এক পাশৱিক ঘটনাই জোকাৰি গৈছে সমগ্ৰ ত্ৰিপুৰাক।
ৰাজ্য খনৰ খোৱাই নামৰ অঞ্চলটোৰ বাসিন্দা প্ৰদীপ দেৱৰয়ে প্ৰথমে তেওঁৰ দুই কন্যাক চোকা অস্ত্ৰৰে আক্ৰমণ কৰে।
এই কাৰ্যত বাধা দিবলৈ যোৱা পত্নীকো লোক জনে আক্ৰমণ কৰাত পত্নী গুৰুতৰ ভাবে আহত হয়। পতিৰ আক্ৰমণত আহত হোৱা পত্নীয়ে কোনো মতে ঘৰৰ পৰা পলাই যাবলৈ সক্ষম হয়।
পিছত দেৱৰয়ে পত্নীক পিছে পিছে খেদি যায়। ৰাজপথেৰে দুয়ো দৌৰি থকাৰ সময়তে সেই স্থানত এখন অটো ৰিক্সা আহি উপস্থিত হয়।
প্ৰদীপ দেৱৰয়ে অটো খন ৰখাই অটোত থকা চালক আৰু আৰোহীসকলকো চোকা অস্ত্ৰৰে আক্ৰমণ কৰে।
ফলত ঘটনাস্থলীতে নিহত হয় চালক জনৰ লগতে আন এজন লোক।ইপিনে পিতৃৰ আক্ৰমণত আহত দুই কন্যা সন্তানৰো মৃত্যু ঘটে।
এই ঘটনাৰ খবৰ পোৱাৰ পিছতে খোৱাই থানাৰ আৰক্ষী বিষয়া সত্যজিৎ মল্লিকে ঘটনাস্থলীলৈ গৈ দেৱৰয়ক আটক কৰিবলৈ চেষ্টা চলায়।
দেৱৰয়ে আৰক্ষী বিষয়া জনকো আক্ৰমণ কৰাত তেওঁৰো মৃত্যু ঘটে। গুৰুতৰ ভাবে আহত দেৱৰয়ৰ পত্নীক চিকিৎসালয়ত ভৰ্তি কৰোৱা হৈছে।
তেওঁৰ অৱস্থা অতি সংকটজনক বুলি জানিব পৰা গৈছে।
আৰক্ষী সূত্ৰই প্ৰকাশ কৰা মতে পেছাত ৰাজমিস্ত্ৰী প্ৰদীপ দেৱৰয় মানসিক ভাবে বিকাৰগ্ৰস্ত হৈ পৰাৰ সন্দেহ কৰা হৈছে।
এই ঘটনাই ত্ৰিপুৰাত তীব্ৰ চাঞ্চল্যৰ সৃষ্টি কৰিছে।
