যোৱা শনিবাৰে নাগালেণ্ডৰ মন জিলাত আছাম ৰাইফলছে নৃশংসভাৱে ১৪ জন সাধাৰণ নাগৰিকক হত্যা কৰাৰ পিছৰে পৰা সমগ্ৰ উত্তৰ-পূৰ্বাঞ্চলতে সজোৰে উত্থাপন হৈছে সশস্ত্ৰ বাহিনী বিশেষ ক্ষমতা আইন (AFSPA) বাতিলৰ দাবী।
বিজেপি নেতৃত্বাধীন এনডিএ মিত্ৰজোঁটৰ অংশ নেচনেল পিপলছ পাৰ্টিৰ সাংসদ আগাথা চাংমাই কালি লোকসভাত এই কঠোৰ আইন বাতিল কৰিবলৈ দাবী জনায়।
চাংমাই কয়, “এইয়া প্ৰথম বাৰৰ বাবে নহয় যে এনে এটা ঘটনা সংঘটিত হৈছে য’ত নিৰীহ নাগৰিকসকলে AFSPA ৰ দৰে কঠোৰ আইনৰ ফল ভুগিব লগা হৈছে। ই আমাক ২০ চনত মণিপুৰত সংঘটিত এটা ঘটনাৰ কথাও মনত পেলাই দিয়ে যাক মালোম গণহত্যা বুলিও কোৱা হয়, য’ত দহজনতকৈও অধিক নাগৰিকক গুলীয়াই হত্যা কৰা হৈছিল। ই ইৰম শৰ্মিলাক ১৬ বছৰৰ অনশন কৰিবলৈ বাধ্য কৰিছিল।”
সাংসদ গৰাকীয়ে লগতে কয়, “উত্তৰ-পূৰ্বাঞ্চলত বিদ্ৰোহৰ অন্ত পেলাবলৈ ১৯৫৮ চনত AFSPA প্ৰণয়ন কৰা হৈছিল। কিন্তু এই কঠোৰ আইনখন এই ক্ষেত্ৰত সফল হোৱা নাই। ইয়াৰ পৰিৱৰ্তে ইয়াৰ ফলত সাধাৰণ লোকসকলক অন্যায়ভাৱে অত্যাচাৰ, ধৰ্ষণ আৰু হত্যা কৰা হৈছে।”
উল্লেখ্য যে নেচনেল পিপলছ পাৰ্টীৰ মুৰব্বী তথা মেঘালয়ৰ মুখ্যমন্ত্ৰী কনৰাড চাংমাইও ইতিপূৰ্বে AFSPA বাতিলৰ দাবী জনাইছিল। নাগালেণ্ডৰ মুখ্যমন্ত্ৰী নেইফিঅ’ ৰিঅ’ৱেও এই দাবী উত্থাপন কৰিছে। কিন্তু নেডাৰ আহ্বায়ক তথা অসমৰ মুখ্যমন্ত্ৰী হিমন্ত বিশ্ব শৰ্মাৰ মুখত ঘূণাক্ষৰেও উচ্চাৰণ হোৱা নাই এই কঠোৰ আইন বাতিলৰ দাবী।
