সৰ্বভাৰতীয় শ্ৰমিক সংগঠন চিতু (Centre of Indian Trade Unions) আৰু সদৌ ভাৰত কৃষক সভাই প্ৰধান মন্ত্ৰী মোদী-প্ৰতিশ্ৰুত ‘অচ্ছে দিন’ৰ সন্ধানত মঙলবাৰে ঘেৰাও কৰে গুৱাহাটীৰ সহকাৰী শ্ৰম আয়ুক্তৰ কাৰ্য্যালয়।
‘ক’ত লুকাই আছে প্ৰধান মন্ত্ৰী মোদীৰ অচ্ছে দিন? দেশৰ কৃষক, শ্ৰমিকৰ স্বাৰ্থৰ বিৰুদ্ধে কাম কৰাটোৱেই চৰকাৰৰ অচ্ছে দিন নেকি,’ বিজেপি নেতৃত্বাধীন কেন্দ্ৰ আৰু ৰাজ্যৰ দুয়োখন চৰকাৰে লোৱা কৃষক-শ্ৰমিকবিৰোধী নীতিৰ বিৰুদ্ধে সোচ্চাৰ হৈ প্ৰশ্ন দীৰ্ঘদিনীয়া শ্ৰমিক নেতা তপন শৰ্মাৰ।
চৰকাৰে দেশৰ মেহনতী কোটি কোটি নাগৰিকৰ স্বাৰ্থৰ সলনি ‘পুঁজিপতিৰ স্বাৰ্থৰ বাবে কাম কৰি আহিছে’, বুলিও দাবী কৰি শ্ৰমিক নেতা শৰ্মাই কয় যে ‘চৰকাৰে দেশত ‘সময় নিৰ্দিষ্ট নিয়োগ’ (Fixed term employment)ৰ প্ৰৱৰ্তনৰ চেষ্টা কৰিছে, যাৰ ফলত কোটি কোটি শ্ৰমিকৰ ক্ষতিগ্ৰস্ত হ’ব।’
ন্যূনতম মজুৰি আইন থকাৰ পিছতো কাৰ্য্যকৰী নকৰাৰ বাবেও শৰ্মাই চৰকাৰক তীব্ৰ সমালোচনা কৰে। ‘দেশৰ অ-পাৰ্গত শ্ৰমিকসকলৰ বাবে মাহে ১৮ হাজাৰ টকাৰ ন্যূনতম মজুৰি আমি দাবী কৰিছো,’ শৰ্মাৰ মন্তব্য।
কৃষকসকলৰ কল্যাণৰ বাবে স্বামীনাথন সমিতিৰ পৰামৰ্শাৱলী কাৰ্য্যকৰী কৰাৰ বাবে দাবী জনাইছে কৃষক সভাই। উল্লেখযোগ্য যে কেন্দ্ৰীয় চৰকাৰেই গঠন কৰা সমিতিখনে দিয়া পৰামৰ্শ চৰকাৰে কাৰ্য্যকৰী নকৰি বছৰ বছৰ ধৰি পেলাই ৰাখিছে।
আনহাতে শ্ৰমিকসকলৰ কল্যাণৰ বাবে বিজেপি চৰকাৰে উত্থাপন কৰা মটৰ বাহন (সংশোধন) বিধেয়ক, ২০১৭ বাতিলৰো দাবী জনাইছে সংগঠন দুটাই। উল্লেখযোগ্য যে এই বিধেয়ক বাতিলৰ দাবীত দেশৰ মটৰ মালিক আৰু শ্ৰমিকসকলেও প্ৰতিবাদ জনাই আহিছে।
অসমৰ লগতে সমগ্ৰ দেশৰ শ্ৰমিক-কৃষকৰ কল্যাণৰ বাবে সৰ্বভাৰতীয় সংগঠন দুটাই উলুবাৰীৰ সহকাৰী শ্ৰম আয়ুক্তৰ কাৰ্য্যালয়ত ১২ দফীয়া দাবী সম্বলিত এখন স্মাৰক পত্ৰও দাখিল কৰে।
বিজেপি চৰকাৰৰ শ্ৰমিক, কৃষক বিৰোধী নীতিৰ বিৰুদ্ধে অহা ৫ ছেপ্তেম্বৰত নতুন দিল্লীত ব্যাপক প্ৰতিবাদী সমাৱেশৰ কথাও দেওবাৰৰ প্ৰতিবাদত ঘোষণা কৰে শ্ৰমিক নেতা শৰ্মাই।
গুৱাহাটীৰ লগতে ডিব্ৰুগড়ৰ উপৰি ৰাজ্যৰ বিভিন্ন প্ৰান্তটো সংগঠন্কেইটাই মঙলবাৰে বিজেপি চৰকাৰৰ নীতিৰ বিৰুদ্ধে প্ৰতিবাদ জনায়।
