মাত্ৰ ডেৰ মাহ আগলৈকে অসমৰ জনগণ আৰু অন্যান্য দল-সংগঠনৰ কাষত থাকি নাগৰিকত্ব সংশোধনী বিধেয়ক বিৰোধী আন্দোলনেৰে অসম তোলপাৰ কৰা অগপই আজি প্ৰকাশ কৰা নিৰ্বাচনী ইস্তাহাৰত মাত্ৰ এটা শাৰীতে বিধেয়কখন সন্দৰ্ভত নিজৰ স্থিতি সীমাবদ্ধ ৰখা দেখা গ’ল।
বিজেপিৰ সৈতে মিত্ৰতালৈ পুনৰ ঘূৰি গৈ একেলগে নিৰ্বাচনত অৱতীৰ্ণ হোৱা দলটোৱে ইস্তাহাৰখনত নিজৰ পূৰ্বৰ স্থিতি একে থাকিব বুলি জনোৱাৰ পৰিৱৰ্তে অধিক লিখাৰ পৰা বিৰত থাকে।
“নাগৰিকত্ব সংশোধনী বিধেয়কৰ ক্ষেত্ৰত অসম গণ পৰিষদ দলে পূৰ্বৰ স্থিতিতে অটল থাকিব”, ইস্তাহাৰত কোৱা হয়।
উল্লেখযোগ্য যে সাময়িকভাৱে শাম কটা নাগৰিকত্ব সংশোধনী বিধেয়কৰ বিষয়টোত বিজেপিয়ে ইয়াৰ ইস্তাহাৰত ‘বিধেয়কখন অনা হ’বই’ বুলি এক প্ৰকাৰৰ সংকল্প প্ৰকাশ কৰিছে। কিন্তু তাৰ পিছতো এবাৰ বিধেয়কৰ বিৰোধিতা কৰি মিত্ৰতা ত্যাগ কৰি পুনৰ ক্ষমতাৰ লোভত গেৰুৱা দলটোৰ লগ লগা অগপ এতিয়া নৰম।
প্ৰথম পৰ্য্যায়ৰ নিৰ্বাচনী প্ৰচাৰ শেষ হ’বলৈ কেইঘন্টামান বাকী থকা অৱস্থাত প্ৰকাশ কৰা ইস্তাহাৰখনতেই অগপৰ স্থিতি স্পষ্ট হৈ পৰিছে। অসমৰ খিলঞ্জীয়াৰ অস্তিত্বৰ প্ৰশ্ন জড়িত থকা গুৰুত্বপূৰ্ণ বিষয়টোত মাত্ৰ এটা শাৰী লিখিয়েই দায় সাৰিলে নিজকে জাতীয়তাবাদী দল বুলি দাবী কৰা অগপই।
বিজেপিয়ে জাপি দিব বিচৰা বিধেয়কখনক ‘জাতিধ্বংসী’ আখ্যাৰে অসমৰ ৰাইজ, জাতীয়-জনগোষ্ঠীয় দল-সংগঠন, অনুষ্ঠান-প্ৰতিষ্ঠান আৰু ছাত্ৰ সমাজে দুবছৰৰো অধিক সময় তীব্ৰ আন্দোলন কৰিলে।
প্ৰথম অৱস্থাত চুৰচুৰীয়া প্ৰতিবাদ কৰা অগপই পাছত বিধেয়কখন লোক সভাত গৃহীত হোৱাটো নিশ্চিত হোৱাত অসমৰ ৰাইজৰ আৱেগৰ পক্ষত থকা দেখুৱাই ৭ জানুৱাৰিত বিজেপিৰে মিত্ৰতা ত্যাগ কৰিলে যদিও পদত্যাগ গৃহীত নহ’ল অগপৰ তিনি মন্ত্ৰীৰ। অৱশ্যে ৰাজ্যসভাত প্ৰয়োজনীয় সমৰ্থনৰ অভাৱত বিজেপিয়ে বিধেয়কখন গৃহীত কৰিব নোৱাৰিলে।
ইপিনে নিৰ্বাচন অহাৰ লগে লগে পুনৰ যোৱা ১২ মাৰ্চৰ মাজনিশা বিজেপিৰে পুনৰ মিত্ৰতাত আবদ্ধ হ’ল অগপ।
মন কৰিব লগীয়া যে বিধেয়ক-বিৰোধী মিত্ৰ অগপৰ প্ৰতি কোনো সন্মান নেদেখুৱাকৈ চৰকাৰলৈ আহিলে বিধেয়কখন পুনৰ আনিব বুলি বিজেপিয়ে নিৰ্বাচনী ইস্তাহাৰত স্পষ্ট ঘোষণা কৰিছে।
সকলো জানি-বুজিও পুনৰ বিজেপিৰ লগ লগা অগপৰ যে এতিয়া বিধেয়কখনক লৈ গা এৰা মন্তব্যৰ বাহিৰে আন একো উপায় নাই দলটোৰ ইস্তাহাৰখনেই সেয়া প্ৰমাণ কৰিছে।
আনহাতে, অগপৰ ইস্তাহাৰ প্ৰকাশৰ পাছতেই তাত বিধেয়কখনক লৈ লিপিবদ্ধ শাৰীটো সন্দৰ্ভত কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে এক সংবাদমেলত প্ৰতিক্ৰিয়া ব্যক্ত কৰে।
“বিজেপিৰ চৰকাৰ গঠন কৰিব পৰা ক্ষমতা থাকিব পাৰে। কিন্তু অসম গণ পৰিষদৰ এজন বা দুজনহে সাংসদ থাকিব পাৰে। গতিকে তাত অগপৰ কোনো ধৰণৰ অধিকাৰেই নাথাকিব। সেইকাৰণে বিজেপিৰ লগত যোৱা অগপই ‘কেব’ সন্দৰ্ভত একে স্থিতিতে থকা বুলি কোৱা কথাটো অসমবাসীৰ বাবে এটা অপমান আৰু দলটোৰ ভণ্ডামি”, অখিল গগৈয়ে কয়।
তেওঁ আঞ্চলিক দলটোক বিজেপি মিত্ৰজোঁটৰ পৰা পুনৰ ওলাই আহিবলৈ আহ্বান জনায়।
