ছিংগাপুৰত অন্তিম মুহূৰ্তত শিল্পী জুবিন গাৰ্গৰ সৈতে থকা আঠজন ব্যক্তিৰ ভিতৰত অন্যতম ৰূপকমল কলিতা আজি অসম চি আই ডিৰ সন্মুখত হাজিৰ হৈছে। বাকী আন সাতজন ব্যক্তিয়ে এতিয়াও তদন্তকাৰী দলে জাৰি কৰা চমনৰ কোনো সঁহাৰি দিয়া নাই।
ছিংগাপুৰত জুবিন গাৰ্গৰ সৈতে সাগৰত ভ্ৰমণ কৰিবলৈ যোৱা লোকসকলৰ মাজত ৰূপকমল কলিতাও আছিল। তেওঁৱো আন সকলৰ দৰে জুবিনৰ অন্তিম মুহূৰ্তৰ অন্যতম সাক্ষী। এতিয়া চিআইডিৰ আগত তেওঁ দাঙি ধৰা ভাষ্য তদন্তৰ ক্ষেত্ৰত অত্যন্ত গুৰুত্বপূৰ্ণ হিচাপে বিবেচিত হৈছে।
ইয়াৰ পূৰ্বে সাংবাদিকৰ আগত মুখ্যমন্ত্ৰী হিমন্ত বিশ্ব শৰ্মাই উল্লেখ কৰে যে ১৯ ছেপ্টেম্বৰত জুবিন গাৰ্গে সাঁতুৰিবলৈ গৈ ডুব যোৱাৰ সময়ত ইয়টত থকা কলিতাই তেওঁৰ সহযোগিতা আগবঢ়োৱাৰ কথা নিশ্চিত কৰিছে আৰু ৭ অক্টোবৰত গুৱাহাটী উপস্থিত হোৱাৰ সম্ভাৱনা আছে।
মুখ্যমন্ত্ৰীয়ে লগতে কয়, ‘বাকী সাতজনৰ ওপৰত আমি হেঁচা বজাই ৰাখিম। তেওঁলোকে যিমান সোনকালে সহযোগ কৰিব সিমান সোনকালে আমি তদন্ত সম্পূৰ্ণ কৰিব পাৰিম।’
অসম আৰক্ষীৰ ছিংগাপুৰ ভ্ৰমণ সন্দৰ্ভত শৰ্মাই স্পষ্ট কৰি দিয়ে যে মিউচুৱেল লিগেল এচিষ্টেন্স ট্ৰিটি (এমএলএটি)ৰ অধীনত ই অপ্ৰয়োজনীয়। ‘আমাৰ অনুৰোধ ইতিমধ্যে ছিংগাপুৰলৈ প্ৰেৰণ কৰা হৈছে। চিংগাপুৰ আৰক্ষীয়ে সংগ্ৰহ কৰা প্ৰমাণ আমাৰ সৈতে শ্বেয়াৰ কৰিব। কোনো বিদেশী দেশে আন দেশৰ আৰক্ষীক নিজৰ মাটিত তদন্ত কৰিবলৈ অনুমতি নিদিয়ে।’
