বৰদৈচিলাই চুক্তি ভংগ কৰা অভিনেত্ৰী প্ৰাঞ্জনা দত্তক চুক্তিবদ্ধ কৰাৰ বাবে আগবাঢ়ি আহিল ৰাজমুকুট থিয়েটাৰ
২০১৯-২০ বৰ্ষৰ বাবে ভ্ৰাম্যমাণ থিয়েটাৰ বৰদৈচিলাৰ সৈতে চুক্তিবদ্ধ হোৱা অসমীয়া ভ্ৰাম্যমাণ জগতৰ শক্তিশালী অভিনেত্ৰী প্ৰাঞ্জনা দত্তৰ চুক্তি থিয়েটাৰখনৰ প্ৰযোজক নজৰুল ইছলামে বাতিল কৰাৰ পাছত ৰাজমুকুট থিয়েটাৰে ২০১৯-২০ বৰ্ষৰ বাবে অভিনেত্ৰীগৰাকীক চুক্তিবদ্ধ কৰিছে।
উল্লেখযোগ্য যে, এখন বিশেষ নাটকৰ প্ৰতি থকা কিছু আপত্তিৰ পৰিপ্ৰেক্ষিতত অভিনেত্ৰীগৰাকীৰ সৈতে থকা চুক্তি বাতিল কৰিছিল বৰদৈচিলা থিয়েটাৰৰ প্ৰযোজকে। এই সম্পৰ্কত গুৱাহাটী প্ৰেছ ক্লাৱত এখন সংবাদমেল আয়োজন কৰি সমগ্ৰ ঘটনা বৰ্ণনা কৰি কান্দোনত ভাঙি পৰিছিল অভিনেত্ৰীগৰাকী।
প্ৰাঞ্জনা দত্তৰ সপক্ষত থিয় দি অভিনেতা ৰবি শৰ্মাইয়ো থিয়েটাৰ কৰ্তৃপক্ষৰ বিৰুদ্ধে মুকলিকৈ বিষোদগাৰ প্ৰকাশ কৰিছিল আৰু তাৰপাছতে ৰাজমুকুট থিয়েটাৰৰ প্ৰযোজক মানস কলিতাই অভিনেত্ৰী প্ৰাঞ্জনা দত্তক আগশাৰীৰ নাট্যদলটোৰ সৈতে চুক্তিবদ্ধ কৰিবলৈ আগবাঢ়ি আহে।
ৰাজমুকুট থিয়েটাৰত আগন্তুক নাট্যবৰ্ষত প্ৰাঞ্জনা দত্তৰ লগতে জনপ্ৰিয় মঞ্চ তথা চলচ্চিত্ৰ অভিনেতা কপিল বৰা, ৰাজকুমাৰ, নৱাগত অভিনেত্ৰী অলিম্পিকা গোস্বামী আদিৰ দৰে অভিনেতা-অভিনেত্ৰী চুক্তিবদ্ধ হৈছে।
আগন্তুক বৰ্ষত সুস্থ ৰুচিবোধৰ নাটকেৰে দৰ্শকক আকৰ্ষণ কৰাৰ লক্ষ্য বান্ধি লোৱা নাট্যদলটোৰ ৰাজদ্বীপৰ ‘বন্ধুৰ বাগদত্তা’ নামৰ নাটকখনে ইতিমধ্যে দৰ্শকৰ মাজত চৰ্চা লাভ কৰিবলৈ সক্ষম হৈছে।