এছ’চিয়েশ্যন ফৰ ডেম’ক্ৰেটিক ৰিফৰ্মছৰ (এডিআৰ) এক প্ৰতিবেদন অনুসৰি ৰাজ্যসভাৰ বৰ্তমান প্ৰায় ৩২শতাংশ সাংসদে তেওঁলোকৰ বিৰুদ্ধে অপৰাধমূলক গোচৰ থকাৰ কথা ঘোষণা কৰাৰ বিপৰীতে ১৪ শতাংশ সাংসদ কোটিপতি।
ৰাজ্যসভাৰ ২৩৩ গৰাকী সাংসদৰ ভিতৰত ২২৯ গৰাকীৰ শপতনামাৰ বিশ্লেষণৰ ভিত্তিত এই প্ৰতিবেদন প্ৰস্তুত কৰা হৈছে। বৰ্তমান ঝাৰখণ্ডৰ পৰা এখন আসন খালী হৈ থকাৰ বিপৰীতে তিনিজন সাংসদৰ শপতনামা উপলব্ধ নাছিল। এই বিশ্লেষণত শেহতীয়াকৈ নিৰ্বাচিত হোৱা ৩৭ জন সদস্যকো অন্তৰ্ভুক্ত কৰা হৈছে।
তেওঁলোকে বিশ্লেষণ কৰা ২২৯ জন সাংসদৰ ভিতৰত ৭৩ জনে (৩২%) অপৰাধমূলক গোচৰৰ কথা ঘোষণা কৰিছে, ইয়াৰে ৩৬ জন (১৬%) সাংসদৰ বিৰুদ্ধে গুৰুতৰ অভিযোগ আছে। এজন সাংসদে হত্যাৰ গোচৰৰ কথা ঘোষণা কৰিছে, চাৰিজনৰ বিৰুদ্ধে আছে হত্যাৰ চেষ্টাৰ গোচৰ, তিনিজনৰ বিৰুদ্ধে আছে মহিলাৰ বিৰুদ্ধে অপৰাধ সম্পৰ্কীয় গোচৰ আছে।
দলভিত্তিকভাৱে বিজেপিৰ ৯৯ জন সাংসদৰ ভিতৰত ২৭ জন, কংগ্ৰেছৰ ২৮ জন সাংসদৰ ভিতৰত ১২ জন, তৃণমূল কংগ্ৰেছৰ ১৩ জন সাংসদৰ ভিতৰত ৪ জন, আপৰ ১০ জন সাংসদৰ ভিতৰত ৪ জন সাংসদে অপৰাধমূলক গোচৰৰ কথা ঘোষণা কৰিছে। চিপিআই(এম) আৰু বিআৰএছৰ তিনিজনকৈ সাংসদে অপৰাধমূলক গোচৰৰ তথ্য প্ৰকাশ কৰিছে। প্ৰতিবেদনত ৩১ জন সাংসদৰ (১৪%) কৌটি কোটি টকাৰ সম্পত্তি থকাৰ তথ্যও পোৱা গৈছে।
প্ৰধান দলসমূহৰ ভিতৰত বিজেপিৰ ছয়জন সাংসদ, কংগ্ৰেছৰ ৫জন সাংসদ, ৱাইএছআৰচিপিৰ চাৰিজন সাংসদ, আপৰ দুজন সাংসদ, বিআৰএছৰ দুজন সাংসদ, এনচিপিৰ তিনিজন সাংসদে ১০০ কোটিতকৈ অধিক সম্পত্তি ঘোষণা কৰিছে। ৰাজ্যসভাৰ এগৰাকী সাংসদৰ গড় সম্পত্তি ১২০.৬৯ কোটি টকা।
প্ৰধান দলসমূহৰ ভিতৰত প্ৰতিজন সাংসদৰ গড় সম্পত্তি বিজেপিৰ ২৮.২৯ কোটি, কংগ্ৰেছৰ ১২৮.৬১ কোটি, টিএমচিৰ ১৭.৭০ কোটি, আৰু আপৰ ৫৭৪.০৯ কোটি টকা। আন আন দলসমূহৰ ভিতৰত আছে ৱাই এছ আৰ চি পি (৫২২.৬৩ কোটি টকা), এছ পি (৩৯৯.৭১ কোটি টকা), বিজেডি (১০৫.৬৩ কোটি টকা), আৰু ডি এম কে (১১.৯০ কোটি টকা)।
বি আৰ এছৰ সাংসদ বন্দী পাৰ্থ সাৰাধিয়ে সৰ্বাধিক ৫৩০০ কোটি টকাতকৈ অধিক সম্পত্তি ঘোষণা কৰিছে, তাৰ পিছতে আপৰ ৰাজিন্দৰ গুপ্তাই ৫,০৫৩ কোটি টকাতকৈ অধিক, আৰু ৱাই এছ আৰ চি পিৰ আল্লা অযোধ্যা ৰামি ৰেড্ডীয়ে ২,৫৭৭ কোটিৰো অধিক সম্পত্তি ঘোষণা কৰিছে।
আনহাতে, আপৰ সাংসদ সন্ত বলবীৰ সিং আটাইতকৈ দৰিদ্ৰ সাংসদ, তেওঁৰ আছে প্ৰায় ৩ লাখ টকাৰ সম্পত্তি। তেওঁৰ পিছতে মণিপুৰৰ মহাৰাজা সনাজাওবা লেইচেম্বাই প্ৰায় ৫ লাখ টকা, আৰু টিএমচিৰ প্ৰকাশ চিক বৰাইকৰ প্ৰায় ৯ লাখ টকাৰ সম্পত্তি আছে।
