অসমত ক’ৰ’না ভাইৰাছৰ সংক্ৰমণৰ ফলত আজি পুনৰ তিনিগৰাকী লোকৰ মৃত্যু হয়।
আজি মৃত্যু হোৱা ব্যক্তি কেইগৰাকী হৈছে ক্ৰমে- ডিব্ৰুগড়ৰ কুন্তল গোস্বামী (৪৮), বৰপেটাৰ ধনঞ্জয় দাস (৬০) আৰু তিনিচুকীয়াৰ ছবিলাল গুৰুং (৮৯)।
স্বাস্থ্য মন্ত্ৰী হিমন্ত বিশ্ব শৰ্মাই ছ’চিয়েল মিডিয়াযোগে এই কথা উল্লেখ কৰি মৃত্যু হোৱা ব্যক্তি কেইগৰাকীৰ পৰিয়াললৈ সমবেদনা জ্ঞাপন কৰে।
আজি মৃত্যু হোৱা তিনিগৰাকী ব্যক্তিৰ সৈতে অসমত ক’ৰ’নাৰ সংক্ৰমণৰ ফলত মৃত্যু হোৱা মুঠ লোকৰ সংখ্যা ৯৫৭ গৰাকীলৈ বৃদ্ধি পালে।
ইপিনে, অসমত আজি নতুনকৈ ২০২ গৰাকী লোকৰ শৰীৰত নতুনকৈ ক’ৰ’না ভাইৰাছৰ উপস্থিতি ধৰা পৰে।
ৰাজ্যত আজি কৰা ২৪৩৫০ টা ক’ৰ’না পৰীক্ষাৰ ভিতৰত এইসকল লোক প’জিটিভ হয়।
আনহাতে, আজি ৰাজ্যত চিকিৎসাৰ অন্তত ৭৭১ গৰাকী ব্যক্তি ক’ৰ’নাৰ সংক্ৰমণৰ পৰা সুস্থ হৈ উঠে।
বৰ্তমান অসমত ৪৭৯৯ গৰাকী সক্ৰিয় কোভিড ৰোগী আছে আৰু কোভিডৰ পৰা আৰোগ্যৰ হাৰো ৯৭.২৫ শতাংশলৈ বৃদ্ধি পায়।
অসমত মুঠ ২০৯৮৩৫ গৰাকী লোক এতিয়ালৈ ক’ৰ’না ভাইৰাছৰ দ্বাৰা সংক্ৰমিত হোৱাৰ বিপৰীতে ২০৪০৭৬ গৰাকী লোক চিকিৎসাৰ অন্তত সুস্থ হৈ উঠিছে।