ৰাজ্যত অপৰাধজনিত ঘটনা ক্ৰমাৎ বৃদ্ধি পোৱাৰ মাজতে কাছাৰ জিলাৰ উধৰবণ্ড অঞ্চলত সংঘটিত এক অত্যন্ত বৰ্বৰ ধৰ্ষণ কাণ্ডৰ খবৰ পোহৰলৈ আহিছে। অভিযোগ অনুসৰি, এজন লোকে দীৰ্ঘদিন ধৰি নিজৰেই নাবালিকা কন্যাক যৌন নিৰ্যাতন চলাই আহিছিল। এই ভয়ংকৰ ঘটনাৰ ১০ মাহৰ পাছত অৱশেষত আৰক্ষীয়ে অভিযুক্ত পিতৃক গ্ৰেপ্তাৰ কৰিবলৈ সক্ষম হৈছে।
২০২৫ চনৰ জানুৱাৰী মাহৰ পৰা অভিযুক্তজন পলাতক অৱস্থাত আছিল। তেতিয়াই তেওঁৰ ১৬ বছৰীয়া দুৰ্ভাগীয়া কন্যাই আৰক্ষীক যৌন নিৰ্যাতনৰ বিষয়ে অৱগত কৰিছিল। দীৰ্ঘদিনীয়া অভিযানৰ পাছত যোৱা ১০ নৱেম্বৰত আৰক্ষীয়ে মূল অভিযুক্তক গ্ৰেপ্তাৰ কৰে।
উধৰবণ্ড থানাৰ ভাৰপ্ৰাপ্ত বিষয়া শ্ৰী ছিমছিং টিমুঙে এই সন্দৰ্ভত জানিবলৈ দিয়ে, “যোৱা জানুৱাৰী মাহত অভিযোগ লাভ কৰাৰ পাছত আমি গোচৰ ৰুজু কৰি তদন্ত আৰম্ভ কৰিছিলো। অভিযুক্তজন প্ৰায় ১০ মাহ ধৰি পলায়ন কৰি আছিল। অৱশেষত সোমবাৰে তেওঁক গ্ৰেপ্তাৰ কৰা হয়।”
জানিব পৰা মতে, ধৰ্ষণৰ বলি হোৱা কিশোৰীগৰাকীয়ে ইতিমধ্যে এটি কন্যা সন্তান জন্ম দিছে।
২০২৫ চনৰ ১৮ জানুৱাৰীত তেওঁ শিলচৰৰ ৰংগিৰখাৰী আৰক্ষী থানাত উপস্থিত হৈ ঘটনা সন্দৰ্ভত অভিযোগ দাখিল কৰিছিল। কিশোৰীগৰাকীয়ে আৰক্ষীক জনোৱা মতে, তেওঁ উধৰবণ্ডৰ বাসিন্দা। ২০২২ চনৰ পৰা তেওঁৰ পিতৃয়ে নিজ ঘৰতেই বাৰে বাৰে তেওঁক ধৰ্ষণ কৰি আহিছিল।
নৰপিশাচ পিতৃয়ে এই বিষয়ে কাৰোবাক জনালে সৰু ভাতৃক হত্যা কৰাৰ ভাবুকি দিছিল। এই ভাবুকিৰ বাবেই কিশোৰীগৰাকীয়ে ইমান দিনে ভয়ত কাকো একো জনোৱা নাছিল। অৱশেষত উপায়ন্তৰ হৈ তেওঁ শিশু হেল্পলাইনৰ সহায়ত আৰক্ষীৰ কাষ চাপে।
আৰক্ষীয়ে লগে লগে এই ঘটনা সন্দৰ্ভত ‘পকচো‘ (POCSO) আইনৰ অধীনত গোচৰ ৰুজু কৰি তদন্ত আৰম্ভ কৰে আৰু কেইবামাহৰ পাছত মূল অভিযুক্তক গ্ৰেপ্তাৰ কৰে। গ্ৰেপ্তাৰৰ পাছতে অভিযুক্তক আদালতত হাজিৰ কৰোৱা হয় আৰু আদালতে তেওঁক ন্যায়িক জিম্মালৈ প্ৰেৰণ কৰে।
