আই আই টি মাদ্ৰাছৰ পাছত এইবাৰ মণিপাল বিশ্ববিদ্যালয়ত কোভিডৰ গণ সংক্ৰমণ
মণিপাল বিশ্ববিদ্যালয়ৰ কৰ্ণাটক কেম্পাছৰ ৬৯ গৰাকী শিক্ষাৰ্থীৰ শৰীৰত কোভিডৰ উপস্থিতি ধৰা পৰিছে।
বিগত মাহত বিশ্ববিদ্যালয়খনৰ কৰ্ণাটক কেম্পাছলৈ উভতি অহা শিক্ষাৰ্থী সকলৰ ভিতৰত ৬৯ গৰাকী শিক্ষাৰ্থীৰ শৰীৰত কোভিডৰ উপস্থিতি ধৰা পৰে বুলি মণিপাল একাডেমী অফ হায়াৰ এডুকেশ্যনে প্ৰকাশ কৰে।
নৱেম্বৰ মাহত মণিপাল একাডেমী অফ হায়াৰ এডুকেশ্যনে শিক্ষাৰ্থী সকলক নিজৰ কেম্পাছলৈ উভতি অহাৰ বাবে অনুমতি প্ৰদান কৰিছিল।
বিভাগীয় কৰ্তৃপক্ষই উল্লেখ কৰা অনুসৰি প্ৰায় ৭০০০ শিক্ষাৰ্থীয়ে নৱেম্বৰ মাহত বিশ্ববিদ্যালয়খনৰ বিভিন্ন কেম্পাছলৈ উভতি আহিছিল।
উল্লেখযোগ্য যে, ইয়াৰ পূৰ্বে আই আই টি মাদ্ৰাছৰ কেম্পাছতো শিক্ষাৰ্থী আৰু কৰ্মচাৰীৰ শৰীৰত কোভিড ধৰা পৰিছিল।
তামিলনাডুৰ ৰাজধানী চেন্নাইস্থিত উচ্চ শিক্ষা প্ৰতিষ্ঠানখনৰ ৬৬ গৰাকীকৈ শিক্ষাৰ্থীৰ দেহত ১৪ নৱেম্বৰত কোভিড ১৯ৰ উপস্থিতি ধৰা পৰিছিল।
পৰৱৰ্তী সময়ত এই সংখ্যা ১৮৩ গৰাকীলৈ বৃদ্ধি পাইছিল। কোভিড প’জিটিভৰ ঘটনা বৃদ্ধি পোৱাত প্ৰতিষ্ঠানখনৰ বিভাগ সমূহ সাময়িকভাৱে পুনৰ বন্ধ কৰি দিয়া হৈছিল।