সামৰিক জুণ্টাই চলিত বৰ্ষৰ ১ ফেব্ৰুৱাৰীৰ দিনা গণতান্ত্ৰিক শাসন ওফৰাই ক্ষমতাৰ বাঘজৰী হস্থগত কৰা ম্যানমাৰত বন্দৰ নিৰ্মাণৰ কাম কৰিবলৈ গৈ এতিয়া বিশ্ব সম্প্ৰদায়ৰ গৰিহণাৰ পাত্ৰ হৈ পৰিছে গুজৰাটৰ ব্যৱসায়ী গৌতম আদানি মালিকানাধীন আদানি পোৰ্ট নামৰ সংস্থাটো।
আদানি পোৰ্টে ম্যানমাৰৰ য়াংগুনত এটা কণ্টেইনাৰ টাৰ্মিনেল নিৰ্মাণৰ বাবে ঠিকা লাভ কৰিছিল।
ম্যানমাৰৰ জুণ্টাই নিৰ্ধাৰণ কৰি দিয়া স্থানতে আদানি পোৰ্টে সেই টাৰ্মিনেল নিৰ্মাণ কৰিব লাগে যদিও বিশ্ব সম্প্ৰদায়ৰ সমোলোচনাৰ বাবে আদানিয়ে কামত হাত দিব পৰা নাই।
ইপিনে সেই ঠিকা বাতিল কৰি নে নাই তাকে লৈয়ো সিদ্ধান্ত ল’ব পৰা নাই আদানি পোৰ্টে। এতিয়া আদানিয়ে সমগ্ৰ বিষয়টো এৰি দিছে আমেৰিকাৰ ওপৰত।
যদি আমেৰিকাই জুণ্টা শাসিত ম্যানমাৰৰ বিৰুদ্ধে নিষেধাজ্ঞা জাৰি কৰে তেন্তে আদানি গ্ৰুপেও ম্যানমাৰত টাৰ্মিনেল নিৰ্মাণৰ বিষয়টো সন্দৰ্ভত নতুনকৈ চিন্তা কৰিব।
শেহতীয়াকৈ নৰ’ৱেৰ পেঞ্চন ফাণ্ড কেএলপিয়ে জুণ্টা শাসিত ম্যানমাৰৰ উক্ত প্ৰকল্পটোত বিনিয়োগ নকৰিবলৈ লোৱা সিদ্ধান্তৰ পিছতে আদানি পোৰ্টে এই বিষয়ত এক বিবৃতি প্ৰকাশ কৰিছে।
বিবৃতিত কোৱা হৈছে যে কোম্পানীটোৱে আমেৰিকাৰ অফিচ অব দ্য ফৰেইন এছেট কণ্ট্ৰলৰ সৈতে কথা পাতি আছে আৰু আমেৰিকাই ম্যানমাৰৰ বিৰুদ্ধে নিষেধাজ্ঞা আৰোপ কৰিলেই তাৰ অচিলালৈ আদানি পোৰ্টেও দেশ খনত কাম বন্ধ কৰিব পাৰিব।উল্লেখ্য ম্যানমাৰৰ উক্ত প্ৰকল্পটোত নিউজিলেণ্ডৰ কেএলপিৰ অংশীদাৰিত্বৰ পৰিমাণ হৈছে ১.০৫ লাখ ইকুইটি।
আদানিয়ে লহতে ম্যানমাৰৰ সমৰিক জুণ্টাৰ সৈতে ৫২ নিযুত মাৰ্কিন ডলাৰৰ বন্দৰ নিৰ্মাণ চুক্তি কৰাৰ বাতৰিও অস্বীকাৰ কৰিছে।
উল্লেখ্য ভাৰতৰ সৰ্ববৃহৎ বন্দৰ নিৰ্মাণ প্ৰতিষ্ঠান আদানি পোৰ্টে বিদেশতো কাম কৰি আহিছে। এনেদৰে কোৰোণাৰে ধন চপাইছে গুজৰাটী ব্যৱসায়ী গৌতম আদানিয়ে।
শেহতীয়াকৈ তেওঁ এছিয়াৰ আটাইতকৈ ধনী ব্যক্তি ব্যক্তি হিচাপে দ্বিতীয় স্থানলৈ উন্নীত হৈছে।
এইক্ষেত্ৰত তেওঁ অতিক্ৰম কৰে চীনৰ বিলিয়নাৰ ঝং শ্বেনশ্বানক।
ব্লুমবাৰ্গ বিলিয়নাৰ্ছ ইনডেক্সে প্ৰকাশ কৰা বিশ্বৰ আটাইতকৈ ধনী ব্যক্তিৰ শেহতীয়া তালিকাখনত আদানিয়ে বিশ্বৰ ভিতৰত ১৪ নম্বৰ স্থানলৈ আৰোহণ কৰিছিল।
অৱশ্যে এতিয়া তেওঁৰ স্থান অৱনমিত হ’ব পাৰে বুলি আলোচনা হৈছে।
আদানি গ্ৰুপৰ প্ৰতিষ্ঠাপক আৰু প্ৰমোটাৰ গৌতম আদানিৰ সম্পত্তিৰ পৰিমাণ হৈছে ৬৭.৮ বিলিয়ন ডলাৰ।
উল্লেখযোগ্য যে মুকেশ আম্বানীৰ পাছতে ভাৰতৰ আটাইতকৈ ধনী ব্যক্তি হিচাপে স্থান লাভ কৰা গৌতম আদানিৰ সম্পত্তিৰ পৰিমাণ চলিত বৰ্ষতে ১০০ শতাংশ বৃদ্ধি হৈছে।
