উত্তৰ-কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচনৰ দিন চমু চাপি অহাৰ লগে লগে জিলাখনৰ সামিগ্ৰক আইন শৃংখলা পৰিস্থিতি ক্রমাৎ বেয়াৰ ফালে ঢাল খাবলৈ আৰম্ভ হোৱা পৰিলক্ষিত হৈছে। মাইবাঙ আৰক্ষী থানাৰ অন্তৰ্গত হাজাদিচাত অগপ নেতা ফিৰোজ লাঙঠাচাক অচিনাকী বন্দুকধাৰীৰ দলে ভয়-ভাবুকি প্ৰদান কৰাৰ চাঞ্চল্য মাৰ নৌযাওঁতেই বৃহস্পতিবাৰে পুনৰ অগপৰ নেতা এজনক অচিনাক্ত দুৰ্বিত্তই আক্ৰমণ কৰা ঘটনা পোহৰলৈ আহিছে।
জানিব পৰা মতে দুৰ্বৃত্তৰ ৰোষৰ বলি হোৱা লোকজন হাডিঙমা অগপ আঞ্চলিক কমিটিৰ সভাপতি নলেষ নুনিচা। এই ঘটনা সংঘটিত হোৱাৰ পাছতে অগপ নেতাজনে হাফলং আৰক্ষী থানাত এখন এজাহাৰ দাখিল কৰে।
এজাহাৰত নলেষে উল্লেখ কৰি কয় যে ৰাতি এখন ফুটবলৰ ফাইনেল খেল অনুষ্ঠিত হোৱাৰ পাছত এগৰাকী ব্যক্তিয়ে তেওঁক মাতি পঠিয়াই। সেই অনুসৰি ডিকন হাপিলা নামৰ বেৰেলাঙডিচা গাঁওৰ যুৱকে তেওঁক বগা ৰঙৰ স্ক’ৰপিও গাড়ীত বলপূৰ্বকভাৱে সুমুৱাই লৈ গাড়ীৰ খিৰিকি বন্ধ কৰি দুই ঘন্টা ধৰি তৰ্ক-বিতৰ্কত লিপ্ত হোৱাৰ লগতে মাৰপিট কৰে।
বেয়াকৈ মাৰপিট কৰাৰ ফলত অগপৰ নেতাজন গুৰুতৰভাৱে আঘাতপ্ৰাপ্ত হয়। ইয়াৰ পাছত মাৰপিটত জড়িত থকা দুৰ্বিত্ত ডিকন হাপিলাই ঘটনাৰ বিষয়ে আৰক্ষী বা কোনোবাক অৱগত কৰিলে পৰিণাম অধিক ভয়ংকৰ হ’ব বুলি একপ্ৰকাৰ ভাবুকি প্ৰদান কৰি যায়।
অগপ নেতা নুনিচাই এজাহাৰত উল্লেখ কৰা অনুসৰি বগা ৰঙৰ গাড়ীখনৰ নম্বৰ আছিল এএছ ০৮ ৭২৯৫। জানিব পৰা মতে গাড়ীৰ গৰাকী পাৰ্বত্য স্বায়ত্ত শাসিত পৰিষদৰ ই এম দেবজিত বাঠাৰি। আনহাতে ঘটনা সংঘটিত হৈ থকাৰ সময়ত অলপ দূৰত ই এম দেবজিত বাঠাৰিও থকাৰ কথা এজাহাৰত স্পষ্টকৈ উল্লেখ কৰে নলেষে।
ঘটনা সন্দৰ্ভত দাখিল কৰা এজাহাৰৰ ভিত্তিত আৰক্ষীয়ে ঘটনাটোৰ আঁৰত গভীৰ ৰাজনৈতিক ষড়যন্ত্ৰ অন্তৰ্নিহিত হৈ থাকিব পাৰে বুলি সন্দেহ প্ৰকাশ কৰিছে।
