শুকুৰবাৰে লোকসভাৰ মজিয়াত কংগ্ৰেছৰ সংসদীয় দলৰ নেতা অধীৰ ৰঞ্জন চৌধুৰীয়ে সংবাদ প্ৰতিষ্ঠানক চৰকাৰী বিজ্ঞাপন বন্ধ কৰি কেন্দ্ৰীয় চৰকাৰে সংবাদ মাধ্যমক দমণ কৰিবলৈ বিচৰা বুলি গুৰুতৰ অভিযোগ উত্থাপন কৰি বিষয়টো উত্থাপন কৰে।
অসমৰ সংবাদ গোষ্ঠী আছাম ট্ৰিবিউনেও চৰকাৰৰ এনেধৰণৰ বঞ্চনাৰ সন্মুখিন হ’বলগীয়া হৈছে বুলি বাতৰি প্ৰকাশ কৰিছে।
চৌধুৰীয়ে লোকসভাৰ শূন্যকালত বিষয়টো উত্থাপন কৰি সকলোৰে মনোযোগ আকৰ্ষণ কৰিবলৈ চেষ্টা কৰে। চৌধুৰীৰ লগতে পশ্চিম বংগৰ ত্ৰিণামূল কংগ্ৰেছৰ সাংসদ মহুৱা মৈত্ৰয়ো এন ডি এ চৰকাৰক সমালোচনা কৰি সংবাদ মাধ্যমক বিজ্ঞাপনৰ বাবে দিয়া হিচাপ জানিব বিচাৰে বুলি উল্লেখ কৰে।
উল্লেখযোগ্য যে, ডি এ ভি পিয়ে কেন্দ্ৰীয় চৰকাৰ আৰু ৰাজহুৱা খণ্ডৰ প্ৰতিষ্ঠানৰ বিজ্ঞাপন সংবাদ প্ৰতিষ্ঠানলৈ প্ৰেৰণ কৰাৰ ন’ডেল এজেঞ্চী।
আনহাতে, ডি এ ভি পিয়ে বিগত ফেব্ৰুৱাৰী মাহৰ পৰা বিভাগীয় কৰ্তৃপক্ষৰ নিৰ্দেশ মৰ্মে ‘আছাম ট্ৰিবিউন’ক বিজ্ঞাপন দিয়া বন্ধ কৰি থৈছে। ইয়াৰ কাৰণ জানিব বিচৰাত নাগৰিকত্ব সংশোধনী বিধেয়কৰ বিৰুদ্ধে আছাম ট্ৰিবিউন প্ৰতিষ্ঠানে গ্ৰহণ কৰা স্থিতিৰ বাবে প্ৰতিষ্ঠানটোৰ বিৰুদ্ধে এনে কঠোৰ সিদ্ধান্ত এন ডি এ চৰকাৰে গ্ৰহণ কৰিছে বুলি আজি দৈনিক অসমত প্ৰতিষ্ঠানটোৱে বাতৰি প্ৰকাশ কৰিছে।
এই ক্ষেত্ৰত ডি এ ভি পিৰ লগত প্ৰতিষ্ঠানটোৰ তৰফৰ পৰা যোগাযোগ কৰাত তেওঁলোকে এই ক্ষেত্ৰত এয়া ৰাজনৈতিক বিষয় বুলি গা এৰা দিয়ে।
লোকসভাত শুকুৰবাৰে এই প্ৰসংগলৈ বিৰোধী শিবিৰে প্ৰধানমন্ত্ৰীক কঠোৰ সমালোচনা কৰি গণতান্ত্ৰিক দেশত সংবাদ মাধ্যমৰ স্বাধীনতা ৰক্ষাৰ বাবে চৰকাৰ আগবাঢ়ি আহিব লাগে বুলি মন্তব্য কৰে।
লোকসভাত দেশৰ উল্লেখযোগ্য সংবাদ গোষ্ঠী দ্যা হিন্দু, টাইমছ অব ইণ্ডিয়া, টেলিগ্ৰাফ আদিত চৰকাৰৰ বিৰুদ্ধে ৰাফেল চুক্তি আদি বিষয়ত বাতৰি প্ৰকাশ কৰাৰ উদাহৰণ দিয়ে বিৰোধীসকলে।
