ৰাজহুৱা স্থানত কাৰোবাক ‘পাগল’ বুলি কোৱাটো অভদ্ৰতা হ’ব পাৰে, কিন্তু ভাৰতীয় দণ্ডবিধিৰ ৫০৪ নং ধাৰাত অৰ্থাৎ শান্তি ভংগ কৰাৰ উদ্দেশ্যেৰে অপমানৰ অধীনত ইয়াক অপৰাধ বুলি ক’ব নোৱাৰি। স্পষ্ট কৰি দিলে এলাহাবাদ উচ্চ ন্যায়ালয়ে।
এই গোচৰত উচ্চতম ন্যায়ালয়ৰ পুৰণি গোচৰৰ ৰায়ৰ কথা উল্লেখ কৰে উচ্চ ন্যায়ালয়ে। সেই গোচৰৰ ৰায়দানত উচ্চতম ন্যায়ালয়ে কৈছিল যে ভাৰতীয় দণ্ডবিধিৰ এই ধাৰা অনুসৰি কোনো ব্যক্তিক তেওঁৰ শান্তি বিঘ্নিত কৰাৰ উদ্দেশ্যেৰে অপমান কৰাটো অপৰাধ বুলি গণ্য কৰা হ’ব।
কিন্তু, বৰ্তমানৰ গোচৰটোত পাগল বুলি কোৱাটো আছিল এক অনিচ্ছাকৃত স্বতঃস্ফূৰ্ত মন্তব্য। অভিযুক্তৰ বিৰুদ্ধে আবেদনকাৰীয়ে উত্থাপন কৰা কেইবাটাও অভিযোগৰ প্ৰেক্ষাপটত তেওঁ এই মন্তব্য কৰে। এই ক্ষেত্ৰত শান্তি বিঘ্নিত কৰাৰ উদ্দেশ্য কোন ব্যক্তিৰ আছিল, সেয়া ক’ব পৰা নাযায়।
লগতে পঢ়কঃ বাহ আফগানিস্তান! চিন্নাস্বামীত সৰ্বকালৰ শ্ৰেষ্ঠ টী-২০! দুটা ছুপাৰ অভাৰৰ অন্তত বিজয় ভাৰতৰ
ন্যায়াধীশে কয়, “প্ৰায়ে, এনে মন্তব্য অনানুষ্ঠানিক পৰিৱেশত আকস্মিকভাৱে কৰা হয়। আনকি ই আকস্মিক কথা-বতৰাৰ অংশও হ’ব পাৰে, য’ত ইচ্ছাকৃতভাৱে শান্তি ভংগ কৰাৰ কোনো অপৰাধ নাথাকে। এনে মন্তব্য কৰা যিকোনো ব্যক্তিক অভদ্ৰ আৰু অনুপযুক্ত বুলি অভিহিত কৰিব পাৰি। কিন্তু ভাৰতীয় দণ্ডবিধিৰ ৫০৪ ধাৰাত ই অপৰাধ নহ’ব।”
বাৰাণসী জিলা দণ্ডাধীশ আদালতত এই গোচৰটো আৰম্ভ হৈছিল। প্ৰতিবন্ধী আৰু মানৱ অধিকাৰৰ ওপৰত কাম কৰা এজন অধিবক্তাই কিৰণ ছ’চাইটি নামৰ এটা সংগঠনে ধন আত্মসাৎ কৰাৰ অভিযোগ উত্থাপন কৰে। বিশেষভাৱে সক্ষম লোকৰ কল্যাণৰ নামত বহিঃৰাজ্যৰ পৰা ধন লোৱাৰ অভিযোগ উত্থাপন কৰিছিল।
তেওঁ কোম্পানীটোৰ সঞ্চালকৰ লগতে আন দহজনৰ বিৰুদ্ধে এজাহাৰ দাখিল কৰে। জিলা দণ্ডাধীশে গঠন কৰে এখন তদন্ত সমিতি। তদন্তকাৰীয়ে দুয়োপক্ষকে বৈঠকলৈ মাতিছিল। দাবী কৰা হৈছে যে কিৰণ ছ’চাইটিৰ সঞ্চালকগৰাকীয়ে উকীলজনক পাগল বুলি অপমান কৰিছিল।
ইয়াৰ পিছতে কিৰণ ছ’চাইটিৰ সঞ্চালকগৰাকীৰ বিৰুদ্ধে শান্তি ভংগৰ বাবে অপমান কৰা বুলি অভিযোগ উত্থাপন কৰে অধিবক্তাগৰাকীয়ে। ২০২১ চনত অধিবক্তাই দাখিল কৰা আবেদনৰ ভিত্তিত কিৰণ ছ’চাইটিৰ সঞ্চালকক দোষী সাব্যস্ত কৰে মুখ্য ন্যায়িক দণ্ডাধীশে।
লগতে পঢ়কঃঅসম লোক সেৱা আয়োগৰ ফলাফল ঘোষণাঃ এচিএছ তালিকাৰ শীৰ্ষত ৰছিকা ইছলাম
এই ৰায়ক এলাহাবাদ উচ্চ ন্যায়ালয়ত প্ৰত্যাহ্বান জনাইছিল কিৰণ ছ’চাইটিৰ সঞ্চালকে। উচ্চ ন্যায়ালয়ত তেওঁ কয় যে অধিবক্তাই তেওঁৰ বিৰুদ্ধে ভুৱা আৰু তুচ্ছ গোচৰ ৰুজু কৰিছিল। ইচ্ছাকৃতভাৱে তেওঁক অপমান কৰা বুলি কোনো প্ৰমাণ নাই। উচ্চ ন্যায়ালয়ে তেওঁলোকৰ যুক্তি মানি লৈ কয় যে কেৱল কাৰোবাক পাগল বুলি কোৱাটো ভাৰতীয় দণ্ডবিধিৰ অধীনত অপৰাধ নহয়।
