ঘৰৰ চালেৰে আকাশৰ তৰা লেখিব পাৰি। বৰষুণ দিলেই চালেৰে বাগৰি আহে নদী।ৰাতিপুৱালেই চিন্তা চৰুৰ তললৈ জুই যায় নে নাই…
এনে এশ এবুৰি সমস্যাৰে ভাৰাক্ৰান্ত পশ্চিমবংগৰ মাছমৰীয়া সন্তোষ দোলুই।
পশ্চিমবংগৰ সুন্দৰবনৰ কাষতে বাস কৰে মাছমৰীয়া সন্তোষে।
প্ৰতিদিনে পুৱাই টোপনিৰ পৰা উঠিয়েই সুন্দৰবনৰ জলাশয়ত কেকোঁৰা ধৰিবলৈ নগ’লে সন্তোষৰ ছজনীয়া পৰিয়ালটোৱে খাবলৈ নাপায়।
সেয়ে সুন্দৰবনৰ জলাশয়ত ঘঁৰিয়ালৰ ভয় আৰু হাবিৰ মাজত বাঘৰ ভয়কো নেওঁচি সন্তোষে সদায় কেকোঁৰা ধৰিবলৈ যায়।
সন্ধিয়া কেকোঁৰা বিক্ৰী কৰি ঘৰলৈ উভতি আহোতে সন্তোষে ছৰবেৰিয়া বজাৰত লটাৰীৰ টিকট কিনে।
কিন্তু কোনো দিনে লটাৰীৰ টিকটত পুৰস্কাৰ লগা নাছিল সন্তোষৰ।
দিনটোত কেকোঁৰা বেচি পায় সামান্য কেইটামান টকা। তাৰে পৰাই আকৌ লটাৰীৰ টিকট কাটি পইচা খৰচ কৰা বাবে সদায় ঘৈণীয়েকৰ বকনি শুনিবলগীয়া হয় সন্তোষে।
সিদিনাও নিশা লটাৰীৰ টিকট কটাৰ বাবে ঘৈণীয়েকৰ গালি খাইছিল সন্তোষে।
তথাপি ঘৰলৈ ওভোতাৰ সময়ত কিনিছিল বিহাৰ চৰকাৰৰ এখন লটাৰীৰ টিকট।
মঙলবাৰে কিনা টিকট খনৰ ফলাফল আজি ওলাল।লটাৰীৰ টিকট কাটিম বুলি গৈ সন্তোষে অভ্যাসবশতঃ আগতে কটা টিকটৰ ফলাফল এবাৰ মিলাই চালে।
কিন্তু এয়া কি!বিহাৰ চৰকাৰৰ টিকট খনত দেখো প্ৰথম পুৰস্কাৰ এক কোটি টকাই তেওঁ লাভ কৰিছে! ঘৰলৈ দৌৰি আহিল সন্তোষ।
ইতিমধ্যে গাওঁত সন্তোষ কোটিপতি হোৱাৰ কথা ৰজনজনাই গৈছে।
কোটিপতি সন্তোষক সাংবাদিকৰ প্ৰশ্ন—‘এই টকাৰে কি কৰিব?’ সন্তোষৰ উত্তৰ—‘ঘৰটো দেখিছেই, প্ৰথমে ঘৰটো সাজিম।বাকী খিনি টকা চাৰিজনী ছোৱালীৰে শিক্ষাৰ নামত খৰচ কৰিম’।
