তাজমহলত প্ৰৱেশ কৰিবলৈ জোতা খুলিব লাগে। লগতে তাত প্ৰৱেশ কৰাৰ সময়ত প্লাষ্টিকৰ জোতাৰ কভাৰ পিন্ধাটো বাধ্যতামূলক। এই স্মৃতিসৌধটো চাবলৈ প্ৰতিদিনে হাজাৰ হাজাৰ লোকে ভিৰ কৰে। সকলোৱে জোতাৰ কভাৰ পিন্ধিব লাগে।
কিন্তু জোতাৰ প্লাষ্টিকৰ কভাৰবোৰ যথাযথ ঠাইত পেলাই নিদিয়া মানুহ বহুত আছে। ফলত তাজমহল চৌহদত বহু প্লাষ্টিকৰ জোতাৰ কভাৰ ৰৈ গৈছে।
এনেদৰে অ’ত ত’ত সিচৰতি হৈ থকা জোতাৰ কভাৰ নিজৰ হাতেৰে চাফা কৰিলে এগৰাকী বিদেশী পৰ্যটকে। এই ঘটনাৰ ছবি ছ’চিয়েল মিডিয়াত বিয়পি পৰাৰ লগে লগে নেটিজেনসকলে বিষয়টোৰ ওপৰত আলোচনা কৰিবলৈ আৰম্ভ কৰিছে।
বিদেশী পৰ্যটকগৰাকীয়ে তাজমহল পৰিদৰ্শন কৰিবলৈ আহি তাজমহল চৌহদত ইফালে সিফালে সিঁচৰতি হৈ থকা প্লাষ্টিকৰ জোতাৰ কভাৰ বহুত দেখিলে। সেইবোৰ দেখি তেওঁ ৰৈ থাকিব নোৱাৰিলে।
সেই ছবি ছ’চিয়েল মিডিয়াত পোষ্ট কৰি বিদেশী মহিলাগৰাকীয়ে লিখিছে, “তাজমহল পৰিষ্কাৰ হ’ব লাগে।”
সেই ছবি ভাইৰেল হোৱাৰ লগে লগে নেটিজেনসকলে ভাৰতৰ প্ৰত্নতাত্ত্বিক জৰীপক সমালোচনা কৰে। এনে গাফিলতিৰ বাবে দেশৰ ভাবমূর্তি নষ্ট হোৱা বুলিও একাংশ নেটিজেনে অভিযোগ উত্থাপন কৰিছে৷
ইপিনে আগ্ৰা পৰ্যটন কল্যাণ চেম্বাৰৰ বিষয়া বিশাল শৰ্মাই এই ঘটনাৰ কাৰণ সাধাৰণ ৰাইজৰ সাধাৰণ জ্ঞানৰ অভাৱ বুলি কয়। এই ক্ষেত্ৰত তেওঁ দৰ্শকক অধিক দায়বদ্ধ হ’বলৈ পৰামৰ্শ দিয়ে। লগতে ভাৰতীয় প্ৰত্নতাত্ত্বিক জৰীপ বিভাগৰ কৰ্মচাৰীৰ গাফিলতিৰ কথাও স্বীকাৰ কৰে।
