বিশ্বৰ খাদ্যৰসিকৰ জিভাত এক অনন্য স্বাদৰ ঢৌ তুলি চিৰদিনৰ বাবে চকু মুদিলে আলী আহমেদ আছলামে। বুধবাৰে স্কটলেণ্ডত মৃত্যু হয় পাকিস্তানী মূলৰ এই বিশ্ব বিখ্যাত চেফ্ গৰাকীৰ। ‘চিকেন টিক্কা মছলা’ নামৰ বৰ্তমানৰ বহুল জনপ্ৰিয় খাদ্য বিধৰ জন্মদাতা আছিল আলী আহমেদ আছলাম।
মৃত্যুৰ সময়ত আছলামৰ বয়স আছিল ৭৭ বছৰ। ‘মিষ্টাৰ আলী’ নামেৰে বিখ্যাত এই চেফগৰাকীয়ে নিজৰ সৃষ্টি এই এই ৰেচিপি বিধক লৈ অত্যন্ত গৌৰৱ কৰিছিল। বাৰ্ধক্যৰ বাবেই আলীৰ মৃত্যু হোৱা বুলি অনুমান কৰা হৈছে। অৱশ্যে মৃত্যুৰ কাৰণ সন্দৰ্ভত এইপৰ্যন্ত কোনো কথা প্ৰকাশ কৰা নাই পৰিয়ালে।
আছলামৰ এই ‘চিকেন টিক্কা মছলা’ৰ সৃষ্টিৰ আঁৰত আছে এক আমোদজনক কাহিনী। যোৱা শতিকাৰ সত্তৰৰ দশকৰ কথা। সেই সময়ত আলী আহমেদ আছলামে স্কটলেণ্ডৰ গ্লাছগোত এখন সৰু ৰেষ্টুৰেণ্ট চলাই আছিল।
এদিন স্থানীয় এগৰাকী গ্ৰাহক আছলামৰ ৰেষ্টুৰেণ্টলৈ আহিছিৰ কুকুৰা মঙহ খোৱাৰ উদ্দেশ্যে। গ্ৰাহকগৰাকীৰ অৰ্ডাৰ মতেই তেওঁৰ সমুখত দিয়া হয় কুকুৰা মঙহৰ আঞ্জা। কিন্তু এই মঙহৰ আঞ্জাখন খাই সন্তুষ্ট নহয় গ্ৰাহকগৰাকী।
আঞ্জাখন খাই যথেষ্ট শুকান যেন অনুভৱ হোৱাৰ লগতে খাবলৈ অসুবিধা পোৱা বুলি বিষোদগাৰ প্ৰকাশ কৰে গ্ৰাহকগৰাকীয়ে। গ্ৰাহকৰ অভিযোগ শুনাৰ পাছতে আলীৰ মনলৈ আহে এক নতুন প্ৰকৰণৰ কুকুৰা মঙহ ৰন্ধাৰ চিন্তা।
আলীয়ে এই নতুন ৰেচিপিৰে মাংস ৰন্ধাৰ সময়ত সেই আঞ্জাখনত দৈ আৰু ক্ৰীম ব্যৱহাৰ কৰাৰ সিদ্ধান্ত ল’লে। আৰু এইদৰেই জন্ম হ’ল জনপ্ৰিয় আৰু সুস্বাদু ‘চিকেন টিক্কা মছলা’ৰ।
অৱশ্যে চিকেন টিক্কা মছলাৰ জন্ম বৃতান্ত সন্দৰ্ভত এক বিতৰ্কও চলি আহিছে। ইংলেণ্ডৰ কিছুমান ৰেষ্টুৰেণ্টে এই জনপ্ৰিয় খাদ্যবিধৰ আৱিষ্কাৰক আলী নহয় বুলি দাবী কৰি আহিছে।
অৱশ্যে তৎসত্বেও খাদ্যৰসিক সকলে চিকেন টিক্কা মছলা প্ৰথমে ‘মিষ্টাৰ আলী’ৰ ‘চীছমহল’ নামৰ ৰেষ্টুৰেণ্টখনতে সৃষ্টি হৈছিল বুলি বিশ্বাস কৰি আহিছে।
