বিশেষ এবিধ ভাইৰাছৰ দ্বাৰা আক্ৰান্ত হৈ ৰাজ্যিক চিৰিয়াখানাত ৮টা শিয়ালৰ মৃত্যু হোৱাৰ পাছত আজি মুখ্য মন্ত্ৰী সৰ্বানন্দ সোণোৱালে চিৰিয়াখানাখন হঠাতে পৰিদৰ্শন কৰাৰ পিছতেই এই সন্দৰ্ভত গুৰুতৰ কিছুমান অভিযোগ আনিছে চিৰিয়াখানা সুৰক্ষা মঞ্চই।
চিৰিয়াখানা সুৰক্ষা মঞ্চৰ সাধাৰণ সম্পাদক ৰাজকুমাৰ বৈশ্যই কয় যে যোৱা ১৫ আগষ্টৰ স্বাস্থ্য শিবিৰ অনুষ্ঠিত কৰাৰ পাছৰ পৰা বহু সংখ্যক জীৱ-জন্তুৰ মৃত্যু হৈছে। কিন্তু ঘটনাটোৰ প্ৰকৃত তথ্য প্ৰকাশ কৰাৰ পৰা বিৰত আছে চিৰিয়াখানা কৰ্তৃপক্ষ।
তেওঁ দাবী কৰে যে যোৱা ১৭ আগষ্টৰ পৰা বৰ্তমানলৈকে চিৰিয়াখানাত মুঠ ৩৯টা জীৱ-জন্তুৰ মৃত্যু হৈছে।
তেওঁৰ মতে, ১৭ আগষ্টত ২২ টা (হায়েনা, হৰিণ, শিয়াল, চৰাই), ১৮ আগষ্টত ৮টা (হায়েনা, শিয়াল, শগুন), ১৯ আগষ্টত ৫টা (শগুন, শিয়াল), ২০ আগষ্টত (২টা শগুন), ২১ আগষ্টত ২টা শগুন। সৰ্বমুঠ ৩৯ টা জীৱ-জন্তু মৰিছে।
আনহাতে তেওঁ অভিযোগ কৰি কয়, “মুখ্য মন্ত্ৰীয়ে ডি এফ অ’গৰাকীৰ কথাকে বিশ্বাস কৰি হয়ভৰ দিয়াৰ পৰা এটা কথাই স্পষ্ট হ’ল যে তেওঁ চিৰিয়াখানাখনক ৰক্ষণাবেক্ষণ দিয়াৰ পৰিৱৰ্তে ডি এফ অ’ আৰু অন্যান্য বিষয়াসকলক ৰক্ষণাবেক্ষণ দিয়াৰ বাবেহে চিৰিয়াখানা পৰিদৰ্শনৰ বাবে আহিছিল।”
বৈশ্যই দাবী কৰে যে চাৰিটা ঢেঁকীয়াপতীয়া বাঘ বৰ্তমানো সংকটজনক অৱস্থাত আছে।
উল্লেখযোগ্য যে ৰাজ্যিক চিৰিয়াখানা কৰ্তৃপক্ষৰ মতে, চিৰিয়াখানাত কেনাইন জিছটেম্পাৰ ভাইৰাছৰ আক্ৰমণৰ ফলত যোৱা ১০ দিনত ৮টাকৈ শিয়ালৰ মৃত্যু হৈছে।
এই ঘটনাৰ বাতৰি সম্প্ৰচাৰ হৈ থকাৰ মাজতে আজি বিয়লি ৪:৩০ বজাত মুখ্য মন্ত্ৰী সৰ্বানন্দ সোণোৱাল হঠাৎ উপস্থিত হয় অসম ৰাজ্যিক চিৰিয়াখানাত।
মুখ্য মন্ত্ৰীয়ে প্ৰায় আধাঘণ্টা সময় খোজ কাঢ়ি চিৰিয়াখানাখন পৰিদৰ্শন কৰে আৰু চিৰিয়াখানাৰ জীৱ-জন্তুসমূহৰ অৱস্থাৰ বুজ লয়।
পৰিদৰ্শন কালছোৱাত মুখ্য মন্ত্ৰীগৰাকীয়ে চিৰিয়াখানাত এটা গৱেষণা আৰু প্ৰশিক্ষণ কেন্দ্ৰ স্থাপন কৰা হ’ব বুলি সংবাদ মাধ্যমৰ আগত ঘোষণা কৰে।
এই সম্পৰ্কত তেওঁ কয় “অসমৰ ছাত্ৰ-ছাত্ৰীসকলৰ জীৱ-জন্তু তথা গছ-গছনিসমূহৰ বিষয়ে জ্ঞান আহৰণ আৰু তেওঁলোকৰ মাজত এইবোৰৰ সংৰক্ষণৰ সজাগতা সৃষ্টি কৰিবলৈ উন্নত মানৰ গৱেষণা আৰু প্ৰশিক্ষণ কেন্দ্ৰ স্থাপন কৰা হ’ব।”
পৰিদৰ্শন কালছোৱাত মুখ্য মন্ত্ৰীগৰাকীয়ে ৮টাকৈ শিয়ালৰ মৃত্যুৰ বিষয়টোত উদ্বিগ্নতা প্ৰকাশ কৰি কয়, “চিৰিয়াখানাৰ পৰিৱেশ ঠিক কৰাৰ প্ৰয়োজন আছে। আগন্তুক দিনত এনে ধৰণৰ ঘটনা যাতে নঘটে, তাৰ প্ৰতি দৃষ্টি ৰাখি অত্যাধুনিক সা-সুবিধা তথা চিকিৎসাৰ ব্যৱস্থা কৰা হ’ব।”
ইফালে চিৰিয়াখানাৰ পশু চিকিৎসক ডাঃ পঞ্চমী শৰ্মাই সংবাদ মাধ্যমক জনোৱা অনুসৰি এই কেনাইন ডিছটেম্পাৰ ভাইৰাচ এবিধ মাৰাত্মক ভাইৰাছ, ই অতি তৎক্ষণাৎ অন্য জীৱ-জন্তুলৈ বিয়পি পৰে। এই বেমাৰৰ আগতীয়া কোনো লক্ষণ নাথাকে আৰু এই বেমাৰে পোনপটীয়াকৈ মগজুত আক্ৰমণ কৰে। তেতিয়াই জীৱ-জন্তুবিলাকে ঠাইতে ঘূৰি ঘূৰি মৃত্যুক সাৱটি লয়।