এআইয়ুডিএফ প্ৰধান বদৰুদ্দিন আজমল আৰু মন্ত্ৰী হিমন্ত বিশ্ব শৰ্মাৰ বাকযুদ্ধই আকৰ্ষণীয় হোৱাই নহয়, এক ধৰণৰ তিক্ততাৰো সৃষ্টি কৰা পৰিলক্ষিত হৈছে।
হিমন্ত বিশ্ব শৰ্মাৰ বিৰুদ্ধে এআইয়ুডিএফে ৰাজ্যৰ প্ৰত্যেক জিলাৰে থানাত গোচৰ দিয়াৰ ভাবুকি দিয়াৰ পাছতে আজি বদৰুদ্দিন আজমলক সংবাদ মাধ্যমৰ জৰিয়তে ঠেংগা অৰ্থ্যাৎ বৃদ্ধাংগুষ্ঠ প্ৰদৰ্শন কৰিছিল মন্ত্ৰী শৰ্মাই।
তাৰ পাছতে শিল্পগ্ৰামত এই সন্দৰ্ভত আজমলৰ প্ৰতিক্ৰিয়া বিচাৰিছিল সাংবাদিকে।
এই সন্দৰ্ভত আজমলে প্ৰতিক্ৰিয়া প্ৰকাশ কৰিবলৈ গৈ হিমন্ত বিশ্ব শৰ্মাক ভাতৃ সম্বোধন কৰে।
তেওঁ কয় ‘মই মোৰ সৰু ভাতৃ হিমন্ত বিশ্ব শৰ্মাক কৈছো যে ৰাজনীতিত খঙাল কেতিয়াও নহ’বা। ৰাজনীতিক এনজয় কৰা। ৰাজনীতি আমাৰ জীৱনৰ এটা অংগ। হিমন্তই যদিও খঙ কৰে তেন্তে নিজৰ কন্ট্ৰ’লত ৰাখক।‘
ইপিনে, এই খং স্বাস্থ্যৰ বাবে হানিকাৰক বুলি উল্লেখ কৰি আজমলে লগতে কয় ‘তেওঁ অতি সোনকালে চিকিৎসকৰ ওচৰত গৈ এই খঙটোৰ বিষয়ে আলোচনা কৰক। শান্ত হোৱা হিমন্ত, শান্ত হোৱা।‘
তদুপৰি, হিমন্তক কিছুদিন চিকিৎসালয়তো চিকিৎসাধীন হ’বলৈ পৰামৰ্শ দি তেওঁ লগতে কয় ‘মোৰ ভাতৃ হিচাপে তেওঁ মোৰ চিকিৎসালয়লৈ আহক, মই ১০০ শতাংশ বিনামূলীয়াকৈ চিকিৎসা কৰোৱাম।‘
‘শিলচৰত কিবা এটা ঘটনা হৈছিল, এয়া অতীত। এতিয়া আমি সাধাৰণভাৱে জীৱন যাপন কৰিব লাগে। ৰাইজৰ হৈ কাম কৰক ৰাইজে আপোনাক ভাল পাব। সৰু ভাতৃ হিচাপে তেওঁক মই সঁচাকৈ ক্ষমা কৰি দিছো।‘