কৰ্ণাটকৰ কলাবুৰ্গী জিলাত সংঘটিত হৈছে এক ভয়াবহ ঘটনা। তিনিজন গাড়ী ব্যৱসায়ীক অপহৰণ কৰি চলোৱা হৈছে অত্যাচাৰ। ছচিয়েল মিডিয়াতো ভাইৰেল হৈ পৰিছে তেওঁলোকৰ অত্যাচাৰৰ ভিডিঅ’। ইয়াৰ পিছত আৰক্ষীয়ে কঠোৰ ব্যৱস্থা গ্ৰহণ কৰিছে। শনিবাৰে অপহৰণৰ অভিযোগত গ্ৰেপ্তাৰ কৰিছে ৭ জন লোকক।
৫ মে’ত তিনিওজন ভুক্তভোগী গাড়ী ব্যৱসায়ীয়ে আৰক্ষীক অভিযোগ দাখিল কৰে। তেওঁলোকে জনোৱা মতে, যোৱা ৪ মে’ৰ নিশা প্ৰায় ৯:৩০ বজাত এজন ব্যক্তিয়ে তেওঁলোকক পুৰণি গাড়ী বিক্ৰী কৰিবলৈ বিচাৰি ফোন কৰে। সেয়েহে তেওঁলোকক এটা নিৰ্দিষ্ট স্থানত আহি গাড়ীবোৰ পৰীক্ষা কৰিবলৈ কোৱা হয়।
সেই স্থানলৈ যোৱাৰ পথত গাড়ী ব্যৱসায়ীকেইজনক অপহৰণ কৰা হয়। অপহৃত ব্যৱসায়ী কেইজনক লাঠিৰে নিৰ্মম প্ৰহাৰ কৰাৰ লগতে সকলো টকা পইচা কাঢ়ি লয়।
তাৰ পাছত তিনিওজনৰে কাপোৰ বলপূৰ্বক খুলি দিয়া হ’ল। তাৰ পিছত তেওঁলোকৰ যৌনাংগত বিদ্যুতৰ তাঁৰৰ জৰিয়তে বিদ্যুৎস্পৃষ্ট কৰা হয়।
আৰক্ষীৰ তথ্য অনুসৰি ছ’চিয়েল মিডিয়াত এটা ভিডিঅ’ ভাইৰেল হৈ পৰিছে, য’ত তিনিজন ব্যক্তিক উলংগ কৰি বিদ্যুৎস্পৃষ্ট কৰা দেখা গৈছে। ৫ মে’ত এই এফআইআৰ দাখিল কৰা হৈছিল। ইতিমধ্যে ৭ জন লোকক গ্ৰেপ্তাৰ কৰা হৈছে। প্ৰাথমিক তদন্তৰ পৰা দেখা গৈছে যে এইটো এটা ডাঙৰ গেঙৰ কাম। বাকী অভিযুক্তৰ সন্ধান চলি আছে।