মুছলমান পুৰুষে এগৰাকীতকৈ অধিক পত্নীক বিয়া কৰাবলৈ কোনো আইনী বাধা নাই।এই কথা পুনৰ এবাৰ স্পষ্ট কৰি দিলে এলাহাবাদ উচ্চ ন্যায়ালয়ে। বিবাহৰ এটা গোচৰত উচ্চ ন্যায়ালয়ে পৰ্যবেক্ষণ কৰিছিল, “এজন মুছলমান পুৰুষে ইচ্ছা কৰিলে চাৰিগৰাকী পত্নীলৈকে বিবাহপাশত আবদ্ধ হ’ব পাৰে।ইয়াৰ একমাত্ৰ চৰ্ত হ’ল তেওঁলোকৰ আচৰণ ভাল হ’ব লাগে।”
মূল গোচৰটো ২০২০ চনৰ। মোৰাদাবাদৰ ফুৰকান নামৰ এজন যুৱকৰ বিৰুদ্ধে দ্বিতীয় পত্নীয়ে গোচৰ ৰুজু কৰিছিল। মহিলাগৰাকীয়ে অভিযোগ কৰিছিল যে ফুৰকানে প্ৰথম বিবাহ লুকুৱাই তেওঁক বিয়া কৰাইছিল। আনকি বিয়াৰ পাছতো ধৰ্ষণ কৰিছিল। মোৰাদাবাদ থানাত দাখিল কৰা এজাহাৰ সন্দৰ্ভত মোৰাদাবাদৰ নিম্ন আদালতত দীৰ্ঘদিন ধৰি চলি আছিল বিচাৰ। ফুৰকানৰ অধিবক্তাই দাবী কৰিছে যে অভিযোগকাৰীয়ে নিজেই স্বীকাৰ কৰিছিল যে ফুৰকানে তেওঁক বিয়া কৰাইছে। আৰু দ্বিতীয় বিবাহ ইছলামত অপৰাধ নহয়। আৰু ধৰ্ষণৰ অভিযোগ বিয়াৰ পাছত বৈধ নহয়।
এই গোচৰটো এলাহাবাদ উচ্চ ন্যায়ালয়ত দাখিল কৰা হৈছে। শেহতীয়াকৈ এলাহাবাদ উচ্চ ন্যায়ালয়ৰ ন্যায়াধীশ অৰুণ কুমাৰ সিং দেশৱালে এই গোচৰটো পৰ্যবেক্ষণ কৰি কয় যে মুছলমান পুৰুষে এগৰাকীতকৈ অধিক পত্নীক বিয়া কৰাব পাৰে। কাৰণ ভাৰতত মুছলমান বিবাহৰ লগত জড়িত সকলো আইন শ্বৰীয়ত আইনৰ দ্বাৰা পৰিচালিত। এই গোচৰসমূহ ভাৰতীয় দণ্ডবিধিৰ অন্তৰ্গত নহয়। আৰু শ্বৰীয়ত মতে মুছলমান পুৰুষে চাৰিগৰাকী পত্নীলৈকে বিবাহপাশত আবদ্ধ হ’ব পাৰে। এটাই চৰ্ত, সকলো ভাল হব লাগিব।
ন্যায়াধীশগৰাকীয়ে পৰ্যবেক্ষণ কৰে যে কোৰআনৰ মতে মুছলমানে কোনো বৈধ কাৰণ থাকিলে এজনতকৈ অধিক ব্যক্তিক বিয়া কৰাব পাৰে। কিন্তু সেই নিয়মৰ অপব্যৱহাৰ শেহতীয়াকৈ বৃদ্ধি পাইছে। বহুতে ব্যক্তিগত স্বাৰ্থৰ বাবে এজনতকৈ অধিক ব্যক্তিক বিয়া কৰাইছে। সেইবাবেই আদালতে একেধৰণৰ নাগৰিক সংহিতা প্ৰৱৰ্তন কৰাটো প্ৰয়োজনীয় বুলি বিবেচনা কৰে। কিন্তু শেষত আদালতে অন্তৱৰ্তীকালীন ৰায়দানত ফুৰকানৰ দুয়োখন বিবাহ বৈধ বুলি ঘোষণা কৰে। ২৬ মে’ত পুনৰ শুনানি গ্ৰহণ কৰা হ’ব এই গোচৰৰ।
