১৩ জানুৱাৰিত বিশেষ অধিৱেশনৰ সময়ত বিধানসভাৰ মজিয়াত বিভিন্ন অৰ্ধসত্য আৰু অসত্য কথাৰে উদাত্ত ভাষণ দিয়া হিমন্ত বিশ্ব শৰ্মাক উভতি ধৰিছে আছুৱে।
নিজৰ ভাষণত অনেক বিভ্ৰান্তিকৰ কথাৰ লগতে “অসম চুক্তিত বিদেশীৰ বাবে কাট অব ইয়েৰ ১৯৭১ চন বুলি উল্লেখ নাই, তাৰ পৰিৱৰ্তে ১৯৬৬ চনহে আছে” বুলি এটা ভ্ৰান্তিৰ সৃষ্টি কৰিছিল হিমন্তই।
ইয়াৰ পিছতে সদৌ অসম ছাত্ৰ সন্থাৰ উপদেষ্টা ড০ সমুজ্জ্বল কুমাৰ ভট্টাচাৰ্য্যই অসম চুক্তি ৰূপায়ণ মন্ত্ৰী সোণোৱালৰ হৈ হিমন্ত বিশ্বই অসম চুক্তিৰ অপব্যাখ্যা কৰিছে বুলি সংবাদ মাধ্যমত ইয়াৰ প্ৰতিক্ৰিয়া দিছে।
চুক্তিখনত সকলো কথা স্পষ্টকৈ লিখা আছে বুলি দাবী কৰি ভট্টাচাৰ্য্যই মন্ত্ৰীজনক এনেকুৱা মিছা কথাৰে ভিত্তিবৰ্ষক লৈ ৰাইজৰ মাজত বিভ্ৰান্তিৰ সৃষ্টি নকৰিবলৈ সকীয়াই দিয়ে।
চুক্তিখনৰ ৫ নং দফাটো সংবাদ মাধ্যমত পঢ়ি দি আছুৰ উপদেষ্টাজনে কয়, “চুক্তিখনত স্পষ্টকৈ লিখা আছে- ১৯৭১ চনৰ ২৫ মাৰ্চৰ পিছত অহা বিদেশীক আইন অনুসৰি চিনাক্ত কৰা হ’ব। ভোটাৰ তালিকাৰ পৰা নাম কৰ্তন কৰা হ’ব আৰু বহিষ্কাৰ কৰা হ’ব। এনে বিদেশীসকলক বহিষ্কাৰ কৰিবলৈ কাৰ্য্যকৰী ব্যৱস্থা গ্ৰহণ কৰা হ’ব”।
অসম চুক্তিখনৰ এটা প্ৰতিলিপি হাতত লৈ পঢ়ি শুনাই দিয়াৰ পিছত ভট্টাচাৰ্য্যৰ দাবী, “চুক্তিখনত দুটা ভাগ আছে। এটা হ’ল ৬৬ চনৰ পৰা ৭১। আৰু এটা হ’ল ৭১-ৰ পিছত। ৬৬ চনৰ পৰা ৭১ চনলৈ বিদেশী নাগৰিক চিনাক্ত কৰি চিনাক্ত কৰাৰ তাৰিখৰ পৰা ১০ বছৰলৈ ভোটাধিকাৰ কৰ্তন হ’ব। আৰু ১০ বছৰ শেষ হোৱাৰ লগে লগে তেওঁলোকৰ নাম পুনৰ ভোটাৰ তালিকাত অন্তৰ্ভুক্ত হ’ব। এয়া হ’ল চুক্তিখনৰ প্ৰথমখিনি কথা।
আকৌ আনটো কথা হ’ল ৭১-ৰ পিছত অহা বিদেশী চিনাক্তকৰণ হ’ব আৰু ভোটাৰ তালিকাত নামো কৰ্তন হ’ব আৰু বহিষ্কাৰো হ’ব”।
“চুক্তিখনৰ ক’ত ৭১ চনৰ কথা উল্লেখ আছে” বুলি হিমন্তই বিধানসভাৰ ভাষণত কৰা প্ৰশ্নৰ উত্তৰত ভট্টাচাৰ্য্যই কয়, চুক্তিৰ ৫ নং দফাতে গোটেইকেইটা কথা আছে। এই দফাতে দুটা ভাগত ভাগ কৰা আছে।
“গতিকে অসম চুক্তিত ৭১ চনৰ ২৫ মাৰ্চৰ পিছত অহা অবৈধ বিদেশী হিন্দু, মুছলমান সকলোকে চিনাক্তকৰণ কৰি ভোটাৰ তালিকাৰ পৰা নাম কৰ্তন কৰি বহিষ্কাৰৰ কথা স্পষ্টকৈ লিখা আছে। আৰু এইটো কথাকে অত দিনে আমি অসমৰ ৰাইজে কৈ আহিছো। চুক্তিৰ ৫ নং দফাত এইবোৰ কথা স্পষ্টকৈ লিখা আছে।”
চুক্তিখন মুখ্য মন্ত্ৰী তথা অসম চুক্তি ৰূপায়ণ মন্ত্ৰী সৰ্বানন্দ সোণোৱাল আৰু হিমন্ত বিশ্বই ভালকৈ পঢ়ি চোৱা নাই বুলি দাবী কৰে আছুৰ উপদেষ্টাজনে। তেওঁ তেওঁলোকক এইখন ভালকৈ পঢ়ি চাবলৈ আহ্বান জনায়।
