গোৱালপৰীয়া লোকগীতত মানৱ দেহা ‘মাটিৰ ভাণ্ড’ বুলি থাকিলেও মানৱ দেহা আচলতে পানীৰহে ভাণ্ড। মানুহৰ শৰীৰৰ ৭৫ শতাংশই পানী। আনহাতে পৃথিৱীৰ প্ৰায় ৭১ শতাংশ পানী।
পৃথিৱী পৃষ্ঠৰ এই পানী বছৰ বছৰ ধৰি মানুহে প্ৰকৃতিৰ পৰা বিনামূলীয়াকৈ পাই আহিছে। তথাপিও বেছিভাগ সময়তে আমি পানীৰ বাবে ধন দিবলগীয়া হয়। বিশেষকৈ সুস্বাদু পানীৰ বাবে।
মানুহৰ অস্তিত্বৰ বাবে পানী এক অপৰিহাৰ্য উপাদান। ই হজম শক্তিৰ পৰা আৰম্ভ কৰি শাৰীৰিক বৃদ্ধিলৈকে সকলোতে সহায় কৰে। সেয়েহে প্ৰতিদিনে কমেও ৩ লিটাৰ পানী খাবলৈ চিকিৎসকে পৰামৰ্শ দিয়ে। ইয়াৰ প্ৰয়োজনীয়তা অনস্বীকাৰ্য, কেৱল মানুহৰ খোৱাৰ বাবেই নহয়, প্ৰাণী আৰু উদ্ভিদ জগতৰ অস্তিত্বৰ বাবেও পানী অপৰিহাৰ্য। পৃথিৱীৰ সকলো ঠাইতে পানী উপলব্ধ হ’লেও বিশুদ্ধ খোৱাপানীৰ পৰিমাণ তাৰ তুলনাত তেনেই তাকৰ।
সাধাৰণতে এক লিটাৰ পানীৰ বটলৰ দাম আকাৰ আৰু কোম্পানীৰ ওপৰত নিৰ্ভৰ কৰি ২০ টকাৰ পৰা ৩০ টকালৈকে হয়। কিন্তু জাপানত বটলত ভৰোৱা এটা পানীৰ বটলৰ দাম শুনিলে চকু কপালত উঠিব আপোনাৰ।
বিশ্বৰ বজাৰত খোৱাপানীৰ বটল বিক্ৰী আৰু উৎপাদন কৰা কোম্পানীসমূহৰ ভিতৰত অন্যতম হৈছে জাপানৰ ফিলিকো জুৱেলাৰী ৱাটাৰ। জাপানত এই পানীৰ এক লিটাৰৰ এটা বটল কিনিবলৈ হ’লে ১৩৯০ ডলাৰ দিব লাগিব। যিটো ভাৰতীয় মূল্যত প্ৰায় ১ লাখ ১৬ হাজাৰ টকা।
এই কোম্পানীটো পানীৰ বিশুদ্ধতাৰ বাবেও পৰিচিত, লগতে পানীৰ বটলৰ অসাধাৰণ পেকেজিঙৰ বাবেও পৰিচিত। আচলতে এই কোম্পানীটোৰ বটলবোৰ স্বৰভস্কি স্ফটিকেৰে সজাই তোলা হৈছে। এই বটলবোৰ মিহি গহনাৰ টুকুৰাৰে তৈয়াৰী ডিজাইনেৰে সজাই তোলা হয়। ফিলিকো জুৱেলাৰীয়ে বিক্ৰী কৰা পানী জাপানৰ কোবেত অৱস্থিত এটা প্ৰাকৃতিক উৎসৰ পৰা লোৱা হয়। এই পানী নিজস্ব কিছুমান গুণৰ বাবে বিখ্যাত। কোৱা হয় যে এই পানী খালে শৰীৰটো সুস্থ হৈ থকাৰ লগতে ছালখনো সুন্দৰ হৈ থাকে।
