নগাওঁ জিলাৰ পুৰণিগুদাম বৰাচুকৰ বাসিন্দা কৃষক ধৰ্মেশ্বৰ বৰা আৰু গৃহিনী শেৱালী বৰাৰ কনিষ্ঠ কন্যা পলী বৰাই আজি ঘোষিত উচ্চতৰ মাধ্যমিক চুড়ান্ত পৰীক্ষাত ৰাজ্যৰ ভিতৰতে তৃতীয় স্থান লাভ কৰি সমগ্র নগাঁৱৰ লগতে জন্মস্থান পুৰণিগুদামলৈ গৌৰৱ কঢ়িয়াই আনিবলৈ সক্ষম হৈছে।
সৰুৰে পৰা মেধাৱী ছাত্ৰী গৰাকীয়ে হাইস্কুল শিক্ষান্ত পৰীক্ষাত ৯১ শতাংশ নম্বৰ আহৰণেৰে পুৰণিগুদাম হালোৱাগাওঁ উচ্চ মাধ্যমিক বিদ্যালয়ৰ পৰা সুখ্যাতিৰে উৰ্ত্তীণ হোৱাৰ পিছত বৃহস্পতিবাৰে ঘোষিত ফলাফলে পুৰণিগুদামবাসীক উৎফুল্লিত কৰি তুলিছে।
নগাঁও চহৰৰ কনচেপ্ত জুনিয়ৰ কলেজৰ পৰা এই সফলতা লাভ কৰিবলৈ সক্ষম হোৱা মেধাৱী ছাত্ৰী গৰাকীয়ে ইংৰাজী বিষয়ত ৮৫, অসমীয়া বিষয়ত ৯৭, শিক্ষা বিষয়ত ৯৬, তৰ্ক শাস্ত্ৰত ৯৭ আৰু ৰাজনীতি বিজ্ঞান বিষয়ত ৯৮ নম্বৰসহ মুঠ ৪৭৩ নম্বৰ লাভ কৰিবলৈ সক্ষম হয়।
ভৱিষ্যতে এগৰাকী ভাল শিক্ষয়িত্ৰী হোৱাৰ দুৰ্বাৰ আশা মনত পুহি ৰখা পলী বৰাই বৰ্তমান ৰাজনীতি বিজ্ঞানক মুখ্য বিষয় হিচাপে লৈ নগাঁও মহাবিদ্যালয়ত নামভৰ্তি কৰিবৰ বাবে মনস্থ কৰিছে বুলি জানিবলৈ দিয়ে সংবাদ মাধ্যমক।
সাংবাদিকৰ সৈতে হোৱা কথা-বতৰাত মেধাৱী ছাত্ৰীগৰাকীয়ে তেওঁৰ এই সফলতাৰ আঁৰত পিতৃ-মাতৃ, জ্যেষ্ঠ ভগ্নী আৰু মহাবিদ্যালয়ৰ শিক্ষক-শিক্ষয়িত্ৰীসকলৰ লগতে এৰি অহা হালোৱাগাওঁ উচ্চ মাধ্যমিক বিদ্যালয়ৰ শৈক্ষিক পৰিৱেশক কৃতজ্ঞতা জ্ঞাপন কৰে।
দৈনিক ১০/১১ ঘন্টাকৈ অধ্যয়ন কৰাৰ পৰিৱৰ্তে নিতৌ যি পঢ়ে তাকে খৰছি মাৰি পঢ়ি অৱশেষত এটা ভাল ফলাফললৈ আশাৰে বাট চাই ৰোৱা মেধাৱী ছাত্ৰীগৰাকীয়ে বৰ্তমান সামাজিক, ৰাজনৈতিক পৰিৱেশ অত্যন্ত অস্থিৰ বুলি উল্লেখ কৰে।
এনে পৰিবেশৰ মাজত ছাত্ৰীগৰাকীয়ে অনুজসকলক উদ্দেশ্য কৰি কয় যে এনে পৰিবেশৰ মাজতো নিজৰ লক্ষ্য সুস্থিৰ কৰি কৰ্মত অগ্ৰসৰ হ’লে নিশ্চয় এদিন সকলোৱে সফলতা লাভ কৰিব পাৰিব।
আধুনিক নৃত্য, বিহু নৃত্য অতি সুন্দৰভাৱে পৰিবেশন কৰি বিভিন্ন সময়ত ৰাইজৰ সমাদৰ বুটলি আনিবলৈ সক্ষম হোৱা মেধাবী ছাত্ৰীগৰাকীৰ জীৱনত ভবেন্দ্ৰ নাথ শইকীয়াৰ “অন্তৰীপ” আৰু ড: ৰুবুল মাউতৰ “মোৰো এটা সপোন আছিল” গ্ৰন্থ দুখনে বিশেষ প্ৰভাৱ পেলাইছিল বুলি উল্লেখ কৰে।
আজি এই ফলাফল ঘোষণা হোৱাৰ পিছতে তেওঁৰ নিজা গৃহত এক উদুলি-মুদুলি পৰিবেশে বিৰাজ কৰা পৰিলক্ষিত হৈছে।
সকলোৱে সামাজিক দূৰত্ব ৰক্ষা কৰি ছাত্ৰীগৰাকীক অভিনন্দন আৰু সম্বৰ্দ্ধনা জনোৱাও দেখা পোৱা গৈছে।
বিশেষকৈ পুৰণিগুদামৰ অগ্ৰণী সামাজিক, সাংস্কৃতিক সংগঠন বাপুজী ভৱন, অনিৰ্বান গোষ্ঠীৰ লগতে পুৰণিগুদাম আঞ্চলিক ছাত্ৰ সন্থা আৰু পুৰণি গুদাম প্ৰেছ ক্লাৱ, বৰাচুক যুৱক বৃন্দ, জাৰ্নেলিষ্ট ইউনিয়ন অৱ অসমৰ কলিয়াবৰ সমিতিকে ধৰি বহু কেইটা দল সংগঠনে সম্বৰ্ধনা জনায় উদীয়মান ছাত্ৰীগৰাকীক।
