দিল্লী বিশ্ববিদ্যালয়ৰ অধীনস্থ একাধিক মহাবিদ্যালয়ৰ ছাত্ৰ সংসদ নিৰ্বাচনৰ ফলাফল প্ৰকাশ পাবলৈ আৰম্ভ কৰিছে। প্ৰাথমিক ফলাফল অনুসৰি দিল্লীৰ বিভিন্ন মহাবিদ্যালয়ত আৰ এছ এছৰ ছাত্ৰ সংগঠন অখিল ভাৰতীয় বিদ্যাৰ্থী পৰিষদ বা এবিভিপিৰ জয়জয়কাৰ দেখিবলৈ পোৱা গৈছে। এই ফলাফলসমূহত সংগঠনটোৰ একচেতীয়া আধিপত্য পৰিলক্ষিত হৈছে। অৱশ্যে এই জয় কেৱল মহাবিদ্যালয় পৰ্যায়ৰ ছাত্ৰ সংসদৰহে, এয়া দিল্লী বিশ্ববিদ্যালয়ৰ মূল ছাত্ৰ সংসদ নিৰ্বাচনৰ চূড়ান্ত ফলাফল নহয়।
সৰ্বভাৰতীয় সংবাদ মাধ্যমৰ সূত্ৰ অনুসৰি, অদিতি মহাবিদ্যালয়, শ্ৰী অৰবিন্দ মহাবিদ্যালয়, ড০ বি আৰ আম্বেদকাৰ মহাবিদ্যালয়, ভাৰতী মহাবিদ্যালয় আৰু শিৱাজী মহাবিদ্যালয়ত ছাত্ৰ সংসদৰ চাৰিওটা মূল পদতেই এবিভিপিৰ প্ৰাৰ্থীয়ে জয়লাভ কৰিছে। ইয়াৰ উপৰিও ৰামজাচ মহাবিদ্যালয়ত সভাপতি, সম্পাদক, কেন্দ্ৰীয় পৰিষদৰ সদস্য আৰু আভ্যন্তৰীণ অভিযোগ সমিতিৰ দৰে গুৰুত্বপূৰ্ণ পদসমূহত এবিভিপিৰ প্ৰাৰ্থীসকলে বিপুল ভোটত জয়লাভ কৰিছে।
ইয়াৰ লগতে, শ্যামাপ্ৰসাদ মুখাৰ্জী মহাবিদ্যালয়ত সভাপতি আৰু কেন্দ্ৰীয় পৰিষদৰ সদস্য পদৰ লগতে কেশৱ মহাবিদ্যালয়ত সভাপতি, উপ-সভাপতি আৰু সম্পাদকৰ পদো এবিভিপিৰ দখললৈ গৈছে।
ইয়াৰ বিপৰীতে বাওঁপন্থী ছাত্ৰ সংগঠন ভাৰতৰ ছাত্ৰ ফেডাৰেচন বা এছ এফ আইয়ে দুখন মহাবিদ্যালয়ত নিজৰ স্থান দখল কৰিবলৈ সক্ষম হৈছে। দিল্লীৰ জাকিৰ হুছেইন মহাবিদ্যালয়ত যুগ্ম সম্পাদক পদত আৰু ভাস্কৰাচাৰ্য মহাবিদ্যালয়ত সভাপতি পদত এছ এফ আইৰ প্ৰাৰ্থীয়ে জয়লাভ কৰিছে।
উল্লেখযোগ্য যে মহাবিদ্যালয় পৰ্যায়ৰ এই নিৰ্বাচনৰ লগত দিল্লী বিশ্ববিদ্যালয়ৰ মূল ছাত্ৰ সংসদ বা ডুচুৰ নিৰ্বাচনৰ ফলাফলৰ লগত বিভ্ৰান্ত হ’ব নালাগে। বিশ্ববিদ্যালয়খনৰ চাৰিটা গুৰুত্বপূৰ্ণ পদ যেনে সভাপতি, উপ-সভাপতি, সম্পাদক আৰু যুগ্ম সম্পাদকৰ ভোটগণনা আৰু ফলাফল ১৯ ছেপ্টেম্বৰত প্ৰকাশ কৰা হ’ব।
