অসমত আফ্ৰিকান ছোৱাইন ফিভাৰ (African Swine Fever – ASF)-এ ভয়ংকৰ ৰূপ ধাৰণ কৰিছে। এই ৰোগৰ সংক্ৰমণ প্ৰতিৰোধৰ বাবে পশুপালন বিভাগে হাজাৰ হাজাৰ গাহৰি নিধন কৰিছে, যাৰ ফলত ৰাজ্যৰ ১০ লাখতকৈ অধিক গাহৰি পালকৰ জীৱনলৈ দুৰ্যোগ নামি আহিছে। প্ৰতিবছৰে ASF-ত লোকচানৰ সন্মুখীন হৈ অহা গাহৰি পালকসকলে এইবাৰো উপযুক্ত ব্যৱস্থা আৰু ক্ষতিপূৰণ নিদিয়াৰ বাবে চৰকাৰ আৰু বিভাগৰ বিৰুদ্ধে ক্ষোভ উজাৰিছে।
শিৱসাগৰ প্ৰেছ ক্লাবত আয়োজিত এক সংবাদমেলত কৃষক মুক্তি সংগ্ৰাম সমিতি (KMSS) আৰু সদৌ অসম গাহৰি পালক সন্থাই এই পৰিস্থিতিৰ বাবে বিভাগৰ ওপৰত অসন্তুষ্টি প্ৰকাশ কৰে।
সদৌ অসম গাহৰি পালক সন্থাৰ মুখ্য সাংগঠনিক সম্পাদক ৰিতুমনি হাজৰিকাই সংবাদমেলত কয় যে উজনি অসমত ASF-ত আক্ৰান্ত হৈ বৃহৎ সংখ্যক গাহৰিৰ মৃত্যু হোৱাৰ ফলত গাহৰি পালকসকলৰ মূৰত মাধমাৰ পৰিছে।
তেওঁ লগতে অভিযোগ কৰে যে বিভাগে নিজৰ দায়িত্ব সম্পূৰ্ণৰূপে পালন কৰা নাই। বিভাগে ইতিমধ্যে ২৮ খনমান ফাৰ্মত গাহৰি মাৰি পেলাইছে বা পুতি পেলাইছে। আনহাতে, বিভাগৰ নজনাকৈও বহু গাহৰিৰ মৃত্যু হৈছে যাৰ তথ্য বিভাগে সংগ্ৰহ কৰিব পৰা নাই। বিভাগে ২০০০ টকাতকৈ অধিক গাহৰি নিধন কৰি কেৱল গাহৰি মাংস আৰু গাহৰিৰ বেচা-কিনাত নিষেধাজ্ঞা জাৰি কৰিয়েই দায়িত্ব সামৰিছে।
ASF-ৰ ফলত শিৱসাগৰ, যোৰহাট, আৰু চৰাইদেউ জিলাৰ গাহৰি পালকসকলৰ গাহৰিৰ মৃত্যু হৈছে, যাৰ ফলত গাহৰি পালনৰ জৰিয়তে আত্মসংস্থাপনৰ পথ লোৱা নিবনুৱা যুৱকসকলৰ অৱস্থা শোচনীয় হৈ পৰিছে। সন্থাৰ মতে, চৰকাৰে দিয়া ক্ষতিপূৰণ নিতান্তই কম: এটা গাহৰি পোৱালিৰ বাবে – ২৫০০ টকা আৰু এক কুইণ্টলৰ ওপৰৰ প্ৰাপ্তবয়স্ক গাহৰিৰ বাবদ – ১২,০০০ টকা।
ৰিতুমনি হাজৰিকাই কয় যে এজন পালকে এটা গাহৰি এক কুইণ্টল কৰিবলৈ কমেও ১৫,০০০ টকা খৰচ কৰিব লাগে। তেনেস্থলত মাত্ৰ ১২,০০০ টকা দি চৰকাৰে দায় সাৰিছে বুলি তেওঁ অভিযোগ কৰে।
তেওঁ আঙুলিয়াই দিয়ে যে ASF বিয়পি পৰাৰ অন্য কাৰণসমূহৰ ভিতৰত আছে:
বহিঃৰাজ্যৰ গাহৰি ছিণ্ডিকেট: বহিঃৰাজ্যৰ গাহৰি ছিণ্ডিকেটে অসমৰ বজাৰ নিয়ন্ত্ৰণ কৰি থলুৱা পালকসকলক মাধমাৰ শোধাইছে।
সৰবৰাহৰ ফলত সংক্ৰমণ: বহিঃৰাজ্যৰ পৰা ৰে’লযোগে গাহৰি সৰবৰাহ কৰোতে মৃত্যু হোৱা গাহৰি য’তে-ত’তে পেলাই দিয়াটোও সংক্ৰমণ বিয়পাৰ অন্যতম কাৰণ।
সময়মতে ভেকচিনৰ অভাৱ: পশুপালন আৰু পশু চিকিৎসা বিভাগে সময়মতে ভেকচিন প্ৰদান নকৰাৰ বাবে ফ্লু-য়ে প্ৰতিবছৰে ভয়াৱহ ৰূপ লৈছে।
ASF-ৰ ফলত বৃহৎ লোকচানৰ সন্মুখীন হোৱা ধাৰ কৰি গাহৰি পালন কৰা নিবনুৱা যুৱকসকলে এতিয়া পুনৰ কাম বিচাৰি বহিঃৰাজ্যলৈ যাব লগা হৈছে। সেয়ে, কৃষক মুক্তি সংগ্ৰাম সমিতি আৰু সদৌ অসম গাহৰি পালক সন্থাই শীঘ্ৰেই বিভাগীয় মন্ত্ৰীক ছোৱাইন ফ্লুৰ প্ৰাদুৰ্ভাৱৰ ক্ষেত্ৰত উপযুক্ত ব্যৱস্থা গ্ৰহণৰ বাবে দাবী জনাইছে।
