শেহতীয়াকৈ কোভিডত আক্ৰান্ত হোৱা অসমৰ প্ৰাক্তন মুখ্যমন্ত্ৰী তৰুণ গগৈৰ স্বাস্থ্যৰ পৰ্যবেক্ষণৰ বাবে চৰকাৰে এখন কমিটি গঠন কৰি দিছে।
স্বাস্থ্য মন্ত্ৰী হিমন্ত বিশ্ব শৰ্মাই টুইটাৰ যোগে এই কথা প্ৰকাশ কৰিছে।
হৃদৰোগ বিশেষজ্ঞ ডাঃ যোগেশ শৰ্মাৰ নেতৃত্বত গঠন কৰি দিয়া কমিটি খনত আছে ক্ৰমে এণ্ডোক্ৰাইন’লজি বিভাগৰ সহযোগী অধ্যাপক ডাঃ উমা কাইমল শইকীয়া, কাৰ্ডিওল’জি বিভাগৰ সহযোগী অধ্যাপক ডাঃ ফাহিন ইকবাল,মেডিচিন বিভাগৰ সহকাৰী অধ্যাপক ডাঃ ভাস্কৰ ঠাকুৰীয়া,শল্য চিকিৎসা বিভাগৰ সহকাৰী অধ্যাপক ডাঃ আৰ দাস,এনান্থেছিয়া বিভাগৰ পঞ্জীয়ক ডাঃ বিশ্বজিৎ তালুকদাৰ,মেডিচিনৰ ডাঃ জয়শ্ৰী মেধি,মেডিচিনৰ আৱাসীক চিকিৎসক ডাঃ মইনুল ইছলাম আৰু ডাঃ বুবু গগৈ।প্ৰাক্তন মুখ্যমন্ত্ৰী তৰুণ গগৈক বৰ্তমান গুৱাহাটী চিকিৎসা মহাবিদ্যালয়ৰ নিউ পেয়িং কেবিনত ৰখার দিহা কৰা হৈছে।
উল্লেখ্য টুইটাৰযোগে প্ৰাক্তন মুখ্য মন্ত্ৰী গগৈয়ে নিজে ক’ৰ’না ভাইৰাছৰ দ্বাৰা সংক্ৰমিত হোৱা বুলি প্ৰকাশ কৰিছিল। ‘‘কালি মই কোভিড-১৯ প’জিটিভ হিচাপে চিহ্নিত হৈছো।
বিগত সময়ছোৱাত যিসকল লোক মোৰ সংস্পৰ্শলৈ আহিছে তেওঁলোকে ক’ৰ’না পৰীক্ষা কৰা উচিত,’’ তৰুণ গগৈয়ে এইদৰে টুইট কৰিছিল।।
বিগত সময়ছোৱাত তৰুণ গগৈয়ে ২০২১ চনৰ বিধানসভা নিৰ্বাচনৰ প্ৰস্তুতিৰ বাবে বিভিন্ন অঞ্চল ভ্ৰমণ কৰিছিল আৰু সেই সময়তে তেওঁ কোনোবা ক’ৰ’না সংক্ৰমিত লোকৰ সংস্পৰ্শলৈ অহা বুলি সন্দেহ কৰা হৈছে।
তৰুণ গগৈ চাৰিদিন ধৰি জ্বৰত আক্ৰান্ত হৈ আছিল যাৰবাবে তেওঁ এইকেইদিন কোনো সভা সমিতিত অংশগ্ৰহণ কৰিব পৰা নাছিল।
কিছুদিন পূৰ্বে গগৈয়ে অজন্তা নেওগৰ সৈতে বৈঠকত অংশগ্ৰহণ কৰিছিল। অজন্তা নেওগৰ কোভিড ফলাফল প’জিটিভ অহাত তৰুণ গগৈয়ে সন্দেহবশতঃ কোভিড টেষ্ট কৰোৱাত নিশা ফলাফল প’জিটিভ আহে।
তৰুণ গগৈ কোভিড প’জিটিভ হলেও তেওঁৰ পত্নী ডলি গগৈৰ ফলাফল নিগেটিভ আহে।
উল্লেখযোগ্য যে, মঙলবাৰে কংগ্ৰেছৰ প্ৰাক্তন মন্ত্ৰী অজন্তা নেওগ, পশ্চিম গুৱাহাটী বিধানসভা সমষ্টিৰ বিধায়ক ৰমেন্দ্ৰ নাৰায়ণ কলিতাৰ দেহত ক’ৰ’না ভাইৰাছৰ উপস্থিতি ধৰা পৰিছিল।
অজন্তা নেওগক গুৱাহাটী চিকিৎসা মহাবিদ্যালয় হস্পিটেলত ভৰ্তি কৰোৱা হৈছিল।
ইয়াৰ পূৰ্বে ৰাজ্যসভাৰ সাংসদ কামাখ্যা প্ৰসাদ তাছাৰ শৰীৰতো ক’ৰ’না ভাইৰাছৰ উপস্থিতি ধৰা পৰিছিল।
তাছাকো যোৰহাট চিকিৎসা মহাবিদ্যালয় হস্পিটেলত ভৰ্তি কৰোৱা হৈছিল।
