সামাজিক মাধ্যম ইনষ্টাগ্ৰামত কৰা এটি সাহসী পোষ্টেৰে চৰ্চালৈ আহিছে এগৰাকী অসম কন্যা।
‘‘শৈশৱতেই নিৰ্যাতনৰ বলি হৈছিলো। হোষ্টেলত ডাঙৰ-দীঘল হ’লো। এখন অচিনাকি চহৰত অকলে বাস কৰিছিলো। মই আটাইতকৈ বিশ্বাসত লোৱা লোকসকলৰ পৰা প্ৰৱঞ্চিত হৈছিলো। মোৰ ভাতৃক হেৰুৱালো। প্ৰাক্তন প্ৰেমিকক হেৰুৱালো। দেউতাক হেৰুৱালো। মই দেখাত যেনেকুৱা, তেনেধৰণেই মোক মতা হৈছিল আৰু মই ভালপোৱা পুৰুষজনৰ স’তে থকা বাবে মোক বিচাৰ কৰা হৈছিল। তেন্তে ইয়াৰ পাছতো যদি তুমি দেখা যে মই আশাবাদী হৈ জীয়াই আছো, তেন্তে জানি থোৱা যে সেয়াই হৈছো মই! তুমি নিজকে ভালপোৱা!’’
এই তাৎপৰ্যপূৰ্ণ ভাষ্য আগবঢ়াইছে ৰাষ্ট্ৰীয় প্ৰেক্ষাপটত চৰ্চিত এগৰাকী অসম কন্যাই। নাম তেওঁৰ- অংকিতা কোঁৱৰ। বলিউডৰ জনপ্ৰিয় অভিনেতা-মডেল তথা ফিটনেছ বিশেষজ্ঞ মিলিন্দ সুমনৰ পত্নী অংকিতাই এটা ইনষ্টাগ্ৰাম প’ষ্ট যোগেৰে দিয়া এই ভাষ্যই চৰ্চা লাভ কৰা দেখা গৈছে। ইনষ্টাগ্ৰাম প’ষ্টটোত অংকিতাই নিজৰ জীৱনকালত লাভ কৰি অহা সামাজিক আৰু ব্যক্তিগত আঘাতসমূহ উল্লেখ কৰিছে। ইয়াৰ দ্বাৰা জানিব পাৰি যে তেওঁ শৈশৱৰে পৰা বৰ্তমানলৈকে কিদৰে মানসিক নিৰ্যাতনৰ বলি হৈও জীৱন সংগ্ৰামত ব্ৰতি হৈ আছে।
অংকিতাৰ বয়স বৰ্তমান ৩০। আনহাতে, তেওঁৰ স্বামী মিলিন্দ সুমনৰ বয়স হৈছে ৫৫। ২০১৮ চনত অংকিতাই মিলিন্দ সুমনৰ স’তে বিবাহপাশত আৱদ্ধ হয়। অংকিতাৰ প্ৰাক্তন প্ৰেমিকৰ মৃত্যুৰ পাছতে তেওঁ মিলিন্দ সুমনৰ স’তে যোগাযোগ হয়। কিন্তু তেওঁলোকৰ প্ৰেমক লৈ বিভিন্নজনে সামাজিক মাধ্যমযোগে উপহাস তথা ট্ৰ’লিং কৰে। ইয়াৰ কাৰণ হ’ল তেওঁলোকৰ বয়সৰ মাজত বৃহৎ তফাৎ। তেওঁলোকৰ প্ৰেমৰ সমস্ত ঘটনাৱলী সম্পৰ্কে ইতিমধ্যে অংকিতাই এটা ইনষ্টাগ্ৰাম প’ষ্ট কৰিছিল। তাত তেওঁ লিখিছিল যে তেওঁলোকৰ প্ৰেম পাঁচ বছৰধৰি কৰি আহিছিল আৰু শেষত বিয়াত বহে। তেওঁলোকৰ বিবাহক লৈ অংকিতাৰ ঘৰৰ পৰাও বিশেষ আপত্তি নাছিল বুলিও অংকিতাই লিখিছিল। তৎসত্বেও অংকিতা আৰু মিলিন্দৰ বয়সক লৈ ট্ৰ’ল কৰি অহা লোকসকলক উদ্দেশ্য কৰিয়েই অংকিতাই শেহতীয়া প’ষ্টটো দিয়া বুলি ক’ব পাৰি।
উল্লেখযোগ্য যে কন্যাশিশু তথা নাৰী নিৰ্যাতনৰ ক্ষেত্ৰত অসমৰ স্থান ৰাষ্ট্ৰীয় প্ৰেক্ষাপটত সন্তোষজনক নহয়। শেহতীয়াকৈ এগৰাকী প্ৰাপ্তবয়স্কা ১৯ বৰ্ষীয় ছাত্ৰীয়ে এটা এণ্ট্ৰেন্স পৰীক্ষাত অৱতীৰ্ণ হ’বলৈ যাওতে সামান্য হাফপেণ্ট পৰিধান কৰি যোৱাক লৈয়ে উত্তাল হৈ আছে সংবাদ মাধ্যমসমূহ। আনকি বিবিচিৰ দৰে আন্তঃৰাষ্ট্ৰীয় সংবাদ মাধ্যমতো ইয়াৰ বাতৰিয়ে মুখ্য স্থান লাভ কৰিছে। সামাজিক মাধ্যমসমূহত উক্ত মেধাৱী ছাত্ৰীগৰাকীক বিভিন্ন ধৰণৰ অশালীন-অসামাজিক গালি-গালাজ, ট্ৰ’লিং কৰা হৈ আছে। এইসমূহৰ প্ৰভাৱ নিশ্চিতভাৱে ছাত্ৰীগৰাকীৰ মন-মানসিকতাক চুই যাব। তেনে পৰিস্থিতিত ৰাষ্ট্ৰীয় প্ৰেক্ষাপটত চৰ্চিত এগৰাকী অসম কন্যাই আগবঢ়োৱা এই ভাষ্যৰ ব্যাপক গুৰুত্ব আছে বুলি ক’ব পাৰি।
