অৰবিন্দ কেজৰিৱালৰ গ্ৰেপ্তাৰৰ প্ৰতিবাদত বৃহৎ আন্দোলনৰ পথত নামিছে আম আদমি পাৰ্টিয়ে। এইবাৰ আপে প্ৰধানমন্ত্ৰী নৰেন্দ্ৰ মোদীৰ বাসগৃহ ঘেৰাও কৰাৰ আহ্বান দিছে। এই কাৰ্যসূচী অহা ২৬ মাৰ্চত অনুষ্ঠিত হ’ব। একে সময়তে কেজৰিৱালৰ গ্ৰেপ্তাৰৰ প্ৰতিবাদত দলে হোলী উদযাপন নকৰে বুলিও জনাইছে।
দিল্লীৰ মুখ্যমন্ত্ৰী অৰবিন্দ কেজৰিৱালক আবকাৰী দুৰ্নীতিৰ গোচৰত বৃহস্পতিবাৰে ইডিয়ে গ্ৰেপ্তাৰ কৰে। শুকুৰবাৰে আদালতে তেওঁক ৬ দিনৰ বাবে ইডিৰ জিম্মাত ৰখাৰ নিৰ্দেশ দিয়ে।
শুকুৰবাৰে হাই প্ৰফাইল গোচৰৰ শুনানি গ্ৰহণৰ সময়ত আদালত কক্ষত অধিবক্তাৰ পৰা আৰম্ভ কৰি সাধাৰণ লোক উপচি পৰিছিল। অৱশেষত আৰক্ষীৰ হস্তক্ষেপত পৰিস্থিতি নিয়ন্ত্ৰণলৈ অনা হয়।
লগতে পঢ়কঃ বয়স মাত্ৰ ৪২ বছৰ! কৰ্কট ৰোগত আক্ৰান্ত ব্ৰিটিছ ৰাজপৰিয়ালৰ বোৱাৰী কেট মিডলটন; চলিছে কেমোথেৰাপি
ইপিনে, সমগ্ৰ ঘটনাটো ৰাজনৈতিক ষড়যন্ত্ৰ বুলি দাবী কৰিছে আপে। কেজৰিৱালক গ্ৰেপ্তাৰৰ খবৰ বিয়পি পৰাৰ লগে লগে বৃহস্পতিবাৰে সন্ধিয়াৰ পৰা সমগ্ৰ দেশৰ ৰাজনীতিত তোলপাৰ লাগে।
শুকুৰবাৰে পুৱাৰে পৰা দিল্লীকে ধৰি দেশৰ বিভিন্ন প্ৰান্তত আপ কৰ্মীসকলে প্ৰতিবাদ সাব্যস্ত কৰে। দিল্লী চৰকাৰৰ মন্ত্ৰী তথা মুখপাত্ৰ গোপাল ৰায়ে এই আন্দোলন বৃহৎ পৰিসৰত লৈ যোৱাৰ পৰিকল্পনা ঘোষণা কৰিছে।
সংবাদ মাধ্যমৰ আগত আপ নেতাগৰাকীয়ে কয়, ‘‘এইবাৰ হোলী উৎসৱ নহয়। ২৫ মাৰ্চত আমি ৰাইজৰ ওচৰলৈ গৈ দেশত কি হৈ আছে সেই কথা জনাম। ২৬ মাৰ্চত দিল্লীৰ মুখ্যমন্ত্ৰী কেজৰিৱালক গ্ৰেপ্তাৰ কৰাৰ প্ৰতিবাদত প্ৰধানমন্ত্ৰীৰ বাসগৃহ ঘেৰাও কৰা হ’ব।”
লগতে পঢ়কঃ মস্কোৰ কনচাৰ্ট হলত বন্দুকধাৰীৰ ভয়ংকৰ আক্ৰমণ; কমেও ৬০ জন নিহত, আহত শতাধিক
ইপিনে, তেওঁৰ অধিবক্তা অভিষেক মনু সিংভীয়ে আদালতত আম আদমি পাৰ্টিৰ মুৰব্বীগৰাকীক গ্ৰেপ্তাৰ কৰাৰ ন্যায্যতাক লৈ প্ৰশ্ন উত্থাপন কৰে। আনহাতে, ইডিৰ হৈ অতিৰিক্ত ছলিচিটৰ জেনেৰেল এছ ভি ৰাজুৱে আদালতত দাবী কৰে যে কেজৰিৱালেই দিল্লী আবকাৰী নীতি কেলেংকাৰিৰ মাষ্টাৰমাইণ্ড।
কেন্দ্ৰীয় সংস্থাটোৰ মতে, আবকাৰী দুৰ্নীতিৰ গোচৰত শ শ কোটি টকাৰ অবৈধ লেনদেন সংঘটিত হৈছে। আৰু সেই দুৰ্নীতিৰ মূল অভিযুক্ত হৈছে অৰবিন্দ কেজৰিৱাল, মনীষ চিছ’দিয়া আৰু কে কবিতা।
দুয়োপক্ষৰ যুক্তি শুনাৰ পাছত ন্যায়াধীশগৰাকীয়ে নিশা প্ৰায় ৮:৩০ বজাত দিল্লীৰ মুখ্যমন্ত্ৰীক ৬ দিনৰ বাবে ইডি জিম্মাত ৰখাৰ নিৰ্দেশ দিয়ে।
লগতে পঢ়কঃ IPL 2024: ধোনীৰ ছত্ৰছায়াত নেতৃত্বৰে ঋতুৰাজৰ সফল অভিযান; ধৰাশায়ী বিৰাট বাহিনী
উল্লেখ্য যে বলবৎকাৰী সঞ্চালকালয়ে দিল্লী আবকাৰী গোচৰত অৰবিন্দ কেজৰিৱালক দীৰ্ঘদিন ধৰি জেৰা কৰিব বিচাৰি আহিছে। বাৰে বাৰে চমন প্ৰেৰণ কৰাৰ পিছতো ইডিৰ চমনৰ কোনো উত্তৰ নিদিলে আপৰ মুৰব্বীগৰাকীয়ে। বৰঞ্চ তেওঁ দিল্লী উচ্চ ন্যায়ালয়ৰ কাষ চাপিছিল। একেৰাহে দুদিন তেওঁক সুৰক্ষা দিবলৈ অস্বীকাৰ কৰে আদালতে। বৃহস্পতিবাৰে দিল্লীৰ মুখ্যমন্ত্ৰীৰ বাসগৃহত হাজিৰ হয় কেন্দ্ৰীয় তদন্তকাৰী সংস্থা। নিশাই ইডিয়ে তেওঁক গ্ৰেপ্তাৰ কৰে।
