ফোন এটা কৰিবলৈ দুদিন নদী পাৰ হ’বলগীয়া হৈছিল; টেষ্টত দৃষ্টি কাঢ়িলে দুৰ্গম গাঁৱৰ এই বলাৰে

অষ্ট্ৰেলিয়াৰ বিৰুদ্ধে অভিষেক মেচ খেলিছে। তাকো এডিলেইডত। প্ৰথম দিনাই সকলোৰে দৃষ্টি কাঢ়িলে ৱেষ্ট ইণ্ডিজৰ শ্বামাৰ জোচেফ। তেওঁ প্ৰথমে এঘাৰ নম্বৰত বেটিং কৰিবলৈ নামি আহি গুৰুত্বপূৰ্ণ ৩৬ ৰান সংগ্ৰহ কৰে। ইয়াৰ পিছত তেওঁ বলিঙত ২টা উইকেট দখল কৰে।

প্ৰথমে বেটিং কৰি ৱেষ্ট ইণ্ডিজে শ্বামাৰৰ গুৰুত্বপূৰ্ণ বৰঙণিৰে ১৮৮ ৰান সংগ্ৰহ কৰি ইনিংছৰ অন্ত পেলায়। দিনটোৰ শেষত অষ্ট্ৰেলিয়াই ২টা উইকেট হেৰুৱাই ৫৯ ৰান সংগ্ৰহ কৰে।

কেৰিবিয়ান দ্বীপপুঞ্জৰ এখন দুৰ্গম গাঁৱত জন্মগ্ৰহণ কৰিছিল শ্বামাৰে। ২০২৩ চনলৈকে তেওঁ প্ৰতিযোগিতামূলক ক্ৰিকেট খেলা নাছিল। শ্বামাৰৰ জন্ম হৈছিল গায়ানা দ্বীপৰ বাৰাকাৰা নামৰ এখন গাঁৱত। পাঁচজন ভাতৃ আৰু তিনিজনী ভগ্নীৰ এটা ডাঙৰ পৰিয়ালত তেওঁ জন্মগ্ৰহণ কৰিছিল।

লগতে পঢ়কঃ বাহ আফগানিস্তান! চিন্নাস্বামীত সৰ্বকালৰ শ্ৰেষ্ঠ টী-২০! দুটা ছুপাৰ অভাৰৰ অন্তত বিজয় ভাৰতৰ

২০১৮ চনলৈকে সেই গাঁৱত ফোন বা ইণ্টাৰনেট নাছিল। সেই সকলোবোৰ নাৱেৰে দুদিনৰ যাত্ৰাৰ পিছত পোৱা গৈছিল। ইয়াৰ পিছতহে শ্বামাৰে ক্ৰিকেটৰ সোৱাদ পাইছিল। আগতে গাঁৱত টেপ বল ক্ৰিকেট খেলিছিল। খুব কম ঘৰতে টিভি আছিল। শ্বামাৰে তাতেই কাৰ্টলী এম্ব্ৰ’জ আৰু কৰ্টনী ৱালছৰ খেল চাইছিল।

শ্বামাৰে পৰিয়ালটোক আৰ্থিকভাৱে সহায় কৰাৰ বাবে নিৰাপত্তাৰক্ষী হিচাপেও কাম কৰিছিল। তেওঁৰ দুবছৰীয়া ল’ৰা এটাও আছে। কিন্তু সেই দায়িত্ব কান্ধত বহন কৰাৰ পিছতো খেলৰ প্ৰতি শ্বামাৰৰ আকৰ্ষণ কমি যোৱা নাছিল। সেই আকৰ্ষণৰ বাবেই হঠাৎ চাকৰি এৰি ক্ৰিকেটত মনোনিৱেশ কৰে।

প্ৰথম শ্ৰেণীৰ দল গুয়েনা হাৰ্পি ঈগলছত স্থান লাভ কৰে শ্বামাৰে। তেওঁ ২০২৩ চনত সেই দলৰ হৈ তিনিখন মেচত ৯টা উইকেট দখল কৰিছিল। তেওঁৰ প্ৰতিভাই নিৰ্বাচকসকলৰ দৃষ্টি আকৰ্ষণ কৰিছিল। অৱশেষত ৱেষ্ট ইণ্ডিজ দলত স্থান লাভ কৰিলে শ্বামাৰে। তেওঁ দক্ষিণ আফ্ৰিকাৰ এ দলৰ বিৰুদ্ধেও খেলিছিল। সেই শৃংখলাত তেওঁ সৰ্বাধিক উইকেট দখল কৰিছিল। এইবাৰ অষ্ট্ৰেলিয়াৰ বিৰুদ্ধে টেষ্ট শৃংখলাত স্থান লাভ কৰিলে।

বুধবাৰৰ পৰা আৰম্ভ হৈছে অষ্ট্ৰেলিয়ান বনাম ৱেষ্ট ইণ্ডিজৰ প্ৰথমখন টেষ্ট। এই মেচত প্ৰথমবাৰৰ বাবে অ’পেনাৰ হিচাপে খেলিছিল ষ্টিভ স্মিথে। শ্বামাৰে স্মিথক আউট কৰি নিজৰ প্ৰথমটো উইকেট ল’লে। টেষ্টত সেইটোও শ্বামাৰৰ প্ৰথমটো বল। মাৰ্নাছ লাবুচেনৰ উইকেটতো তেওঁ লয়। প্ৰথম দিনটোৰ শেষত ৱেষ্ট ইণ্ডিজক যুঁজখনত বৰ্তাই ৰাখিছে শ্বামাৰেই।

লগতে পঢ়কঃৰাজহুৱা স্থানত কাৰোবাক ‘পাগল’ বুলি কোৱাটো কোনো অপৰাধ নহয়: এলাহাবাদ উচ্চ ন্যায়ালয়

তেওঁ যেতিয়া বেটিং কৰিবলৈ ওলাই আহিছিল তেতিয়া ৱেষ্ট ইণ্ডিজে ৯ উইকেটত ১৩৩ ৰান কৰিছিল। একাদশ বেটছমেন হিচাপে বেটিং কৰি শ্বামাৰে ৪১টা বলত ৩৬ ৰান সংগ্ৰহ কৰি দলটোক ১৮৮ ৰানলৈ লৈ যায়। সংগী আছিল কেমাৰ ৰ’চ। তেওঁ ১৭ ৰানত অপৰাজিত হৈ থাকে। ৱেষ্ট ইণ্ডিজৰ হৈ সৰ্বাধিক ৰান সংগ্ৰহ কৰে কিৰ্ক মেকেঞ্জীয়ে। তেওঁ ৫০ ৰান সংগ্ৰহ কৰে।