ৰাজস্থানৰ যোধপুৰত শনিবাৰে এক মৰ্মান্তিক ঘটনা সংঘটিত হৈছে। একেদিনাই বিবাহপাশত আবদ্ধ হ’বলগীয়া দুই ভগ্নীৰ বিয়াৰ মাত্ৰ কেইঘণ্টামান পূৰ্বে অস্বাভাৱিক মৃত্যু হোৱা ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে। মৃত ভগ্নীদ্বয়ক ২৫ বছৰীয়া শোভা আৰু ২৩ বছৰীয়া বিমলা বুলি চিনাক্ত কৰা হৈছে। উল্লেখযোগ্য যে তেওঁলোক দুয়ো এগৰাকী ব্যক্তিগত বিদ্যালয়ৰ শিক্ষয়িত্ৰী হিচাপে কৰ্মৰত আছিল। আনন্দ-উল্লাসৰ মাজতে এনেদৰে দুই কন্যাৰ মৃত্যু হোৱাত বিয়াৰ ঘৰখনত কান্দোনৰ ৰোল উঠিছে।
আৰক্ষীৰ প্ৰাথমিক তদন্ত অনুসৰি, কোনো বিষাক্ত দ্ৰব্য সেৱন কৰাৰ ফলতেই ভগ্নীদ্বয়ৰ মৃত্যু হোৱা বুলি সন্দেহ কৰা হৈছে। অৱশ্যে মৰণোত্তৰ পৰীক্ষাৰ প্ৰতিবেদন লাভ কৰাৰ পিছতহে মৃত্যুৰ প্ৰকৃত কাৰণ স্পষ্ট হ’ব বুলি আৰক্ষীয়ে জানিবলৈ দিছে। শনিবাৰে পুৱতি নিশা হঠাৎ দুই ভগ্নীৰ স্বাস্থ্যৰ অৱনতি ঘটাত পৰিয়ালৰ লোকে তেওঁলোকক ততাতৈয়াকৈ এখন ব্যক্তিগত চিকিৎসালয়লৈ লৈ যায় যদিও চিকিৎসকে তেওঁলোকক মৃত বুলি ঘোষণা কৰে।
ইফালে এই ঘটনাক কেন্দ্ৰ কৰি সৃষ্টি হৈছে তীব্ৰ ৰহস্যৰ। আৰক্ষীয়ে খবৰ পোৱাৰ পূৰ্বেই পৰিয়ালৰ লোকে মৃতদেহ দাহ কৰাৰ প্ৰস্তুতি চলাইছিল যদিও আৰক্ষীয়ে সময়মতে উপস্থিত হৈ মৃতদেহ দুটা নিজৰ জিম্মাত লয়। আনহাতে মৃত যুৱতী দুগৰাকীৰ মোমায়েক যশৱন্ত সিঙে এই ঘটনাক লৈ গুৰুতৰ অভিযোগ উত্থাপন কৰিছে। তেওঁৰ মতে, যুৱতীদ্বয়ৰ পিতৃৰ ফালৰ আত্মীয়সকলে এই বিয়াৰ বাবে তেওঁলোকক হেঁচা প্ৰয়োগ কৰিছিল। বিশেষকৈ যুৱতী দুগৰাকীৰ খুৰাকে পূৰ্বে ক্ষতিগ্ৰস্ত হোৱা এটা পৰিয়ালৰ সৈতে এই বিবাহৰ সম্বন্ধ জোৰ কৰি ঠিক কৰিছিল বুলি তেওঁ দাবী কৰিছে।
মোমায়েকৰ অভিযোগ অনুসৰি, খুৰাকৰ এনে মানসিক হেঁচা সহ্য কৰিব নোৱাৰিয়েই দুই ভগ্নীয়ে এই চৰম সিদ্ধান্ত গ্ৰহণ কৰিবলগীয়া হ’ল। বৰ্তমান আৰক্ষীয়ে এই সমগ্ৰ অভিযোগৰ ভিত্তিত তদন্ত চলাই আছে। আৰক্ষীয়ে ইতিমধ্যে এটা অস্বাভাৱিক মৃত্যুৰ গোচৰ ৰুজু কৰিছে আৰু মৰণোত্তৰ পৰীক্ষাৰ পিছত মৃতদেহ দুটা পৰিয়ালক চমজাই দিছে। এই শোকাবহ ঘটনাই বৰ্তমান যোধপুৰত তীব্ৰ প্ৰতিক্ৰিয়াৰ সৃষ্টি কৰিছে।
