২০ বছৰৰ পাছত ২০৩০ চনত পুনৰ ভাৰতত অনুষ্ঠিত হ’ব পাৰে কমনৱেলথ গেমছ। বুধবাৰে কেন্দ্ৰৰ পৰা অনুমতি লাভ কৰি ভাৰতে আনুষ্ঠানিকভাৱে প্ৰতিযোগিতাখন আয়োজন কৰাৰ প্ৰস্তাৱ আগবঢ়াইছে। ৩১ আগষ্টৰ ভিতৰত চূড়ান্ত প্ৰস্তাৱ দাখিল কৰিব লাগিব।
নৱেম্বৰৰ শেষৰ ফালে ২০৩০ চনৰ কমনৱেলথ গেমছৰ আয়োজকসকলৰ নাম ঘোষণা কৰা হ’ব। ভাৰতত কমনৱেলথ গেমছ অনুষ্ঠিত হ’লে সকলো খৰচ কেন্দ্ৰই বহন কৰিব।
ইতিমধ্যে ভাৰতে ২০৩০ চনৰ কমনৱেলথ গেমছ আয়োজনৰ বাবে আগ্ৰহ প্ৰকাশ কৰিছিল। বুধবাৰে সাধাৰণ সভাত এই প্ৰস্তাৱ গৃহীত হয়।
ভাৰতীয় অলিম্পিক কমিটীৰ যুটীয়া সম্পাদক কল্যাণ চৌবেয়ে কয় যে শীঘ্ৰে প্ৰস্তুতি আৰম্ভ হ’ব। ইতিমধ্যে কানাডাই নিজৰ নাম প্ৰত্যাহাৰ কৰাৰ বাবে ভাৰতৰ সম্ভাৱনা বাঢ়িছে। প্ৰতিযোগিতা এতিয়া কেৱল নাইজেৰিয়াৰ সৈতে। কিন্তু জনা গৈছে যে দক্ষিণ আফ্ৰিকাই নতুন প্ৰস্তাৱ দাখিল কৰিব পাৰে।
এই সন্দৰ্ভত কাৰ্য্যকৰী সমিতিৰ সদস্য ৰোহিত ৰাজপালে কয়, “২০৩০ চনৰ কমনৱেলথ গেমছ পূৰ্ণাংগ হ’ব। আমি যিবোৰ খেলত ভাল, সেইবোৰ অন্তৰ্ভুক্ত কৰিব পাৰি যাতে পদকৰ সংখ্যা বহু পৰিমাণে বৃদ্ধি পায়।”
মন কৰিবলগীয়া যে ২০২৬ চনৰ গ্লাছগো গেমছত হকী, বেডমিণ্টন, মল্লযুঁজ আৰু শ্বুটিঙৰ দৰে ইভেণ্ট নাথাকিব, য’ত ভাৰতে নিয়মিতভাৱে পদক লাভ কৰি আহিছে।
ৰাজপালে লগতে কয়, “প্ৰথমে কমনৱেলথ গেমছৰ মূল ক্ৰীড়া যিবোৰ প্ৰতিবাৰেই অনুষ্ঠিত হয়। দ্বিতীয় খণ্ডত আয়োজক দেশৰ পছন্দৰ খেল আৰু তৃতীয় খণ্ড অতিৰিক্ত ক্ৰীড়াৰে গঠিত। ২০৩০ চনৰ কমনৱেলথ গেমছত আমি পৰম্পৰাগত আৰু থলুৱা ক্ৰীড়া ৰাখিম। শ্বুটিং, আৰ্চাৰী, ৰেছলিং, কাবাডী, খোডী আদি খেল অনুষ্ঠিত হ’ব।”
শেহতীয়াকৈ কমনৱেলথ গেমছৰ সঞ্চালক ডেৰেন হল আহমেদাবাদলৈ আহিছিল। আন্তঃগাঁথনি পৰিদৰ্শন কৰাৰ সমান্তৰালকৈ তেওঁ গুজৰাটৰ বিষয়াসকলৰ সৈতে বাৰ্তালাপ কৰিছিল। জানিব পৰা মতে চলিত বৰ্ষৰ শেষৰ ফালে আন এটা ডাঙৰ দল আহিব পাৰে।ইয়াৰ পূৰ্বে ভাৰতে ২০১০ চনত কমনৱেলথ গেমছ আয়োজন কৰিছিল। সেয়া আছিল প্ৰথম। কিন্তু ইয়াৰ অপব্যৱস্থাপনা আৰু আৰ্থিক দুৰ্নীতিৰ বাবে সমালোচনা হৈছিল। এথলীটছ ভিলেজ আৰু ষ্টেডিয়ামকে ধৰি কেইবাটাও আন্তঃগাঁথনি নিৰ্মাণত যথেষ্ট পলম হৈছিল, বাজেট বৃদ্ধি হৈছিল, নেহৰু ষ্টেডিয়ামৰ এখন ফুটব্ৰিজ ভাঙি পেলোৱাত বহু শ্ৰমিক আহত হৈছিল। আনকি আয়োজক সমিতিৰ অধ্যক্ষ সুৰেশ কালমাদীকো ব্যাপক আৰ্থিক দুৰ্নীতিৰ বাবে জেললৈ প্ৰেৰণ কৰা হৈছিল। এই কথা দেখি বহু খেলুৱৈয়ে নিজৰ নাম প্ৰত্যাহাৰ কৰিছিল। আনকি স্কটলেণ্ড, কানাডাৰ দৰে দেশেও এই অপব্যৱস্থাপনাৰ বাবে খেলুৱৈক পলমকৈ পঠিয়াইছিল।
