সোমবাৰে নতুন দিল্লীত ৰাষ্ট্ৰীয় আৰু আঞ্চলিক ৰাজনৈতিক দলসমূহৰ উপস্থিতিত নিৰ্বাচন আয়োগৰ এখন বৈঠক অনুষ্ঠিত হয়। বৈঠকত নিৰ্বাচনৰ লগতে নিৰ্বাচনী বিধি ব্যৱস্থা সন্দৰ্ভতো আলোচনা কৰা হয়।
উক্ত বৈঠকত উপস্থিত থাকি অসম গণ পৰিষদ দলৰ সাধাৰণ সম্পাদক ৰমেন্দ্ৰ নাৰায়ণ কলিতা আৰু ডাঃ কমলাকান্ত কলিতাই নিৰ্বাচনৰ পূৰ্বে এখন বিদেশীৰ নাম মুক্ত আৰু প্ৰকৃত ভাৰতীয় নাগৰিকৰ নাম সন্নিবিষ্ট শুদ্ধ ভোটাৰ তালিকা প্ৰকাশৰ বাবে দাবী জনায়।
অসমৰ ভয়াবহ অনুপ্ৰৱেশৰ কথা উল্লেখ কৰি ৰাজ্যখনৰ খিলঞ্জীয়া জনসাধাৰণৰ স্বাৰ্থত আৰু দেশৰ সাৰ্বভৌমত্ব আৰু ভৌগোলিক অখণ্ডতা অক্ষুণ্ণ ৰখাৰ স্বাৰ্থতে অগপই ভোটাৰ তালিকাৰ সংশোধনৰ জৰিয়তে এখন শুদ্ধ ভোটাৰ তালিকাৰ দাবী জনায়। তদুপৰি, নিৰ্বাচনী সংস্কাৰৰ প্ৰয়োজনীয়তা সম্পৰ্কত অগপই নিজৰ স্থিতি সম্পৰ্কে অৱগত কৰে।
অগপৰ প্ৰতিনিধি দলটোৱে অসমত নিৰ্বাচন অনুষ্ঠিত হোৱাৰ পূৰ্বে ব্যাপক পৰ্যালোচনা কৰাৰ ওপৰতো গুৰুত্ব আৰোপ কৰে। দলটোৱে লগতে নিৰ্বাচনৰ প্ৰাৰ্থী আৰু ৰাজ্যনৈতিক দলসমূহৰ নিৰ্বাচনী ব্যয়ৰ ক্ষেত্ৰতো সমতা ৰক্ষা কৰা উচিত বুলি মত পোষণ কৰে।
নিৰ্বাচনত একাংশ দল বা প্ৰাৰ্থীয়ে ধনবল আৰু বাহুবলৰ জৰিয়তে গণতান্ত্ৰিক বিধি ব্যৱস্থা ধূলিসাৎ কৰি অহাৰ অভিযোগ তুলি এইক্ষেত্ৰত নিৰ্বাচনৰ ৪৮ ঘণ্টাৰ পূৰ্বৰে পৰা কঠোৰ স্থিতি গ্ৰহণ কৰাৰ উচিত বুলি মত পোষণ কৰে।
আনহাতে, অগপই মহিলাৰ সংৰক্ষণৰ সন্দৰ্ভত বৈঠকত হোৱা আলোচনাত এই বিষয়ত চৰকাৰে সিদ্ধান্ত গ্ৰহণ কৰিব লাগে বুলি মত প্ৰকাশ কৰে।