গুৱাহাটী মহানগৰীৰ জু-ৰোড অঞ্চলত যোৱা শুকুৰবাৰে মাজনিশা এক ভয়ংকৰ পথ দুৰ্ঘটনা সংঘটিত হয়। এই দুৰ্ঘটনাত জনপ্ৰিয় বলিউড অভিনেতা আশীষ বিদ্যাৰ্থী আৰু তেওঁৰ পত্নী ৰূপালী বৰুৱা আহত হৈছে।
ঘটনাৰ বিৱৰণি অনুসৰি, জু-ৰোডৰ দ্য গুৱাহাটী এড্ৰেছ হোটেলৰ সন্মুখত এই দুৰ্ঘটনাটো সংঘটিত হয়। জানিব পৰা মতে, এখন তীব্ৰবেগী এভেঞ্জাৰ মটৰচাইকেলে তেওঁলোকক খুন্দা মাৰে। মটৰচাইকেলখনৰ পঞ্জীয়ন নম্বৰ আছিল এএছ-০১-ডিৱাই-৫০৬১।
চান্দমাৰী দিশৰ পৰা অতি দ্ৰুতবেগত অহা মটৰচাইকেলখনে ৰাস্তা পাৰ হৈ থকা অৱস্থাতে দম্পতীটোক খুন্দা মাৰে। এই প্ৰচণ্ড খুন্দাৰ ফলত অভিনেতাগৰাকী আৰু তেওঁৰ পত্নী দুয়ো আঘাতপ্ৰাপ্ত হয়।
ইফালে দুৰ্ঘটনাটোত মটৰচাইকেল আৰোহীজনো গুৰুতৰভাৱে আহত হৈছে। ঘটনাৰ খবৰ পোৱাৰ লগে লগে গীতানগৰ আৰক্ষী থানাৰ এটা দল ঘটনাস্থলীত উপস্থিত হয় আৰু পৰিস্থিতি চম্ভালে।
আৰক্ষীয়ে আহত মটৰচাইকেল আৰোহীজনক উন্নত চিকিৎসাৰ বাবে লগে লগে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰে। অভিনেতা আশীষ বিদ্যাৰ্থী আৰু পত্নী ৰূপালী বৰুৱাকো প্ৰয়োজনীয় চিকিৎসা প্ৰদান কৰা হৈছে।
সূত্ৰই জনোৱা মতে, জু-তিনিয়ালিৰ সমীপত থকা দ্য গুৱাহাটী এড্ৰেছ ৰেষ্টুৰেণ্টত নিশাৰ আহাৰ গ্ৰহণ কৰি তেওঁলোক দুয়ো বাহিৰলৈ ওলাই আহিছিল আৰু তেনে সময়তে এই অঘটন ঘটে।
উল্লেখ্য যে আশীষ বিদ্যাৰ্থী কেৱল এজন প্ৰতিষ্ঠিত অভিনেতাই নহয়, বৰ্তমান তেওঁ এজন অতি জনপ্ৰিয় ফুড এণ্ড ট্ৰেভেল ভ্লগাৰ হিচাপেও পৰিচিত। তেওঁ নিজৰ ইউটিউব চেনেলৰ জৰিয়তে অসম তথা উত্তৰ-পূৰ্বাঞ্চলৰ বিভিন্ন স্থানৰ ভ্ৰমণ আৰু খাদ্যৰ ভিডিঅ’ প্ৰস্তুত কৰি দৰ্শকৰ মাজত সমাদৰ লাভ কৰিছে।
বৰ্তমান ইউটিউবত তেওঁৰ প্ৰায় ২৪ লাখ চাবস্ক্ৰাইবাৰ আছে। শেহতীয়াকৈ তেওঁ অসমৰ বিভিন্ন ঠাইত ভ্ৰমণ কৰি ইয়াৰ পৰ্যটন আৰু খাদ্যৰ প্ৰচাৰত মনোনিবেশ কৰিছিল।
