সদৌ যোৰহাট জিলা ছাত্ৰ সন্থাৰ উদ্যোগত টীয়ক আঞ্চলিক ছাত্ৰ সন্থা, শিমলুগুৰি মৌজা আঞ্চলিক ছাত্ৰ সন্থা, অসম জাতীয়তাবাদী যুৱ ছাত্ৰ পৰিষদৰ টীয়ক আঞ্চলিক সমিতি, টীয়ক আঞ্চলিক চুতীয়া ছাত্ৰ সন্থা, টীয়ক জ্যেষ্ঠ নাগৰিক সন্থা, শিল্পী সমাজ তথা টীয়ক শাখা কবি সন্মিলনৰ সহযোগত শুকুৰবাৰে ‘কা’ৰ বিৰোধিতাৰে টীয়ক নগৰৰ হাস্পাতাল তিনি আলিত শিল্পী দিৱস উদযাপন কৰা হয়।
ৰাতিপুৱা জ্যতিপ্ৰসাদ আগৰৱালাৰ প্ৰতিচ্ছৱিত বন্তি প্ৰজ্বলন কৰে যোৰহাট জিলা ছাত্ৰ সন্থাৰ সভাপতি সূৰ্য কুমাৰ ভূঞা, অসম আন্দোলনৰ সক্ৰিয় কৰ্মী প্ৰদীপ চুতীয়া আৰু কাকজন মহাবিদ্যালয়ৰ প্ৰাক্তন অধ্যাপক তথা টীয়ক জ্যেষ্ঠ নাগৰিক সন্থাৰ সভাপতি অশোক কুমাৰ বৰাই।
যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগ আৰু টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞাই আঁত ধৰা অনুষ্ঠানত টীয়ক জাতীয় বিদ্যালয়ৰ ছাত্ৰ ছাত্ৰীসকলে সমবেত সংগীত পৰিৱেশন কৰে।
এই অনুষ্ঠানত জিলা ছাত্ৰ সন্থাৰ সভাপতি সূৰ্য কুমাৰ ভূঞায়ে কয়, ‘‘এই ‘কা’ বিৰোধী আন্দোলন জ্যোতিপ্ৰসাদ আগৰৱালাৰ দৰে বিপ্লৱী শিল্পীৰ আদৰ্শক সাৰোগত কৰি আমি ৰাইজৰ সহযোগেৰে গণতান্ত্ৰিক পদ্ধতিৰে আগবঢ়াই লৈ যাব লাগিব।’’
আনহাতে, অনুষ্ঠানত টীয়ক জ্যেষ্ঠ নাগৰিক সন্থাৰ সভাপতি অশোক কুমাৰ বৰা, অসম আন্দোলনৰ নেতা প্ৰদীপ চুতীয়া, যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে বক্তব্য প্ৰদান কৰে। আনহাতে টীয়ক শিল্পী সমাজৰ বিনোদ ভকলিন, অশোক কুমাৰ বৰা, কাকজান মহাবিদ্যালয়ৰ শ্ৰেষ্ঠ গায়িকা বৰ্ণালী চুতীয়াই গীত পৰিৱেশন কৰে আৰু চিত্ৰশিল্পী নৱজ্যোতি কোঁৱৰ তথা টীয়ক জাতীয় বিদ্যালয়ৰ ছাত্ৰ ছাত্ৰীসকলে ৰং-তুলিকাৰে চিত্ৰ অংকন কৰে।
অনুষ্ঠানত টীয়ক উচ্চতৰ মাধ্যমিক বালিকা বিদ্যালয়ৰ প্ৰাক্তন অধ্যক্ষ ৰত্নেশ্বৰ গগৈ, টীয়ক জাতীয় বিদ্যালয়ৰ সচিব সৌৰভ বৰা, প্ৰাক্তন শিক্ষয়িত্ৰী চেনেহলতা বৰা, টীয়ক প্ৰেছ ক্লাৱৰ উপদেষ্টা ৰিজু কুমাৰ শইকীয়া, টীয়ক প্ৰেছ ক্লাৱৰ সভাপতি দুলাল হাজৰিকা, মাজুলী মহকুমা ছাত্ৰ সন্থাৰ সম্পাদক বিতোপন শৰ্মা, যোৰহাট মহকুমা ছাত্ৰ সন্থাৰ সাংগঠনিক সম্পাদক যদুমণি বৰুৱাকে ধৰি ভালেসংখ্যক লোক উপস্থিত থাকে।
