গুৱাহাটীৰ হাতীগাঁও অঞ্চলত ২৫ বছৰীয়া পত্নী ৰিয়া তালুকদাৰ গোস্বামীৰ হত্যাকাণ্ডৰ মূল অভিযুক্ত ৰামানুজন গোস্বামীক জিম্মাৰ পৰা পলাবলৈ চেষ্টা কৰাৰ সময়ত আৰক্ষীৰ এনকাউণ্টাৰত নিহত হোৱা বুলি জানিব পৰা গৈছে।
যোৱা ৬ ছেপ্টেম্বৰত বশিষ্ঠপুৰ বাইলেনত দম্পতীহালৰ ফ্লেটৰ ভিতৰত ৰিয়াক মৃত অৱস্থাত উদ্ধাৰ কৰা হৈছিল। তেওঁৰ পৰিয়াল আৰু ওচৰ-চুবুৰীয়াই দুৰ্গন্ধৰ বিষয়ে আৰক্ষীক জনোৱাৰ পিছত তৃতীয় মহলাৰ ফ্লেটটোৰ পৰা ৰিয়াৰ মৃতদেহ উদ্ধাৰ কৰা হয়।
ফৰেনছিক পৰীক্ষাত ৰিয়াক হত্যা কৰা বুলি নিশ্চিত হয়। আৰক্ষীয়ে সন্দেহ কৰিছে যে তেওঁৰ মূৰটো কাটি ফ্ৰীজৰ ভিতৰত ৰখা হৈছিল। আনহাতে তেওঁৰ আঙুলিবোৰো কাটি পেলোৱা বুলি জানিব পৰা গৈছে। এপাৰ্টমেণ্টটোৰ পৰা উদ্ধাৰ হৈছে এটা চোকা অস্ত্ৰ, সুৰাৰ বটল আৰু তেজৰ দাগ।
তদন্তকাৰীয়ে অনুমান কৰিছে যে মৃতদেহ উদ্ধাৰৰ ২৪ৰ পৰা ৪৮ ঘণ্টা পূৰ্বে হত্যাকাণ্ড সংঘটিত হৈছিল।
ফ্লেটটো বিশৃংখল অৱস্থাত পোৱাৰ লগতে আৰক্ষীয়ে ফৰেনছিক আৰু আঙুলিৰ ছাপৰ প্ৰমাণ পৰীক্ষা কৰিছে। চি আই ডিয়েও তদন্তত সহায় কৰিছে।
গ্ৰেপ্তাৰৰ পূৰ্বে গোস্বামী মূল সন্দেহজনক অভিযুক্ত হিচাপে আত্মপ্ৰকাশ কৰিছিল, যাৰ বাবে আৰক্ষীয়ে তেওঁক বিচাৰি অভিযান আৰম্ভ কৰিছিল।গোস্বামীয়ে পিছত হাতীগাঁও থানাত আত্মসমৰ্পণ কৰে আৰু আৰক্ষীয়ে তেওঁক জিম্মাত লয়।
খবৰ অনুসৰি, পুৱা প্ৰায় ৩ বজাত হাতীগাঁৱৰ পৰা গুৱাহাটী চিকিৎসা মহাবিদ্যালয় আৰু হাস্পাতললৈ আৰক্ষীয়ে তেজৰ পৰীক্ষাৰ বাবে লৈ গৈ থকা অৱস্থাত ৰামানুজে গাড়ীখনৰ পৰা পলায়ন কৰিবলৈ চেষ্টা কৰা বুলি অভিযোগ উঠিছে।
আৰক্ষীৰ বাহনখন কাহিলীপাৰাৰ মাজেৰে পাৰ হৈ যোৱাৰ সময়তে নৰকাসুৰ পাহাৰ অঞ্চলৰ সমীপত গোস্বামীয়ে জপিয়ায় বুলি জানিব পৰা গৈছে। ইয়াৰ পিছতে আৰক্ষীয়ে গুলীচালনা কৰে, যাৰ ফলত তেওঁৰ মৃত্যু হোৱা বুলি জানিব পৰা গৈছে।
প্ৰায় ছমাহ আগতে গোস্বামী আৰু ৰিয়াৰ বিয়া হৈছিল আৰু ফ্লেটটোত একেলগে থাকিবলৈ লৈছিল। এই হত্যাৰ অভিযোগৰ উদ্দেশ্য এতিয়াও নিশ্চিত হোৱা নাই।
গোস্বামীৰ মৃত্যুৰ পৰিস্থিতি সন্দৰ্ভত অধিক সবিশেষৰ বাবে অপেক্ষা কৰা হৈছে।
