মানৱীয়তাই বিপদত পেলাইছে অসমৰ এদল ডেকা-ডেকেৰীক।
এন আৰ চি নথি পুনৰীক্ষণ প্ৰক্ৰিয়াত অসুবিধাত পৰা একাংশ লোকক সহায়ৰ বাবে কঠোৰ পৰিশ্ৰম কৰা ডেকা-ডেকেৰীৰ গোটটোৰ বিৰুদ্ধে জনৈক দুলাল বৰাই এক অভিযোগ দাখিল কৰিছে।
বৰাৰ অভিযোগ, দলটোৱে মানুহৰ পৰা অবৈধভাৱে ধন সংগ্ৰহ কৰিছে আৰু এন আৰ চি প্ৰক্ৰিয়াটোৰ বিৰুদ্ধে চ’চিয়েল মিডিয়াত আপত্তিজনক মন্তব্য কৰিছে।
চূড়ান্ত এন আৰ চিৰ পূৰ্বে দলটোৱে চ’চিয়েল মিডিয়াৰ জৰিয়তে অসমত অস্থিৰতাৰ সৃষ্টি কৰিব বুলিও বৰাই অভিযোগ কৰিছে।
“নিজৰ ঘৰৰ পৰা ৩০০-৪০০ কিঃ মিঃ দূৰত উজনি অসমত আয়োজিত শুনানিত অংশগ্ৰহণ কৰিবলৈ নামনি অসমৰ অতি দুখীয়া কিছুমান লোকে ২৪ৰ পৰা ৪৮ ঘণ্টাৰ জাননী লাভ কৰিছিল। বেছিসংখ্যকেই আছিল শেহতীয়া বানত ক্ষতিগ্ৰস্ত লোক আৰু তেওঁলোকে নিজাববীয়াকৈ ইমান দূৰলৈ যাব পৰাকৈ সমৰ্থৱান নাছিল,” এন আৰ চিৰ শুনানিত অংশগ্ৰহণ নিশ্চিত কৰাৰ বাবে লোকসকলক তেওঁলোকে সহায় কৰা বুলি উল্লেখ কৰি আশ্ৰাফুল হুছেইনে কয়।
“একধৰণৰ হেল্পলাইন মুকলি কৰি আমি এনে কিছুমান লোকক কেৱল সহায় কৰাৰ চেষ্টা কৰিছিলো। আমি দুৰ্গত লোকসকলক সহায় কৰিব পৰাকৈ ৰাজ্যৰ বিভিন্ন ঠাইৰ লোকে আমাক বেংক একাউণ্টত ধন দান কৰিছিল,” লোকসকলক তেওঁলোকে দিনে-নিশাই সহায় কৰা বুলি উল্লেখ কৰি হুছেইনে কয়।
“এই লোকসকলৰ আশী শতাংশই দাৰিদ্ৰ্য সীমাৰেখাৰ তলৰ আৰু উজনিত আয়োজিত শুনানিত অংশ ল’বলৈ তেওঁলোকে নিজৰ মাটি, পশুধন আৰু গহনা-গাঠৰি বিক্ৰী কৰিব লগা হৈছিল,” তেওঁ কয়।
“আমাৰ সদস্যসকলে এই লোকসকলৰ যাতায়াতৰ বাবে গাড়ী ভাৰা কৰাত সহায় কৰিছিলো আৰু উজনি অসমত থকা আমাৰ কিছুমান বন্ধুৱে গোটেই ৰাতি এই লোকসকললৈ ৰৈ আছিল আৰু তেওঁলোকক খাদ্য আৰু দিহা-পৰামৰ্শ দই সহায় কৰিছিল। আমি মানৱতাৰ খাতিৰত এই কাম কৰিছিলো,” তেওঁ কয়।
বৰাই তেওঁৰ অভিযোগত উল্লেখ কৰা সদস্যকেইগৰাকী হৈছে আশ্ৰাফুল হুছেইন, ৰেহানা চুলতানা, চফিকুল ইছলাম আৰু মৌচুমী চেতিয়া।
“আমি কেৱল এন আৰ চি প্ৰক্ৰিয়াটো সফলভাৱে পাৰ হোৱাটো বিচাৰিছো। মানুহক সহায় কৰাটো অপৰাধ নহয়। অৱশ্যে যিসকল সমাজকৰ্মীৰ বাবে সমাজসেৱা ধন ঘটাৰ আন এক পথ, তেওঁলোকে এই প্ৰকৃত বিষয়বোৰ বুজিব নোৱাৰে,” আৰক্ষীয়ে তদন্ত কৰিলে তেওঁলোকৰ বেংক একাউণ্টৰ সবিশেষ জনাবলৈ ভাল পাব বুলি উল্লেখ কৰি হুছেইনে কয়।
“আমি চ’চিয়েল মিডিয়াৰ কেতিয়াও অপব্যৱহাৰ কৰা নাই। আমি চ’চিয়েল মিডিয়াত আমাৰ অনুভৱ কিছুমানহে চেয়াৰ কৰিছিলো, যাতে কি ঘটি আছে তাৰ প্ৰতি আমি মানুহক সজাগ কৰিব পাৰো,” গোটটোৱে শেহতীয়া বিধ্বংসী বান আৰু গৰাখনীয়াত বেয়াকৈ ক্ষতিগ্ৰস্ত কিছুমান ভিতৰুৱা এলেকাত স্বাস্থ্য শিবিৰো আয়োজন কৰা বুলি সদৰী কৰি তেওঁ কয়।
