লোকসভা নিৰ্বাচনৰ দিন ঘোষণা কৰাৰ পূৰ্বেই অসম গণ পৰিষদ দলে নিৰ্বাচন কেন্দ্ৰিক তৎপৰতা আৰম্ভ কৰিছে। ইতিমধ্যে দলৰ তৰফৰ পৰা ৰাজ্যখনৰ লোকসভা সমষ্টি ভিত্তিক সাংগঠনিক কামকাজ অধিক ক্ষিপ্ৰ কৰি তোলাৰ লগতে দলীয় বিষয়ববীয়া তথা কৰ্মী সকলক নিৰ্বাচনৰ বাবে সকলো ধৰণে সাজু হবলৈ কেন্দ্ৰীয় নেতৃত্বই আহ্বান জনাইছে।
২০ ফেব্ৰুৱাৰি তাৰিখে আমবাৰী মুখ্য কাৰ্য্যালয়ত অনুষ্ঠিত হোৱা কেন্দ্ৰীয় কাৰ্য্যনিৰ্বাহক সমিতিৰ সভাৰ পাছত যোৱা ৩ দিন ধৰি কেন্দ্ৰীয় নেতৃত্বই দলৰ ৫০ খনৰো অধিক জিলা সমিতিৰ সভাপতি-সম্পাদকৰে সৈতে নিৰ্বাচন সন্দৰ্ভত মতবিনিময় কৰে।
তদুপৰি, অগপৰ কেন্দ্ৰীয় কাৰ্য্য নিৰ্বাহক সমিতিৰ সভাই লোকসভা নিৰ্বাচনৰ প্ৰতি লক্ষ্য ৰাখি ৪ খনকৈ সমিতি গঠন কৰি দিয়ে।
আনহাতে, আজি বিয়লি ৩ বজাত ইস্তাহাৰ সমিতি আৰু প্ৰচাৰ সমিতিৰ দুখনকৈ গুৰুত্বপূৰ্ণ সভা অনুষ্ঠিত হ’ব। ইয়াৰ লগতে দলটোৱে ইতিমধ্যে লোকসভা সমষ্টি ভিত্তিতো সাংগঠনিক সভা তথা নিৰ্বাচন কেন্দ্ৰিক সভা অনুষ্ঠিত কৰাৰ পদক্ষেপ গ্ৰহণ কৰিছে।
অগপ দলে লোকসভা নিৰ্বাচনত কোনো ৰাষ্ট্ৰীয় দলৰ সৈতে মিত্ৰতা কৰিবনে নাই, নে অকলেই নিৰ্বাচনত অৱতীৰ্ণ হ’ব সেয়াও শীঘ্ৰেই স্পষ্ট কৰা হ’ব বুলি জানিব পৰা গৈছে। অকলেই নিৰ্বাচনত অৱতীৰ্ণ হ’লে দলটোৱে কমেও দহখন আসনত প্ৰতিদ্বন্দ্বিতা আগবঢ়োৱাৰ সম্ভাৱনা আছে।