বিধানসভা নিৰ্বাচন সমাগত। ইতিমধ্যে ৰাজ্যৰ প্ৰতিটো প্ৰান্ততে বিজেপি দলে সাংগঠনিক সভা অনুস্থিত কৰি দলৰ স্থিতি সুদৃঢ় কৰাত ব্যস্ত হৈ পৰিছে।
ইতিমধ্যে দূৰ্গা পূজাৰ পূৰ্বে টীয়ক সমষ্টিৰ ১৯খন পঞ্চায়তত সাংগঠনিক সভা অনুস্থিত কৰি তৃণমূল পৰ্যায়ত দলক সবল কৰি তোলাৰ প্ৰয়াস কৰাৰ সমান্তৰালকৈ আজি সমষ্টিটোৰ বামুণপুখুৰী, বলমা, ৰাজৈ বাদুলিপুখুৰী পঞ্চায়তত দলীয় সাংগঠিনক সভা অনুস্থিত কৰি অনাগত দিনত দলৰ কৰণীয়ৰ ওপৰত আলোচনা কৰে।
মণ্ডলৰ সভাপতি, সম্পাদক প্ৰমুখ্যে ৰাজ্যিক তথা জিলা পৰ্য্যায়ৰ কেইবাগৰাকীও দলীয় কৰ্মী উপস্থিত থকা এই সভাসমূহত প্ৰায় ছয় শতাধিক ব্যক্তিয়ে বিজেপি দলত আনুষ্ঠানিকভাৱে যোগদান কৰে।
উল্লেখযোগ্য যে ৰাজ্য সভাৰ সাংসদ কামাখ্যা প্ৰসাদ তাচাই কেইবাখনো দলীয় সভাত উপস্থিত থাকি দলৰ নীতি আদৰ্শ আৰু বিগত চাৰে চাৰিটা বছৰত চৰকাৰে ৰাইজৰ বাবে ৰূপায়ণ কৰা প্ৰতিটো আঁচনিৰ ওপৰত আলোকপাত কৰি আগন্তুক ২১ত বিধানসভাত বিজেপিৰ আসন ১০০+ হোৱাত সকলোকে সহায়ৰ হাত আগবঢ়াবলৈ আহ্বান জনায়।
সাংসদগৰাকীয়ে কয় যে বিজেপি দলৰ লগত ৰাইজ আছে আৰু প্ৰকৃতাৰ্থত বিজেপি দলটোহে ৰাইজৰ দল।
ইয়াৰ উপৰি বৰ্তমানৰ অন্যতম সফল মুখ্য মন্ত্ৰী সৰ্বানন্দ সোণোৱাল যিহেতু আছুৰ মজিয়াৰ পৰাই আহিছে সেয়ে আছুৱে নতুনকৈ ৰাজনৈতিক দল খুলি মুখ্য মন্ত্ৰীগৰাকীক সমালোচনা কৰাৰ কোনো নৈতিক অধিকাৰ নাই আৰু নৱগঠিত ৰাজনৈতিক দলসমূহে আগন্তুক নিৰ্বাচনত কোনো প্ৰভাৱ নেপেলাই বুলি তাচাই মন্তব্য কৰে।