ভূমিকম্পৰ ৩৬ ঘন্টাৰ অন্তত যেতিয়া সাহায্য আৰু উদ্ধাৰকাৰী দলটোৱে আফগানিস্তানৰ প্ৰায় বিধ্বস্ত কুনাৰ প্ৰদেশত উপস্থিত হয়, তেতিয়া ১৯ বছৰীয়া বিবি আইছাই ভাবিছিল যে এইবাৰ হয়তো তেওঁৰ জীৱন ৰক্ষা পৰিব। তেওঁ খাদ্য, পানী আৰু চিকিৎসা লাভ কৰিব। কিন্তু, যেতিয়া তেওঁ দেখিলে যে উদ্ধাৰকাৰী দলটোৰ সকলো পুৰুষ, তেতিয়া তেওঁৰ ভাগ্য যেন চকুৰ সন্মুখতে দেখা পালে।
আফগানিস্তানত হোৱা ভূমিকম্পত মৃত্যু হোৱা লোকৰ সংখ্যা ২২০০ অতিক্ৰম কৰিছে। আহতসকলৰ সংখ্যা ৩৫০০ৰো অধিক। উদ্ধাৰৰ কাম এতিয়াও চলি আছে যদিও পুৰুষ প্ৰধান দলৰ অচিনাকি মানুহক স্পৰ্শ কৰাৰ কোনো উপায় নাই। যাৰ বাবে বহু ছোৱালী, যুৱতী, মহিলা ধ্বংসাৱশেষৰ মাজত আবদ্ধ হৈ আছে, কিন্তু তেওঁলোকক উলিয়াই নিয়াৰ ব্যৱস্থা কৰা হোৱা নাই।
বাহিৰলৈ ওলাই আহিবলৈ সক্ষম হোৱা বহুতৰে তেজ ওলাই আছে যদিও চিকিৎসা লাভ কৰা নাই। উদ্ধাৰকাৰীয়ে কেৱল কাপোৰত ধৰি মৃত মহিলাকেইগৰাকীক বাহিৰলৈ উলিয়াই আনিছে। কাৰণ, তালিবান শাসনৰ অধীনত অচিনাকি মানুহৰ অচিনাকি মহিলাক স্পৰ্শ কৰাৰ অধিকাৰ নাই।
নিউয়ৰ্ক টাইমছক আয়েছাই কয় যে, “তেওঁলোকে আমাক এটা চুকত ৰাখিছে আৰু সম্পূৰ্ণৰূপে পাহৰি গৈছে যে আমিও এই দেশৰ মানুহ। আমি ইয়াত বাস কৰো।” আয়েছাই কয় যে উদ্ধাৰকাৰীয়ে আহত লোক আৰু শিশুক শিবিৰলৈ লৈ গৈ আছে। কিন্তু ৰক্তাক্ত, আহত মহিলাসকল ধ্বংসাৱশেষত পৰি আছে, কিন্তু তেওঁলোকক স্পৰ্শ কৰা হোৱা নাই। কাৰো চিকিৎসা কৰা হোৱা নাই।
তালিবান শাসিত আফগানিস্তানত আত্মীয় নহ’লে পুৰুষ বা মহিলাক স্পৰ্শ কৰাটো অবৈধ। তাৰ বাবে কঠোৰ শাস্তি আছে। অৰ্থাৎ কোনো পুৰুষ উদ্ধাৰকাৰীয়ে আয়েছাক স্পৰ্শ নকৰে। আয়েছাৰ দৰে শ শ মহিলাই মৃত্যুৰ সৈতে যুঁজি আছে। মাজাৰ ডেৰাৰ ওচৰত এজন স্বেচ্ছাসেৱকে কয় যে তেওঁ এতিয়াও জীয়াই থকা মহিলাসকলক দেখিছে, আৱদ্ধ হৈ আছে। কাৰণ কোনেও আইন ভংগ কৰি নাৰীক চিকিৎসা কৰা নাই।
৩৩ বছৰীয়া স্বেচ্ছাসেৱকগৰাকীয়ে কয় যে প্ৰথমে পুৰুষ আৰু শিশুৰ চিকিৎসা কৰা হৈছে। নাৰীক এটা চুকত ৰখা হৈছে। যদি কোনো পুৰুষ আত্মীয়ৰ সন্ধান পোৱা নাযায় তেন্তে মৃত মহিলাসকলক কাপোৰত ধৰি টানি লৈ গৈছে।
এই সন্দৰ্ভত তালিবান শাসিত প্ৰশাসনৰ স্বাস্থ্য প্ৰতিনিধিয়েও স্বীকাৰ কৰে যে উদ্ধাৰকাৰী দলটোত থকা মহিলাৰ সংখ্যা অতি তুচ্ছ। চৰকাৰে অধিক মহিলা চিকিৎসক আৰু নাৰ্ছ প্ৰেৰণৰ চেষ্টা চলাইছে। কিন্তু বাস্তৱতা হ’ল ভূমিকম্পৰ চাৰিদিন পিছতো কোনো মহিলা উদ্ধাৰকাৰী বা চিকিৎসক আয়েছাহঁতৰ গাঁৱত উপস্থিত হোৱা নাই।
