নাগৰিকত্ব (সংশোধনী) আইন, ইআইএ ২০২০ বাতিলৰ লগতে শিৱসাগৰৰ উন্নয়ন সাধনত ৰাজ্য চৰকাৰৰ ব্যৰ্থতাৰ প্ৰতিবাদত শিৱসাগৰত আজি আছুৱে এক প্ৰতিবাদী কাৰ্যসূচী ৰূপায়ণ কৰে।
সদৌ শিৱসাগৰ জিলা ছাত্ৰ সন্থাৰ আহ্বানত শিৱসাগৰ আঞ্চলিক ছাত্ৰ সন্থাই আজি শিৱসাগৰ জিলা উপায়ুক্তৰ কাৰ্যালয়ৰ সন্মুখত দুঘন্টীয়া অৱস্থান ধৰ্মঘট কাৰ্যসূচী ৰূপায়ণ কৰে।
কা’ আৰু ইআইএ ২০২০ বাতিলৰ লগতে শিৱসাগৰক পৰ্যটকৰ আকৰ্ষণৰ কেন্দ্ৰ বিন্দু ৰপে গঢ়ি তোলা, শিৱসাগৰত একোখনকৈ মডিকেল, অভিযান্ত্ৰিৰ আৰু আইন মহাবিদ্যালয় স্থাপন কৰা, অসম চৰকাৰৰ প্ৰস্তাৱিত কৰ্কট চিকিৎসালয় সমুহৰ এখন শিৱসাগৰত স্থাপন কৰা, শিৱসাগৰৰ পুৰণি দিখৌ দলংখন হেৰি’টেজ ব্ৰীজ ৰূপে গঢ়ি তোলা, দিচাংমুখ অফলাৰ গৰাখহনীয়া ৰোধ কৰা, যমুনাকে ধৰি প্ৰাচীন কীৰ্তিচিহ্ন সমুহ সংৰক্ষণ আৰু বেদখল মুক্ত কৰা, ৰাজীৱ গান্ধী ইনষ্টিটিউট অৱ পেট্ৰ’লিয়াম টেকন’লজি আৰু অসম ৰাজীৱ গান্ধী সমবায় বিশ্ববিদ্যালয় সন্দৰ্ভত শ্বেতপত্ৰ প্ৰকাশ কৰাকে ধৰি বহু কেইটা দাবীৰে আজি আছুৱে অৱস্থান ধৰ্মঘট কাৰ্যসূচী ৰূপায়ণ কৰে।
অৱস্থান ধৰ্মঘট কাৰ্যসূচীত আছুৰ ৰাজ্যিক কাৰ্যনিৰ্বাহক সদস্য সমীৰণ ফুকন, মহকুমা ছাত্ৰ সন্থাৰ সভাপতি দীপাংকৰ শইকীয়া, সাধাৰণ সম্পাদক জীপম বৰাকে ধৰি বহু সদস্যই অংশগ্ৰহণ কৰে।