত্বকালীন ছুটিৰ ব্যৱস্থা কৰা হ’ব। কেৰালাৰ প্ৰতিখন প্ৰধান চহৰতে পৰ্যাপ্ত পৰিমাণে সাৰ্বজনীন শৌচাগাৰ নিৰ্মাণ কৰা হ’ব। ইয়াৰ উপৰি মহিলা আৰু ছাত্ৰীসকলে যাতে চেনিটাৰী নেপকিন, জোতা আৰু অন্যান্য প্ৰয়োজনীয় সামগ্ৰী অতি সহজে লাভ কৰিব পাৰে, তাৰ বাবেও চৰকাৰে সকলো ধৰণৰ প্ৰয়োজনীয় ব্যৱস্থা গ্ৰহণ কৰিব।
