যৌনতাৰ বাবে সন্মতি দিয়াৰ বয়স কম কৰিব নোৱাৰি। আইন আয়োগে কেন্দ্ৰ চৰকাৰক দিলে এই পৰামৰ্শ । কেন্দ্ৰই জানিব বিচাৰিছিল যে যৌন অপৰাধৰ পৰা শিশু সুৰক্ষা বা POCSO আইনৰ অধীনত যৌন সন্মতিৰ বয়স ১৮ বছৰৰ পৰা ১৬ বছৰলৈ হ্ৰাস কৰিব পাৰি নেকি?
ইয়াৰ উত্তৰত শুকুৰবাৰে আইন আয়োগে কয় যে সন্মতিৰ বয়স হ্ৰাস কৰিলে নেতিবাচক প্ৰভাৱ পৰিব পাৰে। ইয়াৰ ফলত বাল্য বিবাহ আৰু শিশু সৰবৰাহ বৃদ্ধি পাব পাৰে।
আইন আয়োগৰ পেনেলৰ মতে, কিছুমান বিশেষ পৰিস্থিতিত সন্মতিৰ বয়স ১৮ বছৰৰ পৰা ১৬ বছৰলৈ হ্ৰাস কৰিব পাৰি। তেনে ক্ষেত্ৰত আইনৰ সংশোধনীৰ প্ৰয়োজন। সেই বিশেষ ক্ষেত্ৰসমূহত ন্যায়িক নিৰ্দেশনাৰ প্ৰয়োজন।
বিগত বৰ্ষৰ ডিচেম্বৰ মাহত উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুদে কয় যে, যিহেতু POCSO আইনৰ অধীনত বিভিন্ন গোচৰত সন্মতিৰ বয়স হ্ৰাস কৰা হৈছে, সেয়েহে সন্মতিৰ বয়স ১৮ বছৰৰ পৰা ১৬ বছৰলৈ হ্ৰাস কৰিব পাৰি নেকি সেই বিষয়ে সংসদে বিবেচনা কৰা উচিত।
আইন মন্ত্ৰালয়ৰ প্ৰতিবেদন অনুসৰি ২২ নং আইন আয়োগে কয় যে, “বৰ্তমানৰ শিশু সুৰক্ষা আইনসমূহ পৰ্যালোচনা কৰি, শিশু নিৰ্যাতন, শিশু সৰবৰাহৰ আৰু শিশু বেশ্যাবৃত্তিৰ সৈতে জড়িত বিভিন্ন ৰায়দানৰ বিচাৰ কৰি আয়োগে অনুভৱ কৰিছে যে সন্মতিৰ বয়স ১৮ বছৰৰ পৰা ১৬ বছৰলৈকে হ্ৰাস কৰাতো উপযুক্ত নহ’ব।”
কৰ্ণাটক উচ্চ ন্যায়ালয়ৰ প্ৰাক্তন মুখ্য ন্যায়াধীশ ঋতুৰাজ অৱস্থীৰ নেতৃত্বত গঠিত পেনেলে অৱগত কৰে যে সকলো দিশ পৰ্যালোচনা কৰি ১৬ৰ পৰা ১৮ বছৰৰ ভিতৰত সংঘটিত হোৱা অপৰাধমূলক কাণ্ডৰ সকলো পৰামৰ্শ গ্ৰহণ কৰি বয়স কম নকৰাৰ সিদ্ধান্ত গ্ৰহণ কৰাৰ পৰামৰ্শ দিয়া হৈছে।
প্ৰতিবেদনখনত কোৱা হৈছে, “আয়োগে অনুভৱ কৰিছে যে POCSO আইনখনৰ কিছু সংশোধনৰ প্ৰয়োজন। আইন সুষম হ’লে শিশুৰ সুৰক্ষা আৰু স্বাৰ্থ সৰ্বোত্তম হ’ব।”
